Azerbaycan 2016 Yay Olimpiya Oyunlarinda - Wikipedia

Azərbaycan Milli Olimpiya Komandası XXXI Yay Olimpiya Oyunlarını 18 medalla (1 qızıl, 7 gümüş və 10 bürünc) başa vurdu. Qızıl medala sahib olan Radik İsayev həm mübarizə apardığı idman növü üzrə olimpiya çempionu olan birinci Azərbaycan idmançısı olaraq, həm də stend atıcısı Zemfira Meftahətdinovadan sonra Olimpiya, Dünya və Avropa çempionu olmağı bacaran növbəti Azərbaycan idmançısı olaraq tarixə düşdü. Gümüş medala sahib olan qadın güləşçi Mariya Stadnik və sərbəst güləşçi Xetaq Qazyumov isə Azərbaycanın Olimpiya Oyunları tarixində üç olimpiya medalına sahib olmağı bacaran birinci idmançılar oldular. İnna Osipenko-Radomska və Patimat Abakarova mübarizə apardığları idman növləri üzrə olimpiya medalına sahib olan birinci Azərbaycan idmançıları oldular. Lorenso Sotomayor isə çıxış elədiyi idman növü üzrə olimpiada finalında mübarizə aparan birinci Azərbaycan idmançısı olaraq tarixə düşdü.

Olimpiadadan əvvəl CBC Sport-da Salam, Rio! adlı verilişində, həmçinin İdman Azərbaycan TV-nin idman xəbərləri buraxılışlarında Bizim Olimpiyaçılarımız adlı süjetlərdə mütamadi olaraq olimpiadada mübarizə aparacaq Azərbaycan idmançıları barədə məlumatlar verilirdi.

Olimpiada günləri ərzində İctimai TV və İdman Azərbaycan TV-də olimpiadanın nəticələri və Azərbaycan idmançılarının çıxışları barədə icmal proqramlar verilirdi.

Azərbaycan Prezidenti İlham Əliyevin 18 iyul 2016-cı il tarixli Sərəncamına əsasən XXXI Yay Olimpiya Oyunlarında medal qazanan Azərbaycan idmançıları və onların məşqçiləri üçün pul mükafatının müəyyən edildi. Sərəncama əsasən Olimpiya Oyunlarında qızıl medal qazanan idmançıya 400 min ₼ (onun məşqçisinə 200 min ₼), gümüş medal qazanan idmançıya 200 min ₼ (onun məşqçisinə 100 min ₼), bürünc medal qazanan idmançıya 100 min ₼ (onun məşqçisinə isə 50 min ₼) məbləğində pul mükafatı müəyyən edildi.

Olimpiadadan sonra Azərbaycan Milli Olimpiya Komitəsinin Prezidenti İlham Əliyevin 1 sentyabr 2016-cı il tarixli Sərəncamına əsasən isə XXXI Yay Olimpiya Oyunlarında medal qazanan Azərbaycan idmançıları və onların məşqçiləri üçün pul mükafatının müəyyən edildi. Sərəncama əsasən Olimpiya Oyunlarında qızıl medal qazanan idmançıya 200 min ₼ (onun məşqçisinə 100 min ₼), gümüş medal qazanan idmançıya 100 min ₼ (onun məşqçisinə 50 min ₼), bürünc medal qazanan idmançıya 50 min ₼ (onun məşqçisinə isə 25 min ₼) məbləğində pul mükafatı müəyyən edildi.

Azərbaycan bu göstəricidə bir sıra dövlətləri geridə qoydu. Qızıl medala görə idmançılara Belarus (150 000 $), Rusiya (~60 000 $), Çin və Fransa (50 000 $), Polşa (38 000 $), Birləşmiş Ştatlar isə (25 000 $) pul mükafatı müəyyən elədi.

2016-cı il iyulun 18-də XXXI Yay Olimpiya Oyunlarında mübarizə aparacaq Azərbaycan Milli Olimpiya Komandasının rəsmi yolasalma mərasimi baş tutdu. Heydər Əliyev Mərkəzində baş tutan mərasimə Azərbaycan Prezidenti İlham Əliyev, gənclər və idman naziri Azad Rəhimov qatıldı.

Mərasimin əvvəlində Azərbaycanın Dövlət himni səsləndirildi. Sonra dövlət başçısı İlham Əliyev nitqlə çıxış elədi. İlham Əliyev idmançılara qələbələr və uğurlar arzuladı.

Daha sonra gənclər və idman naziri Azad Rəhimov nitqlə çıxış elədi və Azərbaycanın son beş Olimpiya Oyunlarında qazandığı nəticələr barədə qısa məlumat verdi.

Ardınca isə yunan-roma güləşi üzrə Azərbaycan yığmasının məşqçisi Akif Əliyev çıxış elədi və idmançılara yaradılan şəraitə görə Azərbaycan Milli Olimpiya Komitəsinin Prezidentinə minnətdarlığını bildirdi.

Daha sonra Azərbaycan Milli Paralimpiya Komandasının üzvü İlham Zəkiyev çıxış elədi və son illərdə Azərbaycanın Paralimpiya Oyunlarında ciddi uğurlar qazandığını bildirdi və Rio-de-Janeyro Olimpiadasında da uğur qazanacaqlarına söz verdi.

Tədbirin sonunda isə Azərbaycan Milli Olimpiya Komandasının üzvü, yunan-roma güləşi üzrə Dünya Çempionatının qalibi Rəsul Çunayev idmançılar adından olimpiya andının mətnini oxudu. Rəsul Çunayev Azərbaycanın bayrağının qaldırılması, dövlət himnimizin səsləndirilməsi naminə sona qədər əzmlə mübarizə aparacağımıza and içdi. Sonda idmançılar Azərbaycanın dövlət bayrağını öpdülər.

Azərbaycan XXXI Yay Olimpiya Oyunlarında 17 idman növü üzrə 56 idmançı ilə təmsil olundu.^[1] Bu Azərbaycanın Olimpiya Oyunlarında idmançı sayının artım tempinin davamı idi — Azərbaycanı 1996-cı il Atlanta Olimpiadasında 23 idmançı, 2000-ci il Sidney Olimpiadasında 31 idmançı, 2004-cü il Afina Olimpiadasında 37 idmançı, 2008-ci il Pekin Olimpiadasında 44 idmançı, 2012-ci il London Olimpiadasında isə 53 idmançı təmsil eləmişdi.

Komandanın heyətində 53 idmançıdan 14 nəfəri qadın idi. Dörd il əvvəl baş tutan olimpiada da Azərbaycanı 14 qadın idmançı təmsil eləmişdi.

Azərbaycan Olimpiya Oyunlarında birinci dəfə oxatma, kanoe slalom, trek velosipedi və triatlon turnirlərində təmsil olundu.

Komandanın heyətində 56 idmançıdan 32 nəfəri Olimpiya Oyunlarının debütantı idi. Olimpiada təcrübəsi olan 34 idmançıdan doqquz nəfəri isə bundan əvvəl turnirdə medallara da sahib olmuşdu — son olimpiadanın qalibləri Toğrul Əsgərov və Şərif Şərifov (hamısı sərbəst güləş), gümüş medalçıları Rövşən Bayramov (yunan-roma güləşi) və Mariya Stadnik (qadın güləşi), bürünc medalçıları Yuliya Ratkeviç (qadın güləşi), Xetaq Qazyumov (sərbəst güləş), Teymur Məmmədov (boks) və Məhəmmədrəsul Məcidov (boks), həmçinin 2008-ci il olimpiadasında Ukrayna bayrağı altında qızıl medala sahib olan İnna Osipenko-Radomska (kanoe sprint).

Komandanın ən yaşı üzvü 33 yaşlı kanoeçi İnna Osipenko-Radomska, ən gənc üzvü isə 14 yaşlı üzgüçü Fatimə Alkərəmova idi.

XXXI Yay Olimpiya Oyunlarının açılış mərasimində Azərbaycan Milli Olimpiya Komandasının bayrağdarı 2012-ci London Olimpiadasının bürünc medalçısı Teymur Məmmədov oldu. Bağlanış mərasimində isə Azərbaycan bayrağını olimpiadanı bürünc medalla başa vuran sərbəst güləşi Hacı Əliyev apardı.

  Əsas məqalə: Akademik avarçəkmə 2016 Yay Olimpiya Oyunlarında

• Q — növbəti mərhələyə adladı

Rio-de-Janeyro Olimpiadasında bu idman növü üzrə turnirlər 6–12 avqustda baş tutdu. Azərbaycanı bu idman növü üzrə Aleksandr Aleksandrov və Boris Yotov dueti təmsil elədi.^[1][2][3]

Kişilərin turnirində çıxış edən Aleksandr Aleksandrov və Boris Yotov dueti avqustun 6-da mübarizə apardı.^[4] Təsnifat mərhələsinin A qrupunda çıxış edən Aleksandr Aleksandrov və Boris Yotov dueti 6:40.52 dəqiqə nəticə göstərdi.^[4] Bu nəticələrə əsasən Aleksandr Aleksandrov və Boris Yotov dueti beş idmançı sırasında sadəcə Yeni Zelandiya nümayəndələrindən geri qaldı olimpiadanın yarım-final mərhələsinə adladı.^[4] Bu mərhələ avqustun 9-də baş tutdu.^[4] Yarım-final mərhələsinin B qrupunda çıxış edən Aleksandr Aleksandrov və Boris Yotov dueti uğursuz çıxış elədi və 6:36.48 dəqiqə nəticə göstərdi.^[4] Bu nəticələrə əsasən Aleksandr Aleksandrov və Boris Yotov dueti altı idmançı sırasında sonuncu — altıncı pillənin sahibi oldu və olimpiadanın final mərhələsinə vəsiqə qazana bilmədi.^[4] Avqustun 11-də baş tutan təsəlliverici B finalında isə 7:24.02 dəqiqə nəticə göstərən Aleksandr Aleksandrov və Boris Yotov dueti Rio-de-Janeyro Olimpiadasını 12-ci pillədə başa vurdu.^[4]

  Əsas məqalə: Atıcılıq 2016 Yay Olimpiya Oyunlarında

• Q — növbəti mərhələyə adladı

Rio-de-Janeyro Olimpiadasında atıcılıq idman növü üzrə turnirlər 6–14 avqustda baş tutdu. Azərbaycanı bu idman növü üzrə Ruslan Lunyov təmsil elədi.^[1][5] Ruslan Lunyov Beynəlxalq Güllə Atıcılığı Federasiyası (ISSF) tərəfindən verilən lisenziyalara əsasən olimpiada da mübarizə apardı.

Avqustun 6-da Ruslan Lunyov əvvəl 10 metr məsafəyə hava tapançasından ilə atəşaçma turnirinin təsnifat mərhələsində mübarizə apardı.^[6] 48 idmançının mübarizə apardığı təsnifat mərhələsində Ruslan Lunyov 600 xaldan 577-ini toplamağı bacardı və nəticədə mərhələni 15-ci pillədə başa vuraraq Rio-de-Janeyro Olimpiadasında mübarizəsini dayandırdı.^[6]

Daha sonra isə Ruslan Lunyov 25 metr məsafəyə tapançadan atəşaçma turnirində çıxış elədi.^[7] 26 idmançının mübarizə apardığı təsnifat mərhələsində 600 xaldan 575-ini toplamağı bacaran Ruslan Lunyov nəticədə mərhələni 15-ci pillədə başa vurdu.^[7] Bu turnirdə də Ruslan Lunyov final mərhələsinə vəsiqə qazana bilmədi və Rio-de-Janeyro Olimpiadasında uğursuz çıxış elədi.^[7]

  Əsas məqalə: Bədii gimnastika 2016 Yay Olimpiya Oyunlarında

• Q — növbəti mərhələyə adladı

Rio-de-Janeyro Olimpiadasında bədii gimnastların idman növü üzrə turnirlər 18–22 avqustda baş tutdu. Azərbaycanı bu idman növü üzrə fərdi turnirdə Marina Durunda təmsil elədi.^[1] Marina Durunda 2015-ci ildə Almaniyada baş tutan Dünya Çempionatının nəticələrinə əsasən olimpiya lisenziyasına sahib oldu. Marina Durunda Avropa Çempionatının bürünc, Avropa Oyunlarının isə gümüş medalçısı idi.^[8]

Avqustun 19-da Rio-de-Janeyro Olimpiadasının fərdi turnirində çıxış edən Marina Durunda təsnifat mərhələsində mübarizə apardı.^[9] Marina Durunda topla turnirdə 17.466 bal topladı və 13-cü pillədə qərarlaşdı.^[9] Halqa ilə turnirdə də Marina Durunda uğursuz çıxış elədi və 17.466 balla 12-ci pillənin sahibi oldu.^[9] Daha sonra Marina Durunda gürzlərlə turnirdə 17.682 bal topladı və 8-ci pillənin sahibi oldu.^[9] Lentlə turnirdə də Marina Durunda uğurla çıxış elədi və nəticədə 17.734 balla yeddinci pillənin sahibi oldu.^[9] Bununla da ümumi nəticədə Marina Durunda təsnifat mərhələsini 70.348 balla 26 idmançı sırasında 8-ci pillədə başa vurdu və olimpiadanın final mərhələsinə vəsiqə qazandı.^[9]

Avqustun 20-də isə Rio-de-Janeyro Olimpiadasının final mərhələsi baş tutdu.^[9] Marina Durunda əvvəl topa turnirdə çıxış elədi.^[9] Nəticədə Marina Durunda 16.950 balla turniri onuncu pillədə başa vurdu.^[9] Daha sonra Marina Durunda halqa ilə turnirdə mübarizə apardı və 17.542 balla doqquzuncu pillənin sahibi oldu.^[9] Gürzlərlə turnirdə Marina Durunda 17.716 balla altıncı pillədə qərarlaşdı.^[9] Sonda Marina Durunda lentlə turnirdə çıxış elədi.^[9] Bu turniri Marina Durunda 17.542 balla altıncı pillədə başa vurdu.^[9] Ümumi nəticədə isə Marina Durunda 69.750 balla Rio-de-Janeyro Olimpiadasını doqquzuncu pillədə başa vurdu.^[9]

  Əsas məqalə: Boks 2016 Yay Olimpiya Oyunlarında

• Qəl. — qalib gəldi
• Məğ. — məğlub oldu

Rio-de-Janeyro Olimpiadasında bu idman növü üzrə turnirlər 6–21 avqustda baş tutdu. Azərbaycanı bu idman növü üzrə 11 idmançı təmsil elədi.^[1] Kişilər turnirində Azərbaycan yığması tam heyətlə — 10 idmançı ilə mübarizə apardı. Komandanın üzvlərindən Albert Səlimov WSB göstəricilərinə, Elvin Məmişzadə və Pərviz Bağırov 2015-ci ilin sentyabrında baş tutan Dünya Çempionatının, Cavid Çələbiyev, Lorenso Sotomayor, Abdulqədir Abdullayev, Məhəmmədrəsul Məcidov və Yana Alekseyeva 2016-cı ilin aprelində baş tutan Avropa Olimpiya Təsnifat Turnirinin, Rüfət Hüseynov, Kamran Şahsuvarlı və Teymur Məmmədov isə 2016-cı ilin iyulunda baş tutan Dünya Olimpiya Təsnifat Turnirinin nəticələrinə əsasən olimpiya lisenziyasına sahib oldu. Kişilərdən ibarət Azərbaycan yığması olimpiada da tam heyətlə təmsil olunan beş yığmadan biri idi.

−49 Kq. turnirində çıxış edən Rüfət Hüseynov Rio-de-Janeyro Olimpiadasında avqustun 6-da mübarizə apardı.^[10] Rüfət Hüseynov 2015-ci il Avropa Çempionatının bürünc medalçısı idi. Olimpiadanın 1/16 final mərhələsində onun rəqibi Namibiya idmançısı Matias Hamunyela oldu. Görüşün birinci raundunda Rüfət Hüseynov qalib gəlsə də, növbəti raundlarda rəqibinə məğlub oldu. Nəticədə Rüfət Hüseynov görüşü 0:3 hesabı ilə məğlub başa vurdu və Rio-de-Janeyro Olimpiadasında mübarizəsini dayandırdı.

−52 Kq. turnirində Azərbaycanı Elvin Məmişzadə təmsil elədi.^[11] Elvin Məmişzadə 2015-ci ildə Dünya Çempionatının və Avropa Oyunlarının qalibi olmuşdu və Azərbaycanın olimpiada da əsas medal ümidi hesab olunurdu. Təsnifat mərhələsindən azad olan Elvin Məmişzadə turnirin 1/8 final mərhələsində Qazaxıstan nümayəndəsi Oljas Sattibayev ilə üz-üzə gəldi. Avqustun 15-də baş tutan görüşdə Elvin Məmişzadə rəqibi üzərində 3:0 hesabı ilə qələbə qazandı və olimpiadanın 1/4 final mərhələsinə adladı. Yarım-finala gedən yolda onun rəqibi Özbəkistan nümayəndəsi Şahobidin Zoirov oldu. Avqustun 17-də baş tutan görüşdə son Elvin Məmişzadə rəqibinə 0:3 hesabı ilə məğlub oldu. Bununla da Elvin Məmişzadə medalın bir addımlığında mübarizəsini dayandırdı və Rio-de-Janeyro Olimpiadasını beşinci pillədə başa vurdu.

−56 Kq. turnirində çıxış edən Cavid Çələbiyev isə Rio-de-Janeyro Olimpiadasında avqustun 11-də mübarizə apardı.^[12] Cavid Çələbiyev 2013-cü il Dünya Çempionatının qalibi idi. Olimpiadanın 1/16 final mərhələsində onun rəqibi Qazaxıstan idmançısı Kayrat Yerəliyev oldu. Görüşün birinci raundunda Cavid Çələbiyev qalib gəlsə də, növbəti raundlarda rəqibinə məğlub oldu. Nəticədə Cavid Çələbiyev görüşü 0:3 hesabı ilə məğlub başa vurdu və Rio-de-Janeyro Olimpiadasında mübarizəsini dayandırdı.

−60 Kq. turnirində Azərbaycanı Albert Səlimov təmsil elədi.^[13] Albert Səlimov son Dünya Çempionatının finalçısı və Avropa Oyunlarının qalibi idi. Təsnifat mərhələsindən azad olan Albert Səlimov olimpiadanın 1/8 final mərhələsində İrlandiya nümayəndəsi Devid Coyze ilə üz-üzə gəldi. Avqustun 9-da baş tutan görüşdə Albert Səlimov rəqibi üzərində 3:0 hesabı ilə inamlı qələbə qazandı və turnirin 1/4 final mərhələsinə vəsiqə qazandı. Yarım-finala gedən yolda onun rəqibi Fransa nümayəndəsi Sofian Umiha oldu. Albert Səlimov həmin rəqibinə 2015-ci il ərzində həm Avropa Oyunlarında, həm də Dünya Çempionatında qalib gəlmişdi. Bu səfər də görüşün favoriti Albert Səlimov hesab olunurdu. Avqustun 12-də baş tutan görüşdə Albert Səlimov gözlənilmədən rəqibinə 0:3 hesabı ilə məğlub oldu. Medalın bir addımlığında mübarizəsini dayandıran Albert Səlimov nəticədə Rio-de-Janeyro Olimpiadasını beşinci pillədə başa vurdu.

−64 Kq. turnirində Azərbaycanı Lorenso Sotomayor təmsil elədi.^[14] Lorenso Sotomayor 2015-ci ildə Avropa Oyunları qalibi olmuşdu. Lorenso Sotomayor Rio-de-Janeyro Olimpiadasında "aşağı" yarım-qrupunda mübarizə apardı. Bu yarım-qrupun favoriti 2012-ci il London Olimpiadasının bürünc medalçısı olan Kuba nümayəndəsi Yasniel Toledo idi. Lorenso Sotomayor 1/16 final mərhələsi çərçivəsində baş tutan birinci görüşdə Ukrayna nümayəndəsi Volodimir Matveyçuh ilə üz-üzə gəldi.^[15] Avqustun 11-də baş tutan görüşdə Lorenso Sotomayor rəqibi üzərində 3:0 hesabı ilə qələbə qazandı və turnirin 1/8 final mərhələsinə adladı.^[16][17][18] Bu mərhələdə onun rəqibi Fransa təmsilçisi Hassan Amzile oldu. Lorenso Sotomayor Hassan Amzileni 2015-ci ildə Avropa Oyunları zamanı məğlub eləmişdi. Bu səfər də görüşün favoriti Lorenso Sotomayor idi. Avqustun 14-də baş tutan görüşdə Lorenso Sotomayor rəqibi üzərində inamlı qələbə qazandı — 3:0.^[19][20] Bununla da o, turnirin 1/4 final mərhələsinə adladı.^[21] Görüşdən sonra Lorenso Sotomayor rinqdə hərbi salam verdi.^[22] 1/4 final mərhələsində Lorenso Sotomayorun rəqibi Kuba nümayəndəsi Yasniel Toledo oldu. Prinsipial əhəmiyyətə sahib olan görüş avqustun 16-da baş tutdu. Gərgin idman mübarizəsi şəraitində baş tutan görüşdə Lorenso Sotomayor Yasniel Toledoya 3:0 hesabı ilə qalib gəldi və Rio-de-Janeyro Olimpiadasının yarım-final mərhələsinə adladı.^[23] Bununla o, ən azından bürünc medalı təmin elədi.^[24] Yarım-final mərhələsində Lorenso Sotomayorun rəqibi Almaniya təmsilçisi Artyom Arutyunyan oldu.^[25] Avqustun 19-da baş tutan görüş Azərbaycan idmanının tarixinə düşdü. Lorenso Sotomayor rəqibi üzərində 3:0 hesabı ilə qələbə qazanaraq olimpiadanın final görüşünə vəsiqə qazandı. Bununla da o, Olimpiya Oyunlarının final görüşündə rinqə çıxacaq birinci azərbaycanlı idmançı olaraq tarixə düşdü.^[26][27] Həlledici görüşdə Lorenso Sotomayorun rəqibi Özbəkistan nümayəndəsi Fazliddin Qaibnəzərov oldu. Görüşdən əvvəl o, müsahibəsində bunları bildirdi: "Rəqibi diqqətlə analiz eləmişəm. Final görüşündə qalib gəlib, Azərbaycana qızıl medal qazandıracağıma söz verirəm".^[28] Rio-de-Janeyro Olimpiadasının final görüşün avqustun 21-də baş tutdu. Final görüşünün birinci raundunda üstün tərəf Sotomayor oldu — (10:9, 10:9, 10:9). Görüşün növbəti raundun da Qaibnəzərov zərbələrinin sayını artırdı. Nəticədə həmin raundda üstün tərəf Qaibnəzərov oldu — (10:9, 10:9, 9:10). Üçüncü raund gərgin idman mübarizəsi şəraitində baş tutdu. Raund ərzində zərbələrin sayında üstün tərəf Lorenso Sotomayor idi. Referilərin final fitindən sonra həm Sotomayor, həm də Qaibnəzərov özünü qalib elan elədi. Raund ərzində zərbələrin sayının hesablanması bitəndən sonra, final görüşünün ümumi nəticəsi referiyə təqdim olundu. Görüşün nəticəsində referilər Fazliddin Qaibnəzərovu qalib elan elədi. Referilərin nəticələrinə əsasən Fazliddin Qaibnəzərov üçüncü raundda 2:1 (10:9, 10:9, 9:10) hesabı ilə qalib gəldi. Bununla da Lorenso Sotomayor XXXI Yay Olimpiya Oyunlarının gümüş medalına sahib oldu.^[29][30][31]

Lorenso Sotomayor və Fazliddin Qaibnəzərov arasında baş tutan final görüşündən sonra referilərin qərarları ilə bağlı ittihamlar səsləndi. Bir sıra idman mütəxəssisləri Lorenso Sotomayorun rəqibindən üstün olduğunu bildirdi.^[32][33] Azərbaycan Milli Olimpiya Komitəsinin (MOK) Baş Katibi, Milli Məclisin deputatı Ağacan Abıyev müsahibəsində görüşün idarə edən referiləri "satqınçılığda" ittiham elədi: "Lorenso Sotomayor raundlar ərzində rəqibindən üstün idi. Görüşün 2-ci raundunda rəqib Lorenso Sotomayoru nokdauna salmamışdı. Fazliddin Qaibnəzərovun qalib elan edilməsi üçün rinq referisinə tapşırıq verilmişdi. Ona görə o, nokdaunu qeyd almaq istəyirdi. Mən harada nokdaun var, harada yoxdur, onu ayıra bilirəm. Bu sadəcə adi zərbə idi. Sotomayora qarşı ədalətsiz qərar verildi. Onun qələbəsini əlindən aldılar".^[34] Azərbaycan Prezidenti İlham Əliyev sentyabrın 2-də Olimpiada da uğur qazanan idmançılara və məşqçilərə dövlət təltiflərini təqdim edən zaman Lorenso Sotomayor haqqında bunları dedi: "Lorenso Sotomayor Olimpiya çempionudur. Onun qələbəsi referilər tərəfindən oğurlanıb." Lorenso Sotomayor özü isə final görüşü haqqında bunları bildirdi: "Düşünürəm, final görüşünün qalibi oldum. Həlledici raunddan sonra qalib gəldiyimə əmin idim, amma referilər qərəzli qərar verdilər. Mən Azərbaycanı sevirəm. Azərbaycan mənim evimdir. Azərbaycan üçün qızıl medal qazanmaq istəyirdim, amma referilər mənə qarşı qərəzli qərar verdilər".^[35]

−69 Kq. turnirində çıxış edən Pərviz Bağırov Rio-de-Janeyro Olimpiadasında avqustun 11-də mübarizə apardı.^[36] Pərviz Bağırov 2015-ci il ərzində Dünya Çempionatının bürünc medalına, Avropa Oyunlarının isə qızıl medalına sahib olmuşdu. Təsnifat mərhələsindən azad olan Pərviz Bağırov turnirin 1/8 final mərhələsində Fransa nümayəndəsi Süleyman Sissoxo ilə üz-üzə gəldi. Görüşün nəticəsinə əsasən Pərviz Bağırov rəqibinə 0:3 hesabı ilə məğlub oldu və Rio-de-Janeyro Olimpiadasında mübarizəsini başa vurdu.

−75 Kq. turnirində isə Azərbaycanı Kamran Şahsuvarlı təmsil elədi.^[37] Komanda da Dünya və Avropa Çempionatlarında uğuru olmayan yeganə idmançı olan Kamran Şahsuvarlı nə olimpiadanın favoriti, nə də Azərbaycanın medal ümidi hesab olunmurdu. Kamran Şahsuvarlının birinci görüşü avqustun 8-də oldu. 1/16 final mərhələsində onun rəqibi Çin nümayəndəsi Jao Minqqanq oldu.^[38] Həmin görüşdə Kamran Şahsuvarlı rəqibi üzərində 3:0 hesabı ilə qələbə qazandı və olimpiadanın 1/8 final mərhələsinə adladı.^[39][40][41] Bu mərhələdə onun rəqibi 2010-cu il Avropa Çempionatının qalibi olan Rusiya nümayəndəsi Artyom Çebotarev oldu. Avqustun 12-də baş tutan görüşdə Kamran Şahsuvarlı rəqibinə 2:0 hesabı ilə qalib gəldi və turnirin 1/4 final mərhələsinə adladı.^[42] Bu mərhələdə isə onun rəqibi Qazaxıstan nümayəndəsi Yanibəy Alimxanulu oldu.^[43] Yanibəy Alimxanulu Asiya Çempionatının, Asiya Oyunlarının və Dünya Çempionatının qalibi olan təcrübəli idmançı idi. Kamran Şahsuvarlı görüşdən əvvəl müsahibəsində bunları bildirdi: Mən Qazaxıstanda çıxış edən Yanibəy Alimxanuluya məğlub olmuşdum. İndi isə ona qalib gəlməyi qarşıma məqsəd qoymuşam.^[44] Avqustun 15-də gərgin idman mübarizəsi şəraitində baş tutan görüşdə Kamran Şahsuvarlı rəqibi üzərində 2:1 hesabı ilə qələbə qazandı və olimpiadanın yarım-final mərhələsinə adladı. Bununla da Kamran Şahsuvarlı olimpiadanın bürünc medalını təmin elədi.^[45][46] Görüşdən sonra Kamran Şahsuvarlı müsahibəsində bunları bildirdi: Mən turnirin favoriti deyildim. Məndən medal gözləyən yox idi. Üstümdə heç bir təyziq yox idi. Məhz bu amillər medala sahib olmaqda yardım elədi.^[47] Finala gedən yolda onun rəqibi 2015-ci il Dünya Çempionatının qalibi olan Kuba nümayəndəsi Arlen Lopez oldu.^[48] Avqustun 18-də baş tutan görüşdə təcrübəli rəqəbinə 0:3 hesabı ilə məğlub olan Kamran Şahsuvarlı XXXI Yay Olimpiya Oyunlarını bürünc medalla başa vurdu.^{[49][50][51][52]} Görüşdən sonra Kamran Şahsuvarlı müsahibəsində məğlubiyyətini şərh elədi: Rəqibim həddən artıq güclü və təcrübəli idi. Ona yaxınlaşa bilmədim, nəticədə də özüm zərbələr buraxdım.^[53]

−81 Kq. turnirində çıxış edən Teymur Məmmədov Azərbaycanın əsas medal ümidi hesab olunurdu.^[54] Teymur Məmmədov dörd il əvvəl olimpiadanın bürünc medalını əldə eləmişdi, 2015-ci ildə isə Avropa Oyunlarının qalibi olmuşdu. Teymur Məmmədov ideal formada olmasa da, medala iddialı idi.^[55][56] Rio-de-Janeyro Olimpiadasının avqustun 5-də baş tutan açılış mərasimində Teymur Məmmədov Azərbaycan bayrağını apardı.^{[57][58][59][60][61]} Turnirin təsnifat mərhələsində Teymur Məmmədovun rəqibi Ukrayna nümayəndəsi Denis Soleno oldu.^[38] Avqustun 7-də baş tuta görüşdə Teymur Məmmədov rəqibi üzərində 3:0 hesabı ilə qələbə qazandı və Rio-de-Janeyro Olimpiadasının 1/8 final mərhələsinə adladı.^{[62][63][64][65]} Görüşdən sonra müsahibəsində Teymur Məmmədov rəqibin zəif idmançı olmadığını, qələbənin asan əldə edilmədiyini bildirdi.^[66] Rio-de-Janeyro Olimpiadasının 1/8 final mərhələsində onun rəqibi Niderland nümayəndəsi Peter Müllenberq oldu.^[67] Teymur Məmmədov ötən il baş tutan Avropa Oyunları zamanı Peter Müllenberqa qalib gəlmişdi. Avqustun 12-də baş tutan görüşdə də Teymur Məmmədov rəqibi üzərində 3:0 hesabı ilə qələbə qazandı və Rio-de-Janeyro Olimpiadasının 1/4 final mərhələsinə adladı.^[68][69][70] Yarım-final mərhələsinə gedən yolda onun rəqibi Qazaxıstan nümayəndəsi Adilbəy Niyazimbəyov idi. Adilbəy Niyazimbəyov dörd il əvvəl London Olimpiadasının finalçısı olmuşdu. Avqustun 15-də baş tutan görüş gərgin idman mübarizəsi şəraitində baş tutdu. Nəticədə Teymur Məmmədov rəqibinə 0:3 hesabı ilə məğlub oldu və Rio-de-Janeyro Olimpiadasını beşinci pillədə başa vurdu.^{[71][72][73][74]} Azərbaycan yığmasının məşqçisi Nəriman Abdullayev görüşdən sonra müsahibəsində Teymur Məmmədovun məğlubiyyətini rəqibin təcrübəli olması ilə əlaqələndirdi.^[75] Teymur Məmmədov isə müsahibəsində görüşün əvvəlindən düzgün döyüş üslubu seçmədiyinə görə məğlub olduğunu bildirdi.^[76]

−91 Kq. turnirində Azərbaycanı Abdulqədir Abdullayev təmsil elədi.^[77] Abdulqədir Abdullayev 2015-ci ildə Qətərdə Dünya Çempionatının bürünc, Azərbaycanda Avropa Oyunlarının isə qızıl medalına sahib olmuşdu. Təsnifat mərhələsindən azad olan Abdulqədir Abdullayev olimpiadanın 1/8 final mərhələsində Fransa Pol-Omba Bionqolo ilə üz-üzə gəldi. Həmin görüşün üçüncü raundunda Abdulqədir Abdullayev rəqibi üzərində vaxtından əvvəl təmiz qələbə qazandı və turnirin 1/4 final mərhələsinə adladı. Bu mərhələdə onun rəqibi Özbəkistan nümayəndəsi Rüstəm Tulaqanov oldu. Görüşün birinci raundunda Abdulqədir Abdullayev rəqibinə qalib gəlsə də, növbəti raundlarda məğlub oldu. Nəticədə görüşü məğlub başa vuran Abdulqədir Abdullayev medalın bir addımlığında mübarizəsini dayandırdı və Rio-de-Janeyro Olimpiadasını beşinci pillədə başa vurdu.

+91 Kq. turnirində isə Azərbaycanı Məhəmmədrəsul Məcidov təmsil elədi.^[78] Dörd il əvvəl Londonda olimpiadanın bürünc medalına sahib olan Məhəmmədrəsul Məcidov 2011 və 2013-cü illərdə Dünya Çempionatlarının, 2013-cü ildə isə Avropa Çempionatının qalibi olmuşdu. Məhəmmədrəsul Məcidov bu səfər qələbəyə iddialı idi.^[79] 18 idmançının mübarizə apardığı turnirdə o, avqustun 9-da rinqə çıxdı.^[80] Təsnifat mərhələsi çərçivəsində baş tutan birinci görüşdə onun rəqibi Mərakeş nümayəndəsi Məhəmməd Arcau oldu.^[81] Həmin görüşdə Məhəmmədrəsul Məcidov rəqibindən üstün oldu və ümumi nəticədə 3:0 hesabı ilə qələbə qazanaraq Rio-de-Janeyro Olimpiadasının 1/8 final mərhələsinə adladı.^[82][83] Bu mərhələdə onun rəqibi Qazaxıstan nümayəndəsi İvan Dıçxo oldu. Məhəmmədrəsul Məcidov bundan əvvəl İvan Dıçxonu 2 dəfə — 2011-ci ildə Dünya Çempionatının yarım-final mərhələsində və 2013-cü ildə Dünya Çempionatının final görüşündə məğlub eləmişdi. Görüşdən əvvəl Məcidov müsahibəsində Dıçxo haqqında bunları dedi: "Qazaxıstandan olan İvan Dıçxo mənim əvəzli rəqiblərimdən biridir. Çox güclü rəqibdir. Onunla olan bütün görüşlərim ağır olub. Mən onunla dostluq edirəm, amma rinqdə dostluq unudulur".^[84] İdman mütəxəssislərinin rəyinə əsasən bu qarşılaşma finala bərabər görüş hesab olunurdu. Məhəmmədrəsul Məcidov və İvan Dıçxo arasında görüş avqustun 13-də baş tutdu. Görüşün birinci raundu gərgin idman mübarizəsi şəraitində baş tutdu. Nəticədə referilər rəyinə əsasən raundun qalibi İvan Dıçxo oldu. Göüşün növbəti raundunda isə Məhəmmədrəsul Məcidov zərbələrinin sayını artırsa da, raundun gedişində gözündən zərbə aldı. Tibb personalının müdaxiləsindən onun görüşü davam eləməsinə razılıq verilmədi. Bu qərara Məcidov etiraz eləsə də, tibb personalı görüşün davam edəcəyi halda onun görmə qabiliyyətində problemlərin ciddi olacağını bildirdi. Referilər görüşün davam eləməsinə icazə vermədi və İvan Dıçxo görüşün qalibi elan edildi. Məhəmmədrəsul Məcidov isə Rio-de-Janeyro Olimpiadasında mübarizəsini dayandırdı.^[85][86] Bu onun sonuncu Olimpiadası oldu.^[87][88]

Qadınların turnirində isə Azərbaycanı bir idmançı təmsil elədi — 2015-ci il Avropa Oyunlarının bürünc, 2014-cü il Dünya Çempionatının isə gümüş medalçısı Yana Alekseyeva.^[89] −50 Kq. turnirində çıxış edən Yana Alekseyeva olimpiadanın təsnifat mərhələsindən azad idi. Turnirin 1/4 final mərhələsində Yana Alekseyevanın rəqibi Çin nümayəndəsi Yin Yuanhua oldu. Yin Yuanhua 2014-cü ildə Dünya Çempionatının bürünc medalçısı idi. Avqustun 15-də baş tutan görüşdə qalib gələn idmançı olimpiadanın bürünc medalını təmin edirdi. Gərgin idman mübarizəsi şəraitində baş tutan görüşdə Yana Alekseyeva rəqibinə 0:3 hesabı ilə məğlub oldu və Rio-de-Janeyro Olimpiadasını beşinci pillədə başa vurdu.

Rio-de-Janeyro Olimpiadasında 11 idmançı ilə mübarizə aparan Azərbaycanən rinq ustaları olimpiadanı bir gümüş və bir bürünc medalla başa vurdu.

  Əsas məqalə: Cüdo 2016 Yay Olimpiya Oyunlarında

• Qəl. — qalib gəldi
• Məğ. — məğlub oldu

Rio-de-Janeyro Olimpiadasında cüdo idman növü üzrə turnirlər 6–12 avqustda baş tutdu. Azərbaycanı bu idman növü üzrə altı cüdoçu təmsil elədi.^[1] Beynəlxalq Cüdo Federasiyası (IJF) olimpiya reytinq cədvəlinə əsasən cüdo üzrə Azərbaycan yığmasının altı üzvü olimpiya lisenziyasına sahib oldu.

Avqustun 6-da −60 Kq. turnirində çıxış edən Orxan Səfərov mübarizə apardı. Orxan Səfərov son Avropa Çempionatının finalçısı idi. Təsnifat mərhələsindən azad olan Orxan Səfərov olimpiadanın 1/16 final mərhələsində Peru nümayəndəsi Xuan Postiqos ilə üz-üzə gəldi. Həmin görüşdə Orxan Səfərov rəqibi üzərində ipponla qələbə qazandı və olimpiadanın 1/8 final mərhələsinə adladı. Bu mərhələdə onun rəqibi Qırğızıstan nümayəndəsi Orar Bestayev idi. Bu görüşdə də Orxan Səfərov rəqibi üzərində ipponla qələbə qazandı və olimpiadanın 1/4 final mərhələsinə adladı. Yarım-finala gedən yolda onun rəqibi Braziliya nümayəndəsi Felipe Kitadai oldu. Felipe Kitadai 2012-ci il London Olimpiadasının bürünc medalçısı idi. Titullu və təcrübəli rəqibi ilə görüşdə Orxan Səfərov ardıcıl üçüncü dəfə ipponla qələbə qazandı. Bununla da o, olimpiadanın yarım-final mərhələsinə adladı. Finala gedən yolda onun rəqibi Qazaxıstan nümayəndəsi Yeldos Smetov oldu. Rəqib 2015-ci ildə Astanada Dünya Çempionatının qalibi idi. Gərgin idman mübarizəsi şəraitində baş tutan görüşdə Orxan Səfərov görüşün sonuna 20 saniyə qala vaza-ari fəndi ilə hesabda geri düşdü və nəticədə rəqibinə məğlub oldu. Bürünc medal uğrunda görüşdə isə onun rəqibi Yaponiya nümayəndəsi Naohisa Tahato oldu. Rəqib 2013-cü ildə Budapeştdə Dünya Çempionatının qızıl medalına sahib olmuşdu. Gərgin idman mübarizəsi şəraitində baş tutan görüş bərabər səviyyədə idi. Nəticədə nə Orxan Səfərov, nə də Naohisa Tahato fənq tətbiq edə bilmədi. Amma Orxan Səfərovun hesabında şido cərimə balı olduğuna görə rəqib qalib elan edildi. Bununla da Orxan Səfərov Rio-de-Janeyro Olimpiadasını beşinci pillədə başa vurdu.

Avqustun 7-də −66 Kq. turnirində çıxış edən Nicat Şıxəlizadə mübarizə apardı. Nicat Şıxəlizadə 2003-cü il Dünya Çempionatının bürünc medalçısı idi. Təsnifat mərhələsindən azad olan Nicat Şıxəlizadə olimpiadanın 1/16 final mərhələsində İspaniya nümayəndəsi Suqoi Uriarte ilə üz-üzə gəldi. Rəqib 2010-cu il Avropa Çempionatının qalibi idi. Həmin görüşdə Nicat Şıxəlizadə rəqibinə vaza-ari balı hesabına qalib gəldi və turnirin 1/8 final mərhələsinə adladı. Bu mərhələdə isə onun rəqibi İtaliya nümayəndəsi Fabio Bazil oldu. Rəqib son Avropa Çempionatının bürünc medalçısı idi. Həmin görüşdə Nicat Şıxəlizadə gənc rəqibinə ipponla məğlub oldu və olimpiadada mübarizəsini başa vurdu. Turnirin qalibi isə məhz Fabio Bazil oldu.

−73 Kq. turnirində isə Azərbaycanı Rüstəm Orucov təmsil elədi. Apreldə Kazan şəhərində Avropa Çempionatının qalibi olan Rüstəm Orucov avqustun 8-də mübarizə apardı. Turnirin təsnifat mərhələsindən azad olan Rüstəm Orucov 1/16 final mərhələsində Qazaxıstan nümayəndəsi Didar Xəmzə ilə üz-üzə gəldi. Rəqib təcrübəsiz və titulsuz olsa da həmin görüşdə Rüstəm Orucov çətin qələbə qazandı. Gərgin idman mübarizəsi şəraitində baş tutan görüşdə nə Didar Xəmzə, nə də Rüstəm Orucov fənd tətbiq edə bilməsə də, şido cərimə ballarının hesabına Rüstəm Orucov qələbə qazandı və olimpiadanın 1/8 final mərhələsinə adladı. Bu mərhələdə onun rəqibi Avstraliya cüdoçusu Cey Bensted oldu. Həmin görüşdə Rüstəm Orucov rəqibi üzərində ipponla qələbə qazandı və olimpiadanın 1/4 final mərhələsinə adladı. Bu mərhələdə onun rəqibi Macarıstan nümayəndəsi Miloş Unqvari oldu. Rəqib üç dəfə Avropa Çempionatının qalibi, son olimpiadanın isə finalçısı idi. Həmin görüş gərgin idman mübarizəsi şəraitində baş tutdu. Nəticədə Rüstəm Orucov vaza-ari balının hesabına rəqibinə qalib gəldi. Bu minvalla da Rüstəm Orucov olimpiadanın yarım-final mərhələsinə adladı. Finala gedən yolda onun rəqibi İsrail nümayəndəsi Saqi Mui oldu. Rəqib 2015-ci il Avropa Çempionatının qalibi idi. Gərgin idman mübarizəsi şəraitində baş tutan görüşdə Rüstəm Orucov rəqibi üzərində çətin qələbə qazandı və olimpiadanın final görüşünə vəsiqə qazandı. Bununla da Rüstəm Orucov 8 ildən sonra olimpiadanın finalında mübarizə aparacaq birinci azərbaycanlı cüdoçu oldu. Sonuncu dəfə 2008-ci ildə Elnur Məmmədli olimpiadanın finalında çıxış eləmişdi. Həlledici görüşdə isə onun rəqibi Yaponiya nümayəndəsi Şoney Ono oldu. Rəqib dörd dəfə Dünya Çempionatının qızıl medalına sahib olan təcrübəli və titullu cüdoçu idi. Həmin görüşdə Rüstəm Orucov titullu rəqibinə üç dəqiqə tab gətirə bildi. Görüşün sonuna 1 dəqiqə 45 saniyə qala Rüstəm Orucov rəqibinə ippon fəndi ilə məğlub oldu. Bununla da Rüstəm Orucov olimpiadanı gümüş medalla başa vurdu.

Avqustun 10-da −90 Kq. turnirində çıxış edən Məmmədəli Mehdiyev mübarizə apardı. Təsnifat mərhələsindən azad olan Məmmədəli Mehdiyev olimpiadanın 1/16 final mərhələsində Rusiya nümayəndəsi Kiril Denisov ilə üz-üzə gəldi. Kiril Denisov 2013 və 2015-ci illərdə Avropa Çempionatının qalibi olmuşdu. Bərabər səviyyədə baş tutan görüşdə nə Məmmədəli Mehdiyev, nə də Kiril Denisov beş dəqiqə ərzində fənd tətbiq edə bilmədi. Şido cərimə ballarının sayı da bərabər olduğuna görə qızıl hissə baş tutdu. Bu hissədə Kiril Denisov daha fəal olsa da, görüşün növbəti dəqiqələrində Məmmədəli Mehdiyev rəqibi üzərində ipponla qələbə qazandı. Bununla da Məmmədəli Mehdiyev olimpiadanın 1/8 final mərhələsinə adladı. Bu mərhələdə onun rəqibi Braziliya cüdoçusu Tiaqo Kamilo oldu. Rəqib təcrübəli cüdoçu idi. 34 yaşlı Tiaqo Kamilov 2007-ci ildə Dünya Çempionatının qalibi, 2000-ci il Sidney Olimpiadasının isə finalçısı idi. Görüşün birinci dəqiqələrində rəqib irəlidə olsa da, növbəti dəqiqələrdə Məmmədəli Mehdiyev rəqibini osaecomi fəndinə saldı. Rəqibini 11 saniyə fənddə saxlamağı bacaran Məmmədəli Mehdiyev nəticədə vaza-ari balı ilə hesabda önə çıxdı. Növbəti dəqiqələrdə də Məmmədəli Mehdiyev müdafiə olundu və nəticədə rəqibi üzərində qələbə qazanaraq olimpiadanın 1/4 final mərhələsinə adladı. Yarım-finala gedən yolda onun rəqibi Cənubi Koreya nümayəndəsi Kvan Don-An oldu. Rəqib son Dünya Çempionatının qalibi idi. Həmin görüşün birinci dəqiqələrindən Məmmədəli Mehdiyev müdafiə olundu. Məhz buna görə Məmmədəli Mehdiyev dörd dəfə şido cərimə balı ilə cəzalandırıldı. Qaydalara əsasən isə dörd dəfə şido cərimə balı alan cüdoçu görüşü məğlub başa vurur. Bununla belə Məmmədəli Mehdiyev bürünc medal uğrunda görüşə vəsiqə verən təsəlliverici görüşdə çıxış elədi. Bu görüşdə onun rəqibi Monqolustan nümayəndəsi Lxaqvasürengiin Otqonbaatar oldu. Rəqib son Dünya Çempionatının bürünc medalçısı idi. Həmin görüşdə Məmmədəli Mehdiyev zəif təsir bağışladı və rəqibinə məğlub oldu. Bu minvalla da Məmmədəli Mehdiyev olimpiadanı yeddinci pillədə başa vurdu.

Avqustun 11-də 100 Kq. turnirində çıxış edən Elmar Qasımov mübarizə apardı. Təsnifat mərhələsindən azad olan Elmar Qasımov olimpiadanın 1/16 final mərhələsində Rusiya nümayəndəsi Tahir Xaybulayev ilə üz-üzə gəldi. Rəqib son olimpiya çempionu, həmçinin Dünya və Avropa Çempionatının qalibi idi. Titullu rəqibi ilə görüşdə Elmar Qasımov vaza-ari balı hesabına qələbə qazandı və olimpiadanın 1/8 final mərhələsinə adladı. Bu mərhələdə onun rəqibi Əlcəzair nümayəndəsi Lyes Buyasub oldu. Gərgin idman mübarizəsi şəraitində baş tutan görüşdə həm Elmar Qasımov, həm də Lyes Buyasub vaza-ari balına sahib olsa da, şido cərimə ballarına görə rəqib məğlub oldu. Elmar Qasımov isə qələbə qazanaraq olimpiadanın 1/4 final mərhələsinə adladı. Yarım-finala gedən yolda onun rəqibi Misir nümayəndəsi Ramazan Dərviş oldu. Həmin görüşdə Elmar Qasımov rəqibi üzərində asan qələbə qazandı. Görüşün cəmi 54-cü saniyəsində Elmar Qasımov rəqibinə ippon fəndi tətbiq elədi və rəqibi üzərində qələbə qazanaraq olimpiadanın yarım-final mərhələsinə adladı. Finala gedən yolda isə onun rəqibi Ukrayna nümayəndəsi Artyom Bloşeno oldu. Bu görüşdə də üstün tərəf Elmar Qasımov oldu. Görüşün 2-ci dəqiqəsinin ortalarında Elmar Qasımov rəqibinə ippon fəndi tətbiq elədi və rəqibi üzərində qələbə qazanaraq olimpiadanın final görüşünə vəsiqə qazandı.

Həlledici görüşdə onun rəqibi Çexiya nümayəndəsi Luhaş Krpale oldu. Rəqib Dünya və Avropa Çempionatlarının qalibi olan titullu idmançı idi. Həmin görüşdə Elmar Qasımov titullu rəqibinə qarşı müdafiə olundu. Məhz buna görə Elmar Qasımov görüşün sonlarında yoruldu və görüşün sonuna cəmi 24 saniyə qala ippon fəndi ilə rəqibinə məğlub oldu. Bununla da Elmar Qasımov olimpiadanı gümüş medalla başa vurdu. Təltifetmə mərasimi zamanı Elmar Qasımova xatirə hədiyyəsini dönəmin Azərbaycan Cüdo Federasiyası Prezidenti Rövnəq Abdullayev təqdim elədi.

Olimpiadanın cüdo turnirlərinin son günündə — avqustun 12-də +100 Kq. turnirində çıxış edən Uşanqi Kokauri mübarizə apardı. Uşanqi Kokauri olimpiadanın 1/16 final mərhələsində Latviya nümayəndəsi Arturs Nihiforenho ilə üz-üzə gəldi. Həmin görüşdə Uşanqi Kokauri rəqibindən üstün idi. Nəticədə Uşanqi Kokauri görüşün sonlarında rəqibinə qarşı osaecomi fəndi tətbiq elədi və rtəqibi üzərində ipponla qələbə qazandı. Bu minvalla da Uşanqi Kokauri olimpiadanın 1/8 final mərhələsinə adladı. Bu mərhələdə isə onun rəqibi Yaponiya nümayəndəsi Hisayoşi Harasava oldu. Həmin görüşdə Uşanqi Kokauri rəqibinə ipponla məğlub oldu və olimpiada da mübarizəsini başa vurdu.

Cüdo üzrə Azərbaycan yığması olimpiadanı 2 gümüş medalla başa vurdu. Bundan əvvəl cüdo üzrə Azərbaycan yığması olimpiada da 8 il əvvəl medala sahib olmuşdu. Həmin olimpiada da Azərbaycan cüdoçuları bir qızıl və bir bürünc medalla başa vurmuşdu turniri.

Olimpiadanın cüdo turnirinin medal sıralanmasında Azərbaycan yığması 12-ci pillədə qərarlaşdı.

  Əsas məqalə: Güləş 2016 Yay Olimpiya Oyunlarında

• Qəl. — qalib gəldi
• Məğ. — məğlub oldu

Rio-de-Janeyro Olimpiadasında güləş idman növü üzrə turnirlər 14–21 avqustda baş tutdu. Azərbaycanı bu idman növü üzrə 14 güləşi təmsil elədi.^[1] Sərbəst güləş turnirlərində Azərbaycan yığması tam heyətlə — altı idmançı ilə mübarizə apardı. Yunan-roma güləşi turnirlərində beş idmançı, qadın güləşi turnirlərində isə üç idmançı olimpiada da çıxış elədi. Komandanın üzvlərindən Rövşən Bayramov, Elvin Mürsəliyev, Saman Təhmasibi, Sabah Şəriəti, Toğrul Əsgərov, Məhəmmədhacı Xatiyev, Camaləddin Məhəmmədov, Mariya Stadnik, Anjela Doroqan və Yuliya Ratkeviç 2015-ci ilin sentyabrında baş tutan Dünya Çempionatının nəticələrinə əsasən olimpiya lisenziyalarına sahib oldular. 2016-cı ildə baş tutan Avropa Olimpiya Təsnifat Turnirində Cəbrayıl Həsənov, 1. Dünya Olimpiya Təsnifat Turnirində Mircəlal Həsənzadə, 2. Dünya Olimpiya Təsnifat Turnirində isə Rəsul Çunayev olimpiya lisenziyalarına sahib oldular.

Olimpiadadan əvvəl sərbəst güləş üzrə Azərbaycan yığmasının baş məşqçisi Saypulla Absaidov lisenziya sahiblərindən Mircəlal Həsənzadəni son Dünya Çempionatının qalibi Hacı Əliyevlə, Məhəmmədhacı Xatiyevi isə son olimpiya çempionu Şərif Şərifovla əvəzlədi. Qadın güləşçilərdən ibarət Azərbaycan yığmasının baş məşqçisi Semeon Şterev isə Anjela Doroqanı son Avropa Çempionatının qalibi Nataliya Sinişinlə əvəzlədi.

Yunan-roma güləşi üzrə Azərbaycan yığması olimpiada da beş idmançı ilə mübarizə apardı. Komandanın heyətinə 2008 və 2012-ci illərdə olimpiadalarının finalçısı olan Rövşən Bayramov, 2015-ci il Dünya Çempionatının qalibi Rəsul Çunayev, 2015-ci il Dünya Çempionatının bürünc medalçısı Saman Təhmasibi, 2015-ci il Avropa Oyunlarının qalibi Elvin Mürsəliyev və 2015-ci il Avropa Oyunlarının finalçısı Sabah Şəriəti cəlb edildi.

Avqustun 14-də yunan-roma güləşi turnirlərində çıxış edən Rövşən Bayramov və Elvin Mürsəliyev mübarizə apardı. 2008 və 2012-ci illərdə olimpiadaların final görüşlərində məğlub olan Rövşən Bayramov bu səfər Rio-de-Janeyro Olimpiadasında qızıl medala iddialı idi.^[90] Rövşən Bayramov 1/8 final mərhələsi çərçivəsində baş tutan birinci görüşdə Venesuela nümayəndəsi Raiber Rodrigez ilə üz-üzə gəldi.^[90] Həmin görüşdə Rövşən Bayramov rəqibi üzərində 8:0 hesabı ilə inamlı qələbə qazandı və olimpiadanın 1/4 final mərhələsinə adladı.^[90] Bu mərhələdə onun rəqibi Birləşmiş Ştatlar təmsilçisi Cessi Tilhe oldu.^[90] Bu görüşdə də üstün tərəf Rövşən Bayramov oldu.^[90] Rövşən Bayramov rəqibi üzərində 9:0 hesabı ilə inamlı qələbə qazanaraq Rio-de-Janeyro Olimpiadasının yarım-final mərhələsinə adladı.^[90] Bu mərhələdə o, Yaponiya nümayəndəsi Şinobu Ota ilə üz-üzə gəldi.^[90] 22 yaşlı Şinobu Ota yarım-final mərhələsinə gedən yolda titullu və təcrübəli güləşçiləri məğlub eləmişdi.^[90] Əvvəlcə o, London Olimpiadasının qalibi, 6 dəfə Dünya Çempionatının qızıl medalına sahib olan İran nümayəndəsi Həmid Suriyan, sonra isə 2 dəfə Asiya Çempionatının qalibi olan Qazaxıstan təmsilçisi Almat Kebispayev və Dünya Çempionatının bürünc medalçısı olan Norveç təmsilçisi Stig-Andre Berge üzərində qələbələr qazanmışdı.^[90] Şinobu Ota ilə görüşün əvvəlində Rövşən Bayramov üstün tərəf idi. Rövşən Bayramov rəqibinə qarşı fənd tətbiq elədi və hesabda 2:0 irəli çıxdı. Görüşün növbəti dəqiqələrində isə Şinobu Ota fənd tətbiq elədi və nəticədə rəqibi üzərində təmiz qələbə qazandı – 4:2. Bununla da o, final görüşünə vəsiqə qazandı. Rövşən Bayramov isə bürünc medal uğrunda görüşdə mübarizə aparacaqdı. Bu görüşdə onun rəqibi Norveç təmsilçisi Stig-Andre Berge ilə üz-üzə gəldi. Gərgin idman mübarizəsi şəraitində baş tutan görüşün əvvəlində Rövşən Bayramov bir xal qazandı. Daha sonra isə Stig-Andre Berge də bir xal qazandı. Bununla da görüş 1:1 hesabı ilə başa çatdı. Qaydalara əsasən son xalı qazanan güləşçi görüşün qalibi hesab olunurdu. Məhz buna görə də Stig-Andre Berge bürünc medalın sahibi oldu. Rövşən Bayramov isə Rio-de-Janeyro Olimpiadasını beşinci pillədə başa vurdu.^[90]

Həmin gün çıxış edən digər güləşçi 2015-ci ildə Avropa Oyunlarının qalibi olan Elvin Mürsəliyev idi. Elvin Mürsəliyev olimpiadanın təsnifat mərhələsində Misir nümayəndəsi Mahmud Fevzi ilə üz-üzə gəldi. Görüşün birinci hissəsində Elvin Mürsəliyev rəqibinə minimal fərqlə (0:1) məğlub olsa da, növbəti hissədə rəqibinə qarşı fənd tətbiq elədi və nəticədə rəqibi üzərində 2:1 hesabı ilə qələbə qazandı. Bununla da Elvin Mürsəliyev olimpiadanın 1/8 final mərhələsinə adladı. Bu mərhələdə onun rəqibi Qazaxıstan nümayəndəsi Doscan Kartixov oldu. Doscan Kartixov Dünya Çempionatının bürünc medalçısı idi. Həmin görüşdə Elvin Mürsəliyev rəqibi üzərində 5:1 hesabı ilə qələbə qazandı və olimpiadanın 1/4 final mərhələsinə adladı. Bu mərhələdə isə onun rəqibi Macarıstan nümayəndəsi Peter Baçsi oldu. Peter Baçsi 2014-cü il Dünya və Avropa Çempionatlarının qalibi idi. Həmin görüşdə Elvin Mürsəliyev rəqibinə 0:5 hesabı ilə məğlub oldu. Rəqib final görüşünə vəsiqə qazanmadığına görə Elvin Mürsəliyev təsəlliverici qrupda mübarizə aparmadı və nəticədə Rio-de-Janeyro Olimpiadasını yeddinci pillədə başa vurdu.

Avqustun 15-də isə Saman Təhmasibi və Sabah Şəriəti mübarizə apardı. 85 Kq. turnirində çıxış edən Saman Təhmasibi son Dünya Çempionatının bürünc medalçısı idi. Olimpiadanın təsnifat mərhələsində Saman Təhmasibi Rusiya nümayəndəsi David Çaxvetadze ilə üz-üzə gəldi. David Çaxvetadze 2015-ci il Avropa Oyunlarının qalibi idi. Həmin görüşdə Saman Təhmasibi rəqibinə 0:3 hesabı ilə məğlub oldu. Rəqib final görüşünə vəsiqə qazandığına görə Saman Təhmasibi mübarizəsini təsəlliverici qrupda davam elədi. Təsəlliverici qrupun birinci görüşündə Saman Təhmasibi İran nümayəndəsi Həbibullah Əxlaqi ilə üz-üzə gəldi. Gərgin idman mübarizəsi şəraitində baş tutan görüşdə Saman Təhmasibi rəqibinə 2:3 hesabı ilə məğlub oldu və turnirdə mübarizəsini başa vurdu. Nəticədə Saman Təhmasibi Rio-de-Janeyro Olimpiadasında 12-ci pillədə qərarlaşdı.

Həmin gün həm də 130 Kq. turnirində çıxış edən Sabah Şəriəti mübarizə apardı.^[91] 2015-ci il Avropa Oyunlarının finalçısı olan Sabah Şəriəti olimpiadanın 1/8 final mərhələsi çərçivəsində baş tutan birinci görüşdə Birləşmiş Ştatlar nümayəndəsi Robbi Smit ilə üz-üzə gəldi.^[91][92] Həmin görüşdə Sabah Şəriəti rəqibi üzərində 8:2 hesabı ilə qələbə qazandı və 1/4 final mərhələsinə adladı.^[92] Bu mərhələdə o, təcrübəli və titullu güləşçi, 2 dəfə Dünya və 5 dəfə Avropa Çempionatlarının qalibi olan Rıza Kayaalp ilə qarşılaşdı.^[92] Bundan əvvəl Sabah Şəriəti rəqibi ilə 2 dəfə üz-üzə gəlmişdi və hamısında məğlub olmuşdu. Bu səfər də görüşdə üstün tərəf Kayaalp oldu və o, rəqibi üzərində təmiz qələbə qazandı.^[92] Rıza Kayaalp olimpiadanın final görüşünə vəsiqə qazandığına görə Sabah Şəriəti təsəlliverici qrupda mübarizə apardı.^[92] Təsəlliverici qrupun birinci görüşündə Sabah Şəriəti Venesuela nümayəndəsi Ervin Karaballo ilə üz-üzə gəldi.^[92] Həmin görüşdə Sabah Şəriəti rəqibi üzərində 8:0 hesabı ilə inamlı qələbə qazandı və bürünc medal uğrunda görüşə vəsiqə qazandı.^[92] Həlledici görüşdə Sabah Şəriətinin rəqibi Almaniya təmsilçisi Eduard Pop oldu.^[92] Bundan əvvəl Sabah Şəriəti rəqibi ilə 2 dəfə üz-üzə gəlmişdi — 2015-ci ildə Avropa Oyunlarında qalib gəlsə də, 5 ay əvvəl Latviyada baş tutan Avropa Çempionatında məğlub olmuşdu. Görüşün əvvəlindən üstün tərəf Sabah Şəriəti idi. Eduard Pop isə passiv güləşirdi.^[92] Məhz buna görə də referilər görüşün 1:15-ci dəqiqəsində Eduard Popun görüşü parter vəziyyətində davam eləməsinə qərar verdi.^[92] Bu vəziyyətdə hücum edən tərəf Şəriəti, müdafiə olunan tərəf isə Popp oldu.^[92] Sabah Şəriəti rəqibin parter vəziyyətində olmasından istifadə elədi və "çevirmə" fəndini tətbiq elədi.^[92] Bu zaman Eduard Popun ani diqqətsizliyi, Sabah Şəriətinin onun üzərində təmzi qələbə qazanması ilə başa çatdı.^[92] Bu minvallada Sabah Şəriəti XXXI Yay Olimpiya Oyunlarının bürünc medalına sahib oldu.^[92] Sabah Şəriəti təltitetmə mərasimindən sonra jurnalist Qabil Mehdiyevə verdiyi müsahibəsində medal qazandığı üçün şad olduğunu və qələbəsini Azərbaycana həsr elədiyini bildirdi.^[93]

Avqustun 16-da isə Azərbaycanın əsas qızıl medal ümidi, 2015-ci il ərzində Avropa Oyunları və Dünya Çempionatının qalibi olan Rəsul Çunayev mübarizə apardı. Rəsul Çunayev olimpiadanın 1/16 final mərhələsi çərçivəsində baş tutan birinci görüşündə 25 yaşlı Kuba nümayəndəsi Miguel Martinez ilə üz-üzə gəldi.^[94] Həmin görüşdə Rəsul Çunayev rəqibi üzərində 4:2 hesabı ilə qələbə qazandı. Bununla da Rəsul Çunayev turnirin 1/8 final mərhələsinə adladı. Bu mərhələdə onun rəqibi 2008-ci il olimpiadasının qalibi, 2009-cu ilin Dünya Çempionatının və 2016-cı ilin Avropa Çempionatının qızıl medalçısı olan Rusiya Federasiyası təmsilçisi İslam-Bəy Albiyev oldu. Rəsul Çunayev İslam-Bəy Albiyevi bundan əvvəl 2013-cü ildə Kazan şəhərində baş tutan Universiada Oyunlarında 30 saniyə ərzində məğlub eləmişdi. Məhz bu qələbə Rəsul Çunayevi məşhurlaşdırmışdı. Bu səfər isə görüş gərgin idman mübarizəsi şəraitində baş tutdu. Nəticədə Rəsul Çunayev təcrübəli rəqibi üzərində 4:2 hesabı ilə qələbə qazandı və olimpiadanın 1/4 final mərhələsinə adladı. Bu mərhələdə o, Əlcəzair nümayəndəsi Tarix Benaissa ilə üz-üzə gəldi. Həmin görüşdə Rəsul Çunayev Tarix Benaissaya 10:2 hesabı ilə qalib gəldi və olimpiadanın yarım-final mərhələsinə adladı. Bu mərhələdə o, 2015-ci ildə I Avropa Oyunlarının gümüş medalçısı olan Ermənistan təmsilçisi Miqran Arutyunyan ilə qarşılaşdı. Bundan əvvəl Rəsul Çunayev Ermənistan güləşçiləri üzərində dəfələrlə qələbə qazanmışdı. Prinsiap görüş gərgin idman mübarizəsi şəraitində baş tutdu. Görüşün əvvəlindən Miqran Arutyunyan passiv güləşirdi. Məhz buna görə də referilər görüşün 1:20-ci dəqiqəsində Miqran Arutyunyanın görüşü parter vəziyyətində davam eləməsinə qərar verdi. Bu vəziyyətdə hücum edən tərəf Çunayev, müdafiə olunan tərəf isə Arutyunyan oldu. Rəsul Çunayev rəqibin parter vəziyyətində olmasından istifadə edə bilmədi. Görüşün növbəti dəqiqələri də gərgin idman mübarizəsi şəraitində baş tutdu. Birinci hissənin bitməsinə 16 saniyə qala referilər bu səfər Rəsul Çunayevin görüşü parter vəziyyətində davam eləməsinə qərar verdi. Miqran Arutyunyan rəqibinə fənd tətbiq elədi və rəqibini sinə üzərində aşıraraq dörd xal qazandı. Görüşün birinci hissəsi 4:0 hesabı ilə başa çatdı. Görüşün növbəti hissəsində Rəsul Çunayev sadəcə 2 xal qazana bildi. Bununla da Miqran Arutyunyan 4:2 hesabı ilə qalib gəldi və final görüşünə adladı. Rəsul Çunayev isə mübarizəni bürünc medal uğrunda görüşdə davam elədi. Bürünc medal uğrunda görüşdə Rəsul Çunayev 2013-cü il Dünya Çempionatının qalibi olan Cənubi Koreya nümayəndəsi Ryu Han-Su ilə üz-üzə gəldi. Həmin görüşdə Rəsul Çunayev rəqibi üzərində 8:0 hesabı ilə qələbə qazanaraq XXXI Yay Olimpiya Oyunlarının bürünc medalına sahib oldu.^[95]

Bununla da yunan-roma güləşçilərindən ibarət Azərbaycan yığması Rio-de-Janeyro Olimpiadasını 2 bürünc medalla başa vurdu.

Sərbəst güləş üzrə Azərbaycan yığması olimpiada da tam heyətlə — altı idmançı ilə mübarizə apardı. Komandanın heyətinə son olimpiya çempionları Toğrul Əsgərov və Şərif Şərifov, 2008 və 2012-ci illərdə olimpiadanın bürünc medallarına sahib olan Xetaq Qazyumov, 2014 və 2015-ci illər Dünya Çempionatının qalibi Hacı Əliyev, Avropa Çempionatının qalibi Cəbrayıl Həsənov və son Dünya Çempionatının finalçısı Camaləddin Məhəmmədov cəlb edildi.

Avqustun 19-da olimpiada da Hacı Əliyev və Cəbrayıl Həsənov mübarizə apardı. 2014 və 2015-ci illərdə Dünya Çempionatının qalibi olan Hacı Əliyev Azərbaycanın əsas medal ümidi hesab olunurdu.^[96] Hacı Əliyev olimpiadanın birinci görüşündə Cənubi Koreya nümayəndəsi Yun Jun-Si ilə üz-üzə gəldi.^[96] Karyerası ərzində ciddi uğurlara nail ola bilməyən 25 yaşlı Yun Jun-Si ilə qarşılaşma Hacı Əliyev üçün asan oldu. Hacı Əliyev rəqibi üzərində 12:2 hesabı ilə inamlı qələbə qazandı və olimpiadanın 1/4 final mərhələsinə adladı.^[97] Bu mərhələdə Hacı Əliyev prinsipial rəqiblərindən olan və cəmi beş ay əvvəl Latviyada Avropa Çempionatının yarım-final mərhələsində məğlub olduğu Gürcüstan təmsilçisi Vladimir Xinçeqaşvili ilə üz-üzə gəldi.^[97] Görüşün birinci hissəsindən sonra Hacı Əliyev 1:0 hesabı ilə üstün tərəf idi.^[97] Amma görüşün növbəti dəqiqələri gərgin idman mübarizəsi şəraitində baş tutdu.^[97] Nəticədə Vladimir Xinçeqaşvili 5:3 hesabı ilə qələbə qazandı.^[97] Növbəri mərhələdə də o, qələbə qazanıb final görüşünə vəsiqə qazandığına görə Hacı Əliyev təsəlliverici qrupda mübarizə apardı.^[97] Təsəlliverici qrupun birinci görüşündə Hacı Əliyev Qazaxıstan nümayəndəsi Nurislam Sanayev ilə üz-üzə gəldi.^[97] Həmin görüşdə gərgin idman mübarizəsi şəraitində baş tutdu. Nəticədə Hacı Əliyev 10:8 hesabı ilə qələbə qazandı və bürünc medal uğrunda görüşə vəsiqə qazandı.^[97] Bu mərhələdə Hacı Əliyev dəfələrlə qalib gəldiyi Bolqarıstan nümayəndəsi Vladimir Dubov ilə qarşılaşdı.^[97] Görüşün əvvəllərində üstünlüyü Vladimir Dubov ələ aldı və məhz bunun nəticəsində hesabda 4:0 öndə idi.^[97] Amma Hacı Əliyev tədricən görüşdə təşəbbüsü ələ aldı və hesabı 2:4 elədi.^[97] Görüşün sonlarında isə Hacı Əliyev inamlı fənd tətbiq elədi və nəticədə Vladimir Dubov üzərində vaxtından əvvəl təmiz qələbə qazandı.^[97] Bu minvalla da Hacı Əliyev XXXI Yay Olimpiya Oyunlarının bürünc medalına sahib oldu.^[97]

Həmin gün çıxış edən 2011-ci il Avropa Çempionatının qalibi Cəbrayıl Həsənov da Azərbaycanın medal ümidi hesab olunurdu. Olimpiadanın 1/8 final mərhələsində Cəbrayıl Həsənov Kolumbiya nümayəndəsi Karlos İzqerdo ilə üz-üzə gəldi. Həmin görüşdə Cəbrayıl Həsənov rəqibi üzərində vaxtından əvvəl 10:0 hesabı ilə qələbə qazandı və olimpiadanın 1/4 final mərhələsinə adladı. Bu mərhələdə onun rəqibi Gürcüstan nümayəndəsi Yaqub Maqaraşvili oldu. Bu görüşdə də Cəbrayıl Həsənov rəqibi üzərində vaxtından əvvəl qələbə qazandı (11:0) və olimpiadanın yarım-final mərhələsinə adladı. Finala gedən yolda onun rəqibi Rusiya nümayəndəsi Aniuar Qeduyev oldu. Aniuar Qeduyev 2015-ci il Avropa Oyunlarının qalibi, Dünya Çempionatının isə bürünc medalçısı idi. Cəbrayıl Həsənov görüşün birinci dəqiqələrindən inamlı mübarizə apardı və nəticədə 4:0 hesabı ilə irəlidə oldu. Amma görüşün son dəqiqələrində Aniuar Qeduyev yaddaqalan geridönüş elədi və rəqibinə 5:4 hesabı ilə qalib gəldi. Bununla da Cəbrayıl Həsənov mübarizəsini bürünc medal uğrunda görüşdə davam elədi. Həlledici görüşdə onun rəqibi Özbəkistan nümayəndəsi Bəyzod Abdurahmonov oldu. Bu görüşdə gərgin idman mübarizəsi şəraitində baş tutdu. Nəticədə Cəbrayıl Həsənov rəqibi üzərində 9:7 hesabı ilə qələbə qazandı. Bu minvalla da Cəbrayıl Həsənov XXXI Yay Olimpiya Oyunlarının bürünc medalına sahib oldu.

Avqustun 20-də olimpiada da Şərif Şərifov və Camaləddin Məhəmmədov mübarizə apardı. Son olimpiya çempionu Şərif Şərifov bu səfər də Azərbaycanın əsas medal ümidlərindən biri hesab olunurdu. Şərif Şərifovun olimpiadanın 1/8 final mərhələsində rəqibi Çin nümayəndəsi Bi Şenqfenq oldu.^[98][99] Həmin görüşdə Şərif Şərifov rəqibi üzərində 10:0 hesabı ilə inamlı qələbə qazandı və olimpiadanın 1/4 final mərhələsinə adladı.^[99] Bu mərhələdə onun rəqibi Polşa nümayəndəsi Zbiqniev Baranovsxi oldu.^[99] Bu görüşdə də Şərif Şərifov rəqibi üzərində inamlı qələbə qazandı (8:0) və olimpiadanın yarım-final mərhələsinə adladı.^[99][100] Finala gedən yolda isə onun rəqibi Rusiya nümayəndəsi Abdulrəşid Sadulayev oldu.^[99] Karyerası ərzində cəmi bir dəfə məğlub olan Abdulrəşid Sadulayev Avropa və Dünya Çempinonatlarının qalibi idi. Həmin görüşdə Şərif Şərifov rəqibinə 1:8 hesabı ilə məğlub oldu və mübarizəni bürünc medal uğrunda görüşdə davam elədi.^[99] Bu görüşdə onun rəqibi Venesuela nümayəndəsi Pedro Keballos oldu.^[99] Həmin görüşdə Şərif Şərifov rəqibi üzərində 5:1 hesabı ilə qələbə qazandı və XXXI Yay Olimpiya Oyunlarının bürünc medalına sahib oldu.^{[51][99][101]} Şərif Şərifov turnirdən sonra müsahibəsində bunları bildirdi: "Rio-de-Janeyroya qızıl medal üçün gəlmişdim. Növbəti dəfə olimpiadanın qalibi olmaq istəyirdim. Amma alınmadı. Bürünc medalla razıyam".^[102]

Həmin gün 125 Kq. turnirində mübarizə aparan son Dünya Çempionatının finalçısı Camaləddin Məhəmmədov isə uğursuz çıxış elədi. Olimpiadanın 1/8 final mərhələsində Camaləddin Məhəmmədov ABŞ nümayəndəsi Tervel Dlaqnev ilə üz-üzə gəldi. Gərgin idman mübarizəsi şəraitində baş tutan görüşdə Camaləddin Məhəmmədov rəqibinə 5:6 hesabı ilə məğlub oldu. Rəqib final görüşünə vəsiqə qazanmadığına görə Camaləddin Məhəmmədov təsəlliverici qrupda mübarizə apara bilmədi və olimpiadanı 12-ci pillədə başa vurdu. Camaləddin Məhəmmədovun görüş zamanı zədəli olması onun uğursuz çıxışının əsas səbəbi idi.

Avqustun 21-də, olimpiadanın son günündə sərbəst güləş üzrə Azərbaycan yığmasının əsas medal ümidləri mübarizə apardı. Son Olimpiya çempionu Toğrul Əsgərov və 2008–2012-ci illərdə olimpiadaların bürünc medallarına sahib olan Xetaq Qazyumov bu səfərdə medala iddialı idilər.^[103] Təsnifat mərhələsindən azad olan Toğrul Əsgərov 1/8 final mərhələsində Ukrayna nümayəndəsi Andrey Kviatxovsxiy ilə üz-üzə gəldi.^[103][104] Həmin görüşdə Toğrul Əsgərov rəqibi üzərində vaxtından əvvəl 12:2 hesabı ilə qələbə qazandı və turnirin 1/4 final mərhələsinə adladı.^[104] Bu mərhələdə onun rəqibi ABŞ nümayəndəsix Franx Molinaro oldu.^[104] Əsgərov və Molinaro iyulda baş tutan Almaniya Qran-Prisi beynəlxalq turnirinin final görüşündə üz-üzə gəlmişdi və onda Toğrul Əsgərov rəqibinə qalib gəlmişdi. Bu səfər də Toğrul Əsgərov rəqibinə qalib gəldi (10:0) və olimpiadanın yarım-final mərhələsinə adladı.^[104] Finala gedən yolda isə onun rəqibi İtaliya nümayəndəsi Franx Çamizo oldu.^[104] Əsgərov və Çamizo 2015-ci ildə Dünya Çempionatında üz-üzə gəlmişdi və onda Çamizo qalib gəlsə də, sonradan referilər Əsgərovun qalib olmalı olduğunu bildirmişdi. Bu səfər də görüş gərgin idman mübarizəsi şəraitində baş tutdu.^[104] Nəticədə Toğrul Əsgərov rəqibinə 8:4 hesabı ilə qalib gəldi və dörd ildən sonra növbəti dəfə olimpiadanın final görüşünə vəsiqə qazandı.^[104][105] Həlledici görüşdə isə onun rəqibi Rusiya nümayəndəsi Soslan Ramonov oldu.^[104] Bu görüşdə Toğrul Əsgərov rəbiqinə vaxtından əvvəl 0:11 hesabı ilə məğlub oldu və XXXI Yay Olimpiya Oyunlarının gümüş medalına sahib oldu.^[104][106] Final görüşündən dərhal sonra Toğrul Əsgərov idman jurnalisti Qabil Mehdiyevə müsahibəsində "yarım-final mərhələsindən sonra yorğun olduğunu, final görüşünün birinci dəqiqələrində rəqibi ilə toqquşma nəticəsində məğlub olduğunu, bununla belə medala görə şad olduğunu" bildirdi.^[107] Toğrul Əsgərov həm də Azərbaycanın Olimpiya Oyunları tarixində medalların əyarına görə sərbəst güləşçi Namiq Abdullayevə çatdı.^[108]

2008 və 2012-ci illərdə olimpiadaların bürünc medalına sahib olan Xetaq Qazyumov bu səfər çempionluğa iddialı. Xetaq Qazyumovun 1/16 final mərhələsi çərçivəsində baş tutan birinci görüşdə rəqibi Polşa nümayəndəsi Radoslav Baran oldu.^[109] İyulda Almaniya Qran-Prisinin final görüşündə qalib gəldiyi rəqibinə o, bu səfər də qalib gəldi — 3:0.^[110] Bununla da Xetaq Qazyumov Rio-de-Janeyro Olimpiadasının 1/8 final mərhələsinə adladı.^[110] Bu mərhələdə o, prinsipial rəqiblərindən biri, 2011 və 2013-cü illərin Dünya Çempioatının qalibi olan İran təmsilçisi Reza Yazdani ilə qarşılaşdı.^[110] Qazyumov Yazdani ilə sonuncu dəfə 2013-cü il Dünya Çempionatının həlledici görüşündə üz-üzə gəlmişdi və rəqibinə məğlub olmuşdu. Bu səfər də görüş gərgin idman mübarizəsi şəraitində baş tutdu.^[110] Nəticədə Xetaq Qazyumov Reza Yazdani üzərində 2:1 hesabı ilə qələbə qazandı və Rio-de-Janeyro Olimpiadasının 1/4 final mərhələsinə adladı.^[110][111] Bu mərhələdə onun rəqibi Özbəkistan nümayəndəsi Məhəmməd İbrahimov oldu.^[110] Həmin görüşdə Xetaq Qazyumov rəqibindən birbaşa üstün oldu və 12:3 hesabı ilə inamlı qələbə qazandı.^[110] Bununla da o, Rio-de-Janeyro Olimpiadasının yarım-final mərhələsinə adladı.^[110] Bu mərhələdə o, 2012-ci il London Olimpiadasında məğlub olduğu Ukrayna təmsilçisi Valeri Andreytsev ilə qarşılaşdı.^[110] Bu görüşdə Xetaq Qazyumovrəqibi üzərində vaxtından əvvəl 11:0 hesabı ilə inamlı qələbə qazandı.^[110] Bununla da o, Rio-de-Janeyro Olimpiadasının final görüşünə vəsiqə qazandı.^[110] Həlledici görüşdə onun rəqibi — 2015-ci il Dünya Çempionatının qalibi olan Birləşmiş Ştatlar nümayəndəsi Keli Snayder oldu.^[110] Gərgin idman mübarizəsi şəraitində baş tutan görüşdə Xetaq Qazyumov rəqibinə 1:2 hesabı ilə məğlub oldu.^[110] Bu minvalla da Xetaq Qazyumov XXXI Yay Olimpiya Oyunlarının gümüş medalına sahib oldu.^[110][112] Görüşdən sonra o, müsahibəsində bunları bildirdi: "Çıxışıma görə məyusam. Qızıl medal qazanmaq istəyirdim, amma alınmadı. Rəqib bu gün güclü idi. Gümüş medal elə də yaxşı nəticə deyil. Bürünc medalı qalib gəlib, qazanırsan. Amma gümüş medalı məğlub olub, alırsan".^[113] Xetaq Qazyumov həm də Mariya Stadnikdən sonra üç dəfə olimpiadanın medalına sahib olan növbəti azərbaycanlı idmançı oldu.

Ümumi nəticələrə əsasən sərbəst güləşçilərdən ibarət Azərbaycan yığması XXXI Yay Olimpiya Oyunlarını 2 gümüş və 3 bürünc medalla başa vurdu. Olimpiada da altı güləşçi ilə mübarizə aparan Azərbaycan yığmasının üzvlərindən sadəcə Camaləddin Məhəmmədov medala sahib ola bilmədi. Azərbaycan yığmasının baş məşqçisi Saypulla Absaidov bu nəticəni ciddi uğur adlandırdı. Komandanın məşqçisi Firdovsi Umudov isə sərbəst güləşçilərin qazandığı uğuru 2016-cı ilin aprelində Azərbaycan və Ermənistan arasında baş verən hərbi toqquşmalar zamanı şəhid olan Azərbaycan əsgərlərinə həsr elədi.

Qadın güləşi üzrə Azərbaycan yığması olimpiada da üç idmançı ilə mübarizə apardı. Komandanın heyətinə 2008 və 2012-ci illərdə olimpiadalarının medalçısı olan Mariya Stadnik, 2012-ci il London Olimpiadasının bürünc medalçısı Yuliya Ratkeviç və 2016-cı il Avropa Çempionatının qalibi Nataliya Sinişin cəlb edildi.

Avqustun 17-də qadın güləşçilərdən Mariya Stadnik və Yuliya Ratkeviç mübarizə apardı. Mariya Stadnik 2 dəfə Olimpiya Oyunlarının medalçısı, həmçinin bir dəfə Dünya, beş dəfə isə Avropa Çempionatlarının qalibi idi və Azərbaycanın əsas qızıl medal ümidi hesab olunurdu. Karyerası ərzində üçüncü dəfə olimpiadada çıxış edən Mariya Stadnik həm də Ümumdünya Güləş Birliyi (UWW) tərəfindən turnirin əsas favoriti hesab olunurdu.^{[55][114][115]} Onun əsas rəqibi 2015-ci il Dünya Çempionatının final görüşündə məğlub olduğu Yaponiya nümayəndəsi Eri Tosaha idi.^[116] Mariya Stadnikin 1/8 final mərhələsində rəqibi Argentina nümayəndəsi Patrisia Bermudez idi.^[117] Həmin görüşün onuncu saniyəsindəcə Mariya Stadnik rəqibinin ayağından tutdu və 30 saniyə ərzində beş dəfə çevirmə fəndini tətbiq elədi. Nəticədə Mariya Stadnik rəqibi üzərində vaxtından əvvəl 10:0 hesabı ilə qələbə qazandı 1/4 final mərhələsinə adladı.^[117] Bu mərhələdə onun rəqibi Polşa nümayəndəsi İvona Mathovsha oldu.^[117] Bu görüşdə də Mariya Stadnik rəqibinə vaxtından əvvəl 10:0 hesabı ilə qalib gəldi və olimpiadanın yarım-final mərhələsinə adladı.^[117] Finala gedən yolda isə onun rəqibi Bolqarıstan nümayəndəsi Elitsa Yanhova oldu.^[117] Həmin görüşün birinci hissəsində 4:0 hesabı ilə qalib gələn Mariya Stadnik, növbəti hissədə rəqibi üzərində təmiz qələbə qazandı və Rio-de-Janeyro Olimpiadasının final görüşünə vəsiqə qazandı.^[117][118] Həlledici görüşdə onun rəqibi Yaponiya nümayəndəsi Eri Tosaha oldu.^[117] Bir il əvvəl Las-Veqas şəhərində baş tutan Dünya Çempionatının final görüşündə Mariya Stadnik rəqibinə gərgin idman mübarizəsi şəraitində baş tutan görüşün nəticəsində məğlub olmuşdu. Mariya Stadnik və Eri Tosaha arasında baş tutan Rio-de-Janeyro Olimpiadasının final görüşü gərgin idman mübarizəsi şəraitində baş tutdu.^[117] Mariya Stadnik 1:06-cı dəqiqədə Eri Tosahadan bir bal almağı bacardı — 1:0. Görüşün birinci hissə Mariya Stadnikin 1:0 hesablı qələbəsi ilə başa çatdı. Görüşün növbəti hissəsində Eri Tosaha passiv mübarizə apardığına görə Mariya Stadnika daha bir bal verildi — 2:0. Görüşün başa çatmasına bir dəqiqə qalan bu səfər Mariya Stadnik passiv mübarizə apardığına görə Eri Tosahaya bir bal verildi — 2:1. Görüşün başa çatmasına 20 saniyə qala Mariya Stadnik müdafiə olunmaq əvəzinə, hücuma başladı. Nəticədə isə görüşün başa çatmasına üç saniyə qala Mariya Stadnikin hücumu uğursuz oldu və nəticədə Eri Tosaha rəqibindən bir bal verildi — 2:3.^[117] Bununla da Mariya Stadnik sona üç qala Olimpiya Oyunlarının qızıl medalını əldən verdi.^[117]

Təltifetmə mərasimi zamanı gümüş medal təqdim edilən zaman Mariya Stadnik göz yaşlarını saxlaya bilmədi.^[119][120] Mərasimdən sonra Mariya Stadnika Beynəlxalq Olimpiya Komitəsinin (BOK) Prezidenti Tomas Bax və Ümumdünya Güləş Birliyinin (UWW) Prezidenti Nenad Laloviç təsəlli verdi.^[121] Mariya Stadnik həm də Azərbaycanın Olimpiya Oyunları tarixinə üç olimpiada da medal qazanmağı bacaran birinci idmançı olaraq düşdü. Mariya Stadnik olimpiadadan sonra müsahibəsində bunları bildirdi: "həmin yaponiyalı qıza Dünya Çempionatının final görüşündə də son saniyələrdə məğlub olmuşdum. İndi də son saniyələrdə məğlub oldum. Ciddi hazırlığım var idi. Hazırlıq prosesi aylarla davam eləmişdi. Məğlubiyyətə görə məyus olsam da, medal qazana bildiyim üçün şadam. 2020-ci ildə də olimpiadada mübarizə aparacam".

Həmin gün çıxış edən digər qadın güləşçi Yuliya Ratkeviç isə dörd il əvvəl olimpiadanın, bir il əvvəl isə Dünya Çempionatının bürünc medalına sahib olmuşdu. Olimpiadanın 1/8 final mərhələsində Yuliya Ratkeviç Ukrayna nümayəndəsi Oxana Herhel ilə üz-üzə gəldi. Oxana Herhel 2015-ci il Dünya Çempionatının qalibi idi. Gərgin idman mübarizəsi şəraitində baş tutan görüşdə Yuliya Ratkeviç rəqibi üzərində 7:5 hesabı ilə qələbə qazandı və olimpiadanın 1/4 final mərhələsinə adladı. Bu mərhələdə onun rəqibi Kolumbiya nümayəndəsi Jaqlin Renteriya oldu. Jaqlin Renteriya 2008 və 2012-ci illərdə olimpiadaların bürünc medallarına sahib olmuşdu. Bu görüşdə gərgin idman mübarizəsi şəraitində baş tutdu. Nəticədə Yuliya Ratkeviç rəqibi üzərində 7:3 hesabı ilə qələbə qazandı və olimpiadanın yarım-final mərhələsinə adladı. Finala gedən yolda onun rəqibi Yaponiya nümayəndəsi Kaori İço oldu. Kaori İço Olimpiya Oyunlarında üç dəfə, Dünya Çempionatlarında isə on dəfə qızıl medala sahib olan titullu və məğlubedilməz güləşçi idi. Bu görüşün favoriti Kaori İço idi və elə gözləniləndə oldu. Yuliya Ratkeviç rəqibinə 0:10 hesabı ilə məğlub oldu və mübarizəsini bürünc medal uğrunda görüşdə davam elədi. Həlledici görüşdə onun rəqibi Tunis nümayəndə Mərvə Əmri oldu. Görüşün əvvəlində Yuliya Ratkeviç 3:0 hesabı ilə irəlidə olsa da, görüşün növbəti dəqiqələrində Mərvə Əmri geridönüş elədi və nəticədə rəqibinə 6:3 hesabı ilə qalib gəldi. Bununla da Yuliya Ratkeviç olimpiadanı beşinci pillədə başa vurdu.

Avqustun 18-də olimpiada da Nataliya Sinişin mübarizə apardı. Son Avropa Çempionatının qalibi olan Nataliya Sinişinin 1/8 final mərhələsində rəqibi Yaponiya nümayəndəsi Saori Yoşida oldu. Saori Yoşida üç dəfə Olimpiya Oyunlarının, dörd dəfə Asiya Oyunlarının, on üç dəfə isə Dünya Çempionatlarının qalibi olan məğlubedilməz güləşçi idi. Bu görüşdə Nataliya Sinişin rəqibinə 0:4 hesabı ilə məğlub oldu. Saori Yoşida final görüşünə vəsiqə qazandığına görə Nataliya Sinişin təsəlliverici qrupda mübarizə apardı. Təsəlliverici qrupun birinci görüşündə onun rəqibi Seneqal nümayəndəsi İzabella Sambu oldu. Həmin görüşdə Nataliya Sinişin rəqibinə 4:0 hesabı ilə qalib gəldi və bürünc medal uğrunda görüşə vəsiqə qazandı. Həlledici görüşdə isə onun rəqibi Venesuela nümayəndəsi Betzabet Argüello oldu. Gərgin idman mübarizəsi şəraitində baş tutan görüşdə Nataliya Sinişin rəqibinə 2:1 hesabı ilə qalib gəldi və XXXI Yay Olimpiya Oyunlarının bürünc medalına sahib oldu.^[122]

Bununla da qadın güləşçilərdən ibarət Azərbaycan yığması olimpiadanı bir gümüş və bir bürünc medalla baaş vurdu.

  Əsas məqalə: İdman gimnastikası 2016 Yay Olimpiya Oyunlarında

• Q — növbəti mərhələyə adladı

Rio-de-Janeyro Olimpiadasında idman gimnastların idman növü üzrə turnirlər 6–16 avqustda baş tutdu. Azərbaycanı bu idman növü üzrə Oleq Stepko və Petro Paxnyuk təmsil elədi.^{[1][123][124]}

Kişilərin turnirində çıxış edən Oleq Stepko və Petro Paxnyuk avqustun 6-da mübarizə apardı. Petro Paxnyuk əvvəlcə dayanqla tullanmada və halqalarda mübarizə apardı.^[125] Nəticədə Petro Paxnyuk dayaqla tullanma turnirini 14.300 balla, halqalarla turnirini isə 13.600 balla başa vurdu.^[125] Daha sonra Petro Paxnyuk sərbəst və gimnastika atı turnirində mübarizə apardı.^[126][127] Sərbəst turniri 14.133 balla 41-ci pillədə başa vuran Petro Paxnyuk gimnastika atı turnirində 14.233 balla 35-ci pillənin sahibi oldu.^[126][127] Günün sonunda Petro Paxnyuk parallel qollar və turnik turnirində mübarizə apardı.^[128] Petro Paxnyuk parallel qollar turnirində 14.166 balla 51-ci pillədə, turnik turnirində isə 13.783 balla 50-ci pillədə qərarlaşdı.^[128][129] Ümumi nəticədə Petro Paxnyuk təsnifat mərhələsini 84.215 balla 34-cü pillədə başa vurdu və final mərhələsinə vəsiqə qazana bilmədi.^[130]

Son Dünya Çempionatının bürünc medalçısı Oleq Stepko isə əvvəlcə dayanqla tullanmada və halqalarda mübarizə apardı.^[125] Nəticədə Oleq Stepko dayaqla tullanma turnirini 14.400 balla, halqalarla turnirini isə 14.033 balla başa vurdu.^[125] Daha sonra Oleq Stepko sərbəst və gimnastika atı turnirində mübarizə apardı.^[126][127] Sərbəst turniri 13.900 balla 50-ci pillədə başa vuran Oleq Stepko gimnastika atı turnirində 14.975 balla 13-cü pillənin sahibi oldu.^[126][127] Günün sonunda Oleq Stepko parallel qollar və turnik turnirində mübarizə apardı.^[128][129] Oleq Stepko parallel qollar turnirində 15.300 balla 18-ci pillədə, turnik turnirində isə 13.600 balla 57-ci pillədə qərarlaşdı.^[128][129] Ümumi nəticədə Oleq Stepko təsnifat mərhələsini 86.208 balla 20-ci pillədə başa vurdu və olimpiadanın final mərhələsinə vəsiqə qazandı.^[130] Bununla da o, Azərbaycanın Olimpiya Oyunları tarixində final mərhələsinə vəsiqə qazanmağı bacaran birinci idman gimnastı oldu. Final mərhələsində isə Oleq Stepko ümumi nəticədə 79.081 balla 22-ci pillənin sahibi oldu.^[130]

  Əsas məqalə: Kamandan oxatma 2016 Yay Olimpiya Oyunlarında

• Qəl. — qalib gəldi
• Məğ. — məğlub oldu

Rio-de-Janeyro Olimpiadasında oxatma idman növü üzrə turnirlər 5–12 avqustda baş tutdu. Azərbaycanı bu idman növü üzrə Olqa Senyuk təmsil elədi.^[1][131] Olqa Senyuk 2016-cı ildə Birləşmiş Krallıqda baş tutan Avropa Çempionatının nəticələrinə əsasən olimpiya lisenziyasına sahib oldu. Olqa Senyuk həm də Azərbaycanı Olimpiya Oyunlarında bu idman növü üzrə təmsil edən birinci idmançı olaraq tarixə düşdü.

Avqustun 5-də Olqa Senyuk Rio-de-Janero Olimpiadasında təsnifat mərhələsində mübarizə apardı.^[132] Həmin mərhələdə Olqa Senyuk 622 xal topladı.^[132] Bu nəticəyə əsasən Olqa Senyuk mərhələni 64 idmançı sırasında 37-ci pillədə başa vurdu.^[132]

Avqustun 9-da baş tutan 1/32 final mərhələsində isə Olqa Senyuk Çin nümayəndəsi Ço Huy ilə üz-üzə gəldi.^[132] Həmin görüşdə Olqa Senyuk rəqibinə 1:7 hesabı ilə məğlub oldu və olimpiadanı 33-cü pillədə başa vurdu.^[132]

  Əsas məqalə: Kanoe slalom 2016 Yay Olimpiya Oyunlarında

• Q — növbəti mərhələyə adladı

Rio-de-Janeyro Olimpiadasında bu idman növü üzrə turnirlər 7–11 avqustda baş tutdu. Azərbaycanı bu idman növü üzrə Yure Meqliç təmsil elədi.^[1][133] Yure Meqliç 2015-ci ildə Birləşmiş Krallıqda baş tutan Dünya Çempionatının nəticələrinə əsasən olimpiya lisenziyasına sahib oldu. Yure Meqliç həm də Azərbaycanı Olimpiya Oyunlarında bu idman növü üzrə təmsil edən birinci idmançı olaraq tarixə düşdü.

Yure Meqliç Rio-de-Janeyro Olimpiadasında avqustun 7-də mübarizə apardı.^[134] Təsnifat mərhələsinin birinci gedişində Yure Meqliç 95.12 saniyə nəticə göstərdi və 14-cü pillənin sahibi oldu.^[134] Növbəti gedişdə isə Yure Meqliç 90.70 saniyə nəticə göstərdi və mərhələni 8-ci pillədə başa vurdu.^[134] Bununla da təsnifat mərhələsinin nəticələrinə əsasən Yure Meqliç mərhələni 11-ci pillədə başa vurdu və olimpiadanın yarım-final mərhələsinə adladı.^[134] Avqustun 11-də baş tutan yarım-final mərhələsində isə Yure Meqliç 145.00 saniyə nəticə göstərdi və mərhələni 14-cü pillədə başa vurdu.^[134] Top-10 idmançı final mərhələsinə vəsiqə qazandığına görə Yure Meqliç Rio-de-Janeyro Olimpiadasında mübarizəsini başa vurdu.^[134]

  Əsas məqalə: Kanoe sprint 2016 Yay Olimpiya Oyunlarında

• Q — növbəti mərhələyə adladı

Rio-de-Janeyro Olimpiadasında bu idman növü üzrə turnirlər 15–20 avqustda baş tutdu. Azərbaycanı bu idman növü üzrə Valentin Demyanenko və İnna Osipenko-Radomska təmsil elədi.^[1] Valentin Demyanenko və İnna Osipenko-Radomska 2015-ci ildə İtaliyada baş tutan Dünya Çempionatının nəticələrinə əsasən olimpiya lisenziyasına sahib oldu.

İnna Osipenko-Radomska olimpiada da avqustun 15-də mübarizə apardı. K-1 növündə 200 metr turnirində çıxış edən İnna Osipenko-Radomska təsnifat mərhələsi 40.702 saniyə nəticə göstərdi. Həmin nəticələrə əsasən İnna Osipenko-Radomska yeddi idmançı sırasında birinci pillənin sahibi oldu və yarım-final mərhələsinə vəsiqə qazandı. Həmin gün baş tutan mərhələdə də İnna Osipenko-Radomska uğurlu çıxış elədi. 38.802 saniyə nəticə göstərən İnna Osipenko-Radomska birinci pillənin sahibi oldu və olimpiadanın final mərhələsinə vəsiqə qazandı. Avqustun 16-da baş tutan final görüşü Azərbaycan idmanı tarixi üçün əlamətdar oldu. 8 idmançının mübarizə apardığı final mərhələsində İnna Osipenko-Radomska 40.400 saniyə nəticə göstərdi. Bu nəticələrə əsasən İnna Osipenko-Radomska Yeni Zelandiya və Polşa idmançılarından geri qalaraq üçüncü pillənin sahibi oldu. Bu minvalla da İnna Osipenko-Radomska olimpiadanı bürünc medalla başa vurdu. İnna Osipenko-Radomska bu idman növü üzrə olimpiya medalına sahib olan birinci Azərbaycan idmançısı olaraq tarixə düşdü.

Kişilərin turnirində Azərbaycanı Dünya və Avropa Çempionatlarının qalibi Valentin Demyanenko təmsil elədi. Dörd il əvvəl London Olimpiadasında uğursuzluqla üzləşən Valentin Demyanenko bu səfər çempionluğa iddialı idi. Valentin Demyanenko avqustun 17-də təsnifat mərhələsində mübarizə apardı. "D" qrupunda çıxış edən Valentin Demyanenko 38.748 saniyə nəticə göstərdi və doqquz idmançı sırasında birinci pillənin sahibi olaraq yarım-final mərhələsinə adladı. Həmin gün baş tutan yarım-final mərhələsində isə Valentin Demyanenko "С" qrupunda mübarizə apardı. Gərgin idman mübarizəsi şəraitində baş tutan mərhələdə Valentin Demyanenko 40.298 saniyə nəticə göstərdi və sadəcə Gürcüstan nümayəndəsi Zaza Nadiradzedən 0.152 saniyə geri qaldı. Nəticədə final mərhələsinə üç idmançı vəsiqə qazandı — Gürcüstan nümayəndəsi Nana Nadiradze (40.146), Azərbaycan nümayəndəsi Valentin Demyanenko (40.298) və Ujrayna nümayəndəsi Yuri Çeban (40.590).^[135] Final mərhələsi avqustun 18-də baş tutdu. Final mərhələsində 8 idmançı mübarizə apardı — Çin nümayəndəsi Li Kin, İspaniya nümayəndəsi Alfonso Benavides, Fransa nümayəndəsi Tomas Simart, Gürcüstan nümayəndəsi Zaza Nadiradze, Braziliya nümayəndəsi İsaq Kuyeroz dos Santos, Rusiya nümayəndəsi Andrey Kraytor, Azərbaycan nümayəndəsi Valentin Demyanenko və Ukrayna nümayəndəsi Yuri Çeban. Valentin Demyanenko startdan dərhal sonra təşəbbüsü ələ alındı və liderlərdən biri oldu. 100 metrənin tamamında əsas rəqabət Valentin Demyanenko və Yuri Çeban arasında idi. Son on metr isə gərgin idman mübarizəsi şəratində baş tutdu. Nəticədə photofinishdən istifadə olundu. Nəticələrə əsasən Valentin Demyanenko 38.492 saniyə nəticə göstərdi və Yuri Çebandan cəmi 0.214 saniyə geri qaldı. Bununla da Valentin Demyanenko XXXI Yay Olimpiya Oyunlarının gümüş medalına sahib oldu.^[136][137] Turnirdən sonra Valentin Demyanenko müsahibəsində gümüş medalı uğursuz nəticə adlandırdı.^[138]

İnna Osipenko-Radomskanın mübarizə apardığı növbəti turnir avqustun 17-də baş tutdu. K-1 növündə 500 metr turnirində çıxış edən İnna Osipenko-Radomska təsnifat mərhələsi 1.50.750 dəqiqə nəticə göstərdi. Həmin nəticələrə əsasən İnna Osipenko-Radomska altı idmançı sırasında birinci pillənin sahibi oldu və yarım-final mərhələsinə vəsiqə qazandı. Həmin gün baş tutan mərhələdə də İnna Osipenko-Radomska uğurlu çıxış elədi. 1.56.626 dəqiqə nəticə göstərən İnna Osipenko-Radomska yalnızca Almaniya nümayəndəsindən geri qaldı və olimpiadanın final mərhələsinə vəsiqə qazandı. 8 idmançının mübarizə apardığı final mərhələsi isə bu səfər İnna Osipenko-Radomska uğursuz oldu. 1.56.572 dəqiqə nəticə göstərən İnna Osipenko-Radomska olimpiadanı sonuncu pillədə başa vurdu. Bununla da İnna Osipenko-Radomska olimpiadanı bir bürünc medalla başa vurdu.

  Əsas məqalə: Qılıncoynatma 2016 Yay Olimpiya Oyunlarında

• Qəl. — qalib gəldi
• Məğ. — məğlub oldu

Rio-de-Janeyro Olimpiadasında qılıncoynatma idman növü üzrə turnirlər 6–14 avqustda baş tutdu. Azərbaycanı bu idman növü üzrə Səbinə Mikina təmsil elədi.^[1] Səbinə Mikina 2016-cı ildə Çexiyada baş tutan Avropa Olimpiya Təsnifat Turnirinin nəticələrinə əsasən olimpiya lisenziyasına sahib oldu.^[139]

Avqustun 8-də qadınların sablya turnirində çıxış edən Səbinə Mikina mübarizə apardı.^[140] Səbinə Mikina olimpiadanın 1/16 final mərhələsində Tunis nümayəndəsi Azza Besbes ilə üz-üzə gəldi.^[140] Gərgin idman mübarizəsi şəraitində baş tutan görüşdə Səbinə Mikina rəqibi üzərində 12:15 hesabı ilə hesabı ilə məğlub oldu və olimpiadanı 17-ci pillədə başa vurdu.^[140]

  Əsas məqalə: Şosse velosipedi 2016 Yay Olimpiya Oyunlarında

• DNF — bitirmədi

Rio-de-Janeyro Olimpiadasında şose velosipedi idman növü üzrə turnirlər 6–10 avqustda baş tutdu. Azərbaycanı bu idman növü üzrə Maksim Averin və Yelena Pavluxina təmsil elədi.^{[1][141][142]}

Avqustun 6-da baş tutan fərdi turnirdə Maksim Averin finiş həddinə çata bilmədi və olimpiadanı nəticəsiz başa vurdu.^[143] Avqustun 7-də qadınların turnirində çıxış edən Yelena Pavluxina isə finiş həddinə 3 saat 58 dəqiqə 5 saniyəyə çatdı və nəticədə Rio-de-Janeyro Olimpiadasını 68 velosipedçi sırasında 35-ci pillədə başa vurdu.^[144]

  Əsas məqalə: Taekvondo 2016 Yay Olimpiya Oyunlarında

• Qəl. — qalib gəldi
• Məğ. — məğlub oldu

Rio-de-Janeyro Olimpiadasında bu idman növü üzrə turnirlər 17–20 avqustda baş tutdu. Azərbaycanı bu idman növü üzrə dörd idmançı təmsil elədi.^[1] Kişilər turnirində Azərbaycan yığmasının heyətinə Dünya Çempionatının qalibi Radik İsayev və Avropa Çempionatının qalibi Milad Beygi, qadınların turnirində isə Azərbaycan yığmasının heyətinə Dünya və Avropa Çempionatlarının medalçısı Fəridə Əzizova, həmçinin 21 yaşlı gənc idmançı Patimat Abakarova cəlb edildi.

Avqustun 17-də Rio-de-Janeyro Olimpiadasında 2016-cı il Avropa Çempionatının finalçısı Patimat Abakarova mübarizə apardı. Olimpiya Oyunlarında debüt edən 21 yaşlı Patimat Abakarova turnirin favoriti hesab olunmurdu. Onun 1/8 final mərhələsində rəqibi Serbiya nümayəndəsi Tiyana Boqdanoviç oldu.^[145] Patimat Abakarova həmin rəqibinə yanvarda İstanbul şəhərində baş tutan turnirin final görüşündə məğlub eləmişdi. Bu səfər də görüş gərgin idman mübarizəsi şəraitində baş tutdu. Nəticədə bu səfər Patimat Abakarova rəqibinə 2:3 hesabı ilə məğlub oldu. Tiyana Boqdanoviçin turnirin final görüşünə vəsiqə qazandığına görə Patimat Abakarova təsəlliverici qrupda mübarizə apardı. Həmin qrupun birinci görüşündə Patimat Abakarovanın rəqibi Çin nümayəndəsi Vu Yinyu oldu. Vu Yinyu 2008 və 2012-ci il olimpiadalarının qalibi olan təcrübəli idmançı idi. Gərgin idman mübarizəsi şəraitində baş tutan görüşdə Patimat Abakarova rəqibinə 5:4 hesabı ilə qalib gəldi və bürünc medal uğrunda görüşə vəsiqə qazandı. Bu görüşdə isə onun rəqibi Fransa nümayəndəsi Yasmin Əziz oldu. Həmin görüş Azərbaycanın Olimpiya Oyunları tarixində əhəmiyyətli görüş oldu. Rəqibi üzərində 8:2 hesabı ilə qalib gələn Patimat Abakarova XXXI Yay Olimpiya Oyunlarının bürünc medalına sahib oldu.^[146] Bununla da Patimat Abakarova bu idman növü üzrə olimpiya medalına sahib olan birinci Azərbaycan idmançısı oldu.^[147][148]

Avqustun 19-da Rio-de-Janeyro Olimpiadasında Avropa Oyunlarının və Avropa Çempionatının qalibi Milad Beygi və Dünya və Avropa Çempionatlarının medalçısı Fəridə Əzizova mübarizə apardı. Milad Beygi olimpiadanın 1/8 final mərhələsində Mali nümayəndəsi İsmayıl Kulibali ilə üz-üzə gəldi. İsmayıl Kulibali son Dünya Çempionatının bürünc medalçısı idi. Həmin görüşdə Milad Beygi rəqibi üzərində 13:6 hesabı ilə qələbə qazandı və nəticədə olimpiadanın 1/4 final mərhələsinə adladı. Bu mərhələdə onun rəqibi İran nümayəndəsi Mehdi Xodabaxşi oldu. Rəqib son Dünya Çempionatının qalibi və olimpiadanın əsas favoritlərindən biri idi. Həmin görüşdə Milad Beygi rəqibi üzərində 17:5 hesabı ilə qələbə qazandı və olimpiadanın yarım-final mərhələsinə adladı. Finala gedən yolda onun rəqibi Birləşmiş Krallıq nümayəndəsi Lutalo Məhəmməd oldu. Lutalo Məhəmməd dörd il əvvəl Londonda baş tutan olimpiadanın bürünc medalına sahib olmumuşdu. Gərgin idman mübarizəsi şəraitində baş tutan görüşdə Milad Beygi rəqibinə 7:12 hesabı ilə məğlub oldu. Bununla da Milad Beygi mübarizəsini bürünc medal uğrunda görüşdə davam elədi. Bu görüşdə onun rəqibi Polşa nümayəndəsi Pyotr Pazinsi oldu. Bu görüşdə Milad Beygi rəqibi üzərində vaxtından əvvəl 12:0 hesabı ilə qələbə qazandı və olimpiadanın bürünc medalına sahib oldu.

Qadınların turnirində çıxış edən Fəridə Əzizova isə olimpiadanın 1/8 final mərhələsində ABŞ nümayəndəsi Peyce Ferson ilə üz-üzə gəldi. Peyce Ferson son olimpiadanın bürünc medalçısı idi. Gərgin idman mübarizəsi şəraitində baş tutan görüşdə Fəridə Əzizova rəqibi üzərində 6:5 hesabı ilə qələbə qazandı və nəticədə olimpiadanın 1/4 final mərhələsinə adladı. Bu mərhələdə onun rəqibi Özbəkistan nümayəndəsi Nigar Tursunqulova oldu. Rəqib gənc və son Asiya Çempionatının bürünc medalçısı idi. Həmin görüşdə Fəridə Əzizova rəqibi üzərində 5:1 hesabı ilə qələbə qazandı və olimpiadanın yarım-final mərhələsinə adladı. Finala gedən yolda onun rəqibi Cənubi Koreya nümayəndəsi O Hi-Ri oldu. O Hi-Ri son Dünya Çempionatının qalibi idi. Gərgin idman mübarizəsi şəraitində baş tutan görüşdə Fəridə Əzizova rəqibinə 5:6 hesabı ilə məğlub oldu. Bununla da Fəridə Əzizova mübarizəsini bürünc medal uğrunda görüşdə davam elədi. Bu görüşdə onun rəqibi Niger nümayəndəsi Rut Qabi oldu. Bu görüşdə Fəridə Əzizova rəqibinə 1:7 hesabı ilə məğlub oldu və olimpiadanı beşinci pillədə başa vurdu.

Avqustun 20-də son olaraq 2015-ci il Dünya Çempionatının qalibi olan Radik İsayev mübarizə apardı. Radik İsayev turnirin reytinq cədvəlində 16 idmançı sırasında üçüncü pillədə qərarlaşmışdı.^[145] 1/8 final mərhələsi çərçivəsində baş tutan birinci görüşdə onun rəqibi Qazaxıstan nümayəndəsi Ruslan Japarov oldu. Həmin görüşdə Radik İsayev rəqibi üzərində 11:2 hesabı ilə qələbə qazandı və olimpiadanın 1/4 final mərhələsinə adladı. Bu mərhələdə Radik İsayev turnirin favoritlərindən biri olan 2008-ci il olimpiadasının qalibi Cənubi Koreya təmsilçisi Ça Donq-Min ilə qarşılaşdı. Gərgin idman mübarizəsi şəraitində baş tutan görüşdə Radik İsayev rəqibini 12:8 hesabı ilə məğlub elədi və Rio-de-Janeyro Olimpiadasının yarım-final mərhələsinə adladı. Bu mərhələdə onun rəqibi Birləşmiş Krallıq nümayəndəsi Maham Ço oldu. Həmin görüşdə də üstün tərəf Radik İsayev oldu. Radik İsayev rəqibi üzərində 4:1 hesabı ilə qələbə qazandı və Rio-de-Janeyro Olimpiadasının final görüşünə vəsiqə qazandı. Həlledici görüşdə isə Radik İsayevin rəqibi Niger nümayəndəsi Abdul İssufu oldu. Final görüşündə Radik İsayevrəqibinə 6:2 hesabı ilə qalib gəldi və XXXI Yay Olimpiya Oyunlarının qızıl medalına sahib oldu.^[149] Radik İsayev bu idman növü üzrə Olimpiya Oyunlarının qalibi olan birinci Azərbaycan idmançısı oldu.^[150]

  Əsas məqalə: Trek velosipedi 2016 Yay Olimpiya Oyunlarında

• Q — növbəti mərhələyə adladı
• Qəl. — qalib gəldi
• Məğ. — məğlub oldu

Rio-de-Janeyro Olimpiadasında bu idman növü üzrə turnirlər 11–16 avqustda baş tutdu. Azərbaycanı bu idman növü üzrə Olqa İsmayılova təmsil elədi.^[1][151] Olqa İsmayılova bu idman növü üzrə Azərbaycanı Olimpiya Oyunlarında təmsil edən birinci idmançı olaraq tarixə düşdü. Olqa İsmayılova 2016-cı ildə Birləşmiş Krallıqda baş tutan Dünya Çempionatının nəticələrinə əsasən olimpiya lisenziyasına sahib oldu.

Olqa İsmayılova Rio-de-Janeyro Olimpiadasında avqustun 13-də mübarizə apardı. Keyrin turnirində çıxış edən Olqa İsmayılova təsnifat mərhələsinin 4-cü qrupunda 11.696 saniyə nəticə göstərdi. Bu nəticələrə əsasən Olqa İsmayılova qrupu yeddin velosipedçi sırasında dördüncü pillədə başa vurdu və mübarizəni təsəlliverici qrupda davam elədi. Bu qrupda da Olqa İsmayılova uğursuz çıxış elədi. 11.442 saniyə nəticə göstərən Olqa İsmayılova dörd idmançı sırasında sonuncu — dördüncü pillədə qərarlaşdı və Rio-de-Janeyro Olimpiadasında mübarizəsini başa vurdu.^[152]

Avqustun 14-də isə Olqa İsmayılova Rio-de-Janeyro Olimpiadasında sprint növündə mübarizə apardı. Təsnifat mərhələsində Olqa İsmayılova 11.152 saniyə nəticə göstərdi və mərhələni 27 velosipedçi sırasında 18-ci pillədə başa vurdu. 1–18-ci pillələrin sahibi 1/16 final mərhələsinə vəsiqə qazandı. Olqa İsmayılova bu mərhələdə Dünya Çempionatının qalibi Birləşmiş Krallıq nümayəndəsi Bessi Ceyms ilə mübarizə apardı. Nəticədə Olqa İsmayılova 11.532 saniyə, Bessi Ceyms isə 11.366 saniyə nəticə göstərdi. Rəqibindən 0.164 saniyə geri qalan Olqa İsmayılova mübarizəsini təsəlliverici qrupda davam elədi. Bu qrupda Olqa İsmayılova Niderland nümayəndəsi Laurin van Reyssen və Avstraliya nümayəndəsi, olimpiya çempionu Anna Mares ilə mübarizə apardı. Nəticələrə əsasən Olqa İsmayılova 11.784 saniyə nəticə göstərdi və sadəcə Anna Maresdən geri qaldı. Bununla da Olqa İsmayılova olimpiadada mübarizəsini dayandırdı və turniri 21-ci pillədə başa vurdu^[153]

  Əsas məqalə: Triatlon 2016 Yay Olimpiya Oyunlarında

• DNF — bitirmədi

Rio-de-Janeyro Olimpiadasında triatlon idman növü üzrə turnirlər 18 və 20 avqustda baş tutdu. Azərbaycanı bu idman növü üzrə Rostislav Pevtsov təmsil elədi.^[1][154] Rostislav Pevtsov bu idman növü üzrə Azərbaycanı Olimpiya Oyunlarında təmsil edən birinci idmançı olaraq tarixə düşdü.

Kişilərin turnirində çıxış edən Rostislav Pevtsov avqustun 18-də mübarizə apardı.^[155] 1 saat 52 dəqiqə 06 saniyə nəticə göstərən Rostislav Pevtsov olimpiadanı 55 idmançı sırasında 39-cu pillədə başa vurdu.^[155]

  Əsas məqalə: Üzgüçülük 2016 Yay Olimpiya Oyunlarında

• Q — növbəti mərhələyə adladı

Rio-de-Janeyro Olimpiadasında üzgüçülərin turniri 6–14 avqustda baş tutdu. Azərbaycanı bu idman növü üzrə Boris Kirillov və Fatimə Alkərəmova təmsil elədi.^[1] Boris Kirillov və Fatimə Alkərəmova Beynəlxalq Su idmanı Federasiyası (FINA) tərəfindən verilən lisenziyalara əsasən olimpiada da mübarizə apardı.^[156][157] Fatimə Alkərəmova Azərbaycanı Olimpiya Oyunlarında təmsil edən ən gənc idmançı olaraq tarixə düşdü.

Avqustun 10-da olimpiada da Boris Kirillov və Fatimə Alkərəmova mübarizə apardı. 200 metr məsafəyə brass üsulla üzmə turnirində çıxış edən Boris Kirillov təsnifat mərhələsinin A qrupunda 2:05.01 dəqiqə nəticə göstərdi.^[158] Bu nəticələrə əsasən Kirillov ümumi nəticədə olimpiadanı 26 üzgüçü sırasında sonuncu — 26-cı pillədə başa vurdu.^[158]

100 metr məsafəyə sərbəst üsulla üzmə turnirində çıxış edən Fatimə Alkərəmova isə təsnifat mərhələsinin A qrupunda 58.44 saniyə nəticə göstərdi.^[159] Bu nəticələrə əsasən Alkərəmova ümumi nəticədə olimpiadanı 46 üzgüçü sırasında 41-ci pillədə başa vurdu.^[159]

  Əsas məqalə: Yüngül atletika 2016 Yay Olimpiya Oyunlarında

• Q — növbəti mərhələyə adladı

Rio-de-Janeyro Olimpiadasında yüngül atletlərin turnirləri 12–22 avqustda baş tutdu. Azərbaycanı bu idman növü üzrə dörd atlet təmsil elədi.^[1] Hayle İbrahimov Avropa Çempionatının qalibi, Anna Skidan Universiada Oyunlarının qalibi, Nazim Babayev isə gənclər arasında Avropa Çempionatının qalibi idi. Marafon turnirində çıxış edən Evans Kiplaqat nüfuzlu beynəlxalq turnirlərin qalibi olmasa da, Rio-de-Janeyro Olimpiadasının mübarizə aparmaqla Azərbaycanı marafonlarda təmsil edən birinci idmançı olaraq tarixə düşdü.

Avqustun 12-də qadınların çəkic atma turnirində çıxış edən Anna Skidan mübarizə apardı. Təsnifat mərhələsinin B qrupunda çıxış edən Anna Skidan 70.08 metr nəticə göstərdi. Bu nəticələrə əsasən Anna Skidan 32 idmançı sırasında mərhələni 13-cü pillədə başa vurdu. Reqlamentə əsasən 1–12-ci pilləni tutan atletlər final mərhələsinə vəsiqə qazandı. Bu minvalla da Anna Skidan Rio-de-Janeyro Olimpiadasında mübarizəsini başa vurdu.

Avqustun 15-də isə üçtəkanla tullanma turnirində çıxış edən Nazim Babayev mübarizə apardı. Təsnifat mərhələsində çıxış edən Nazim Babayev 16.38 metr nəticə göstərdi və mərhələni 48 atlet sırasında 25-ci pillədə başa vurdu. Bununla da Nazim Babayev Rio-de-Janeyro Olimpiadasında mübarizəsini dayandırdı.

5000 metr məsafəyə qaçış turnirində çıxış edən Hayle İbrahimov avqustun 18-də mübarizə apardı. Təsnifat mərhələsinin birinci qrupunda çıxış edən Hayle İbrahimov 14:26.11 dəqiqə nəticə ghöstərdi. Bu nəticələrə əsasən Hayle İbrahimov qrupda 25 atlet sırasında yeddinci pillənin sahibi oldu. Ümumi nəticədə isə Hayle İbrahimov 50 atlet sırasında 18-ci pillədə qərarlaşdı və Hayle İbrahimov Rio-de-Janeyro Olimpiadasında mübarizəsini dayandırdı.

Olimpiadanın son günün, avqustun 21-də marafon turnirində çıxış edən Evans Kiplaqat mübarizə apardı. 2 saat 15 dəqiqə 30 saniyə nəticə göstərən Evans Kiplaqat 155 atlet sırasında Rio-de-Janeyro Olimpiadasını 28-ci pillədə başa vurdu.

Rio-de-Janeyro Olimpiadasından sonra Azərbaycan Milli Olimpiya Komandasının heyətindən bir sıra idmançılar və məşqçilər təltif edildi. Azərbaycan Prezidenti İlham Əliyevin 1 sentyabr 2016-cı il tarixli 2292 nömrəli Sərəncamına əsasən XXXI Yay Olimpiya Oyunlarında qazandığı nailiyyətlərə və Azərbaycan idmanında xidmətlərinə görə olimpiya çempionu Radik İsayev 1-ci dərəcəli "Vətənə xidmətə görə" ordeni ilə, olimpiadanın gümüş medalçıları Mariya Stadnik və Xetaq Qazyumov 2-ci dərəcəli "Vətənə xidmətə görə" ordeni ilə, Elmar Qasımov, Rüstəm Orucov, Valentin Demyanenko, Lorenso Sotomayor və Toğrul Əsgərov isə 3-cü dərəcəli "Vətənə xidmətə görə" ordeni ilə təltif edildi.

Olimpiadanın bürünc medalçıları İnna Osipenko-Radomska, Kamran Şahsuvarlı və Şərif Şərifov, həmçinin yunan-roma güləşi üzrə Azərbaycan yığmasının baş məşqçisi Cəmşid Xeyirabadi, qadın güləşi üzrə Azərbaycan yığmasının baş məşqçisi Semyon Çeterev və məşqçisi Aslan Ağayev, sərbəst güləş üzrə Azərbaycan yığmasının baş məşqçisi Firdovsi Umudov və Saypulla Absaidov, boks üzrə Azərbaycan yığmasının baş məşqçisi Pedro Roq və məşqçisi Martinez Lazaro Ximenez, cüdo üzrə Azərbaycan yığmasının baş məşqçisi Peter Zeyzenbaxer və məşqçisi Fərhad Məmmədov, taekvondo üzrə qadınlardan ibarət Azərbaycan yığmasının baş məşqçisi Pa Su Min, məşqçiləri Ələkbər İmaməliyev və Tərənnüm Bayramov, habelə Toğrul Əsgərovun şəxsi məşqçisi Elçin Zeynalov, Rəsul Çunayevin şəxsi məşqçisi İsmayıl Çöpçiyev və Hacı Əliyevin şəxsi məşqçisi Elman Əzimzadə isə "Tərəqqi" medalı ilə təltif edildi. Taekvondo üzrə Azərbaycan yığmasının baş məşqşisi Reza Mehmandost və məşqçisi Elnur Amanov isə "Şöhrət" ordeni ilə təltif edildi.^[160]

• Azərbaycan 2016 Yay Paralimpiya Oyunlarında