Fallout 76 - Wikipedia

"Fallout 76" açıq dünyalı, onlayn çoxnəfərli döyüş rol videooyunudur. "Fallout 76" "Bethesda Game Studios" studiyasının yaratdığı ilk onlayn çoxnəfərli oyundur.^{[5][qeyd 3]} Buna baxmayaraq, oyunun kiçik həcmli birnəfərli hissələri də var.^[6][7] "Fallout 76"-nın geympleyi "Fallout" oyunlarının geympleyinə çox bənzəyir. Oyunda birinci və üçüncü şəxs perspektivlərinə dəyişə bilən bir kamera sistemi mövcuddur. Oyunun ilkin buraxılışında robotlardan başqa qeyri-oyunçu personaj yox idi.^[8] Buna baxmayaraq, 2019-cu iyun ayında "Bethesda Game Studios" oyunun ilk əsas yeniləməsini açıqlamış, oyuna qeyri-oyunçu personajlar daxil etmişdir.^[9] Oyunçu dünyanı sərbəst gəzə və söhbətlərdən istədiyi vaxt çıxa bilər. Oyunçu bir yeri kəşf etdikdən sonra müəyyən qədər butulka qapağı ödəyərək oraya sürətli-səyahət edə bilərlər.^[10]

Oyunçu personajların səs aktyorları yoxdur və dialoq seçimləri çox məhdudidir.^[11] Oyunun hər bir serverində maksimum 24 oyunçu olur.^[11][12] Oyunun bütün serverləri ayrılmışdır və oyunçular onların birinə avtomatik olaraq təyin edilir, ancaq oyunçular öz dostlarını oynadıqları serverə dəvət edə bilərlər.^[13] Oyunçular həmçinin dörd nəfərlik oyunçu qrupları da qura bilərlə.^[14] Oyunun yalnız ictimai serverlərlə buraxılacağı gözlənilsə də, "Bethesda Game Studios" studiyasının rejissoru Todd Hovard özəl serverlərin yaradılması xüsusiyyətinin buraxılışdan bir müddət sonra, ictimai serverlərin sabitliyi tamamilə təmin olduqda aktivləşəcəyini açıqlamışdır.^[15]

"Fallout 76"-nın çoxnəfərli rejim funksiyalarına oyunçu oyunçuya qarşı (abr. OOQ və ya PvP, ing. Player versus Player) döyüş vəziyyəti də daxildir. Bu, 5 səviyyədən yüksək hər bir oyunçu üçün aktivdir.^[16] Buna baxmayaraq, oyunçular seçimlər menyusunda pasifist bayrağını aktivləşdirərək OOQ vəziyyətini qeyri-aktivləşdirə bilərlər.^[17] Oyunçular hər hansı bir oyunçu personajı məğlub edərək butulka qapaqları qazana bilərlər, ancaq əldə edilən butulka qapaqlarının miqdarı məğlub edilən oyunçu personajın səviyyəsindən asılıdır.^[18] Oyunçu personaj digər oyunçu personajlara minimal zərər yetirərək onları təkbətək döyüşə çağıra bilərlər. Əgər zərər alan oyunçu cavab zərbəsi yetirsə bu zaman təkbətək döyüş başlayır. Bu vəziyyətdə aşağı və yuxarı səviyyəli oyunçuların zərbə gücü və sağlamlıq sayğacı bir qədər bərabərləşir. Cavab zərbəsi yetirməyən oyunçu personajları qətlə yetirən oyunçular xəritədə "qatil" (ing. Murderer) olaraq nişanlanırlar və onları öldürən oyunçulara daha böyük miqdarda butulka qapağı verilir.^[19]

Oyunda oyunçuların bir-birlərinə atmaları və ya resursları aşkar etmək üçün nüvə raketləri də mövcuddur. Nüvə raketlərinin partladığı yerlərə daxil olub resursları əldə etmək üçün oyunçulara güclü anti-radiasiya qurğuları lazımdır.^[20] Oyunçular həlak olan digər oyunçuları stimpaklarla (ing. Stimpacks) sağalta bilərlər.^[21] Oyun zamanı ölən və ya öldürülən oyunçular daşıdıqları əşyaları itirirlər. Yenidən peyda olduqdan sonra onlara həmin əşyaları geri götürmək üçün tapşırıq verilir.^[22]

Oyun "Fallout 4"ün dünyasından dörd qat daha böyük bir dünyaya malikdir.^[23] Oyunun əsas süjetinin cərəyan etdiyi Qərbi Virciniya burada "Appalaç" (ing. Appalachia) adlanır. Appalaç əsasən şəhərətrafı coğrafiyaya malikdir. Buna görə də, "Böyük müharibə" (ing. "The Great War") zamanı çox az zərər görmüşdür. Buna baxmayaraq, regionda radiasiyalı mutantlaşmış məxluqlar yaşayır.^[24] Oyunda Qərbi Virciniya Ştat Kapitolu, Qrinbriye, Uidbern dairəsi Nyu-River-Qorc körpüsü və Kamden Park kimi gerçəkdə olan yerlər var.^[25][26] Buna əlavə olaraq, oyunda Qərbi Virciniya folklorundakı Fletvud və Kəpənək-adam kimi mutasiyaya məruz qalmış bədheybətlər mövcuddur.^[6][27] Appalaç 6 regiondan ibarətdir. Onlar – "Şlak uçurumu" (ing. Ash Heap), "Bataqlıq mərcanı" (ing. Cranberry Bog), "Meşə" (ing. The Forest), "Bataqlıq" (ing. The Mire), "Vəhşi sərhəd" (ing. Savage Divide), "Zəhərli vadi" (ing. Toxic Valley).^[28]

Oyunun kraftinq sistemi daha da çox təkmilləşdirilmişdir. Oyunçular dülgər stolunda (ing. Workbench) qida, zireh və silahlar kimi fərqli-fərqli şeylər hazırlaya bilərlər. "Fallout: New Vegas"da olduğu kimi "Fallout 76"-da da sursat hazırlamaq olur. Modifikasiyalar silahlar və zirehlərə uzun nişangah və süngü kimi əvvəlcədən müəyyən edilmiş komponentləri yerləşdirməklə edilir. Oyunçular hansısa bir silahı dəmir qırıntısına çevirərək silah üçün yeni modifikasiyalar kəşf edə bilərlər. Həm kraftinq, həm modifikasiyanın təməli xam komponentlər yığmaqdır. Oyunçular bu materialları əldə etmək üçün obyektləri dəmir qırıntısına çevirə bilərlər.^[29] "Dülgər stolu rejimi"ndə (ing. Workshop mode) olan zaman bu cür obyektlər sarı və yaşıl rənglə verilir. Yaşıl yeri dəyişilə bilən, sarı isə yeri dəyişilə bilməyən obyektləri təmsil edir.^[30]

İlk dəfə "Fallout 4"-də təqdim edilmiş bazatikmə funksiyası da geri dönən funksiyalardan biridir, ancaq bu funksiya çoxlu dəyişikliklərə məruz qalmışdır. İlkin olaraq, yaşayış məntəqələri Konstruksiya və Assambleya Mobil Platforması (abr. K.A.M.P. və ya C.A.M.P., ing. Construction and Assembly Mobile Platform) ilə qurulur.^[31] K.A.M.P.-ı istənilən düz ərazidə quraşdırmaq olar, ancaq bu proses müəyyən miqdarda butulka qapağı tələb edir. Oyunçular hansısa bir serverdə qurduğu yaşayış məntəqəsini daha sonra başqa bir serverdə yenidən quraşdırmaq üçün K.A.M.P.-da saxlaya bilər. Saxlanılan yaşayış məntəqələri həmin serverdə istənilən zaman K.A.M.P. vasitəsilə başqa bir yerə köçürmək olar.^[32] Əvvəlki iterasiyada olduğu kimi yaşayış məntəqəsi sistemi üç əsas ehtiyat ətrafında qurulub. Onlar — elektrik, su və qida. Oyunçular öz yaşayış məntəqələrini "Bədheybət basqını" (ing. Monster Invasion) adlı hücumlardan qorumaq üçün tarretlər və tələlər kimi müdafiə qurğuları qura bilərlər.^[33] Çoxnəfərli rejimdə yaşayış məntəqəsinin tikinti və inkişafında bir neçə oyunçu iştirak edə bilər.^[34]

Oyunçu personajın biləyinə bağlanan Pip-Boy şəxsi bir hesablayıcı qurğudur. Pip-Boy vasitəsilə oyunçular oyun menyusuna daxil ola bilərlər. Oyun-içi menyuda statistikalar, xəritələr, məlumatlar və s. mövcuddur. "Fallout 76"-da ilk dəfə "Fallout 3"-də təqdim olunan və istifadə etdikdə oyunçunun hansısa bir düşmənin müəyyən hissələrinə atəş açması üçün vaxtı yavaşladan Volt-Tek Yardımlı Hədəfləmə Sistemi (abr. V.Y.H.S. və ya ing. Vault-Tec Assisted Targeting System — V.A.T.S) də var.^[35] Keçmiş iterasiyalarda V.Y.H.S-dən istifadə edən zaman gerçək-zamanlı oyun yavaşlayırdı. Bununla oyunçular düşmənlərini məğlub etmək üçün bu sistemdən fikirləşərək istifadə edirdilər. "Fallout 76"-da funksiyanın bu xüsusiyyət yığışdırılmışdır.^[36]

Oyunçular "S.P.E.C.I.A.L." (azərb. G.Q.D.X.K.U.‎, "Güc, Qavrama, Dözümlülük, Xarizma, Kəşfiyyat, Cəldlik və Uğur" sözləri üçün bir abreviatur) personaj irəliləyiş sistemində hər atribut üçün bir xal ilə başlayırlar. Sistem 7 statistikanı (və ya atribut) — "Güc, Qavrama, Dözümlülük, Xarizma, Kəşfiyyat, Cəldlik və Uğur"u təmsil edir.^[37] Oyunçular yeni səviyyə əldə etmək üçün kifayət qədər təcrübə xalları yığanda hər hansı bir atributa vermək üçün yeni xal əldə edirlər. Bu proses 50-ci səviyyəyə qədər davam edir. Bu səviyyədən sonra oyunçular yeni səviyyə əldə edə bilərlər, lakin onlara yeni xallar verilmir. Hər bir atributa maksimum 15 xal vermək olar.^[38] Əvvəlki iterasiyada olduğu kimi "Fallout 76"-da da üstünlüklər (artıq üstünlük kartları) daha keçmiş epizodlardakı bacarıqların yerini alır. Bu kartlardan istifadə etmək üçün müəyyən qədər S.P.E.C.I.A.L. xalına ehtiyac var. İki eyni kartı birləşdirərək səviyyəsi daha yüksək olan üstünlük kartları əldə etmək olur, ancaq onlardan istifadə etmək üçün lazım olan S.P.E.C.I.A.L. xalı daha çoxdur. Yüksək səviyyəli kartların effektlrəi də çox olur. Oyunçulara hər S.P.E.C.I.A.L. atributu üçün bir üstünlük kartı daşıya bilərlər. Oyunçulara 4-cü, 6-cı, 8-ci, 10-cu və daha sonrakı hər 5-ci səviyyədə üstünlük kartı paketi verilir.^[39] Bu proses 50-ci səviyyəyə qədər davam edir. Üstünlük kartı paketlərinin hər birində cəmi 4 kart olur. Oyunçular əldə etdikləri üstünlük kartlarını digər oyunçulara verə bilərlər. Oyunda cəmi 205 üstünlük kartı mövcuddur.^[40]

Digər oyunçularla qarşılıqlı əlaqə emosiya çarxı vasitəsilə saxlanılır.^[41] "Fallout 76"-da şəkil rejimi də var. Oyunçular öz personajlarının şəkillərini müxtəlif pozalarda müxtəlif mimikalar və filterlərlə çəkə bilərlər.^[42]

Todd Hovard 2018-ci ildə təşkil edilən E3 tədbirində Ceff Keyli ilə keçirdiyi müsahibədə Hovard oyunun tapşırıq sisteminin keçmiş "Fallout" oyunlarındakı "miscellaneous" (azərb. müxtəlif‎) kateqoriyasındakı tapşırıqlara bənzəyəcəyini demişdir.^[43] Tapşırıqlar oyunçulara holodisklər, terminallar və qeyd dəftərlərində verilir.^[44] Əlavə olaraq, Hovard "IGN" ilə keçirdiyi müsahibədə robotların tapşırıq hekayələrini və keçmiş iterasiyalarda qeyri-oyunçu personajlar tərəfindən göstərilən digər ənənəvi rolları verəcəyini demişdir.^[45]

"Fallout 76" bir mikroödəniş sisteminə malikdir. Oyunçular atomlar (ing. Atoms) satın alıb onları "Atom mağazası"ında (ing. Atomic shop) xərcləyə bilərlər. Buna baxmayaraq, oyunçular xüsusi tapşırıqları (və ya meydan oxumalar, ing. Challenges) yerinə yetirərək də kiçikhəcmli atomlar qazana bilərlər.^[46] Mağazada kozmetik əşyalar, K.A.M.P. əşyaları, şəkil rejimi üçün pozalar və çərçivələr, emosiya çarxı üçün reaksiyalar və ikonalar satılır.^[47][48] Bu mağazada satılan kozmetik əşyaları Appalaçda tapmaq mümkündür.^[49] Satın alınan əşyalar oyunçunun yaratdığı bütün personajlar üçün aktivdir.^[50] Silah-sursat kimi geympleyə təsir edən resurları atomlarla satın almaq olmur.^[51]

Oyunun əsas hekayəsi "Fallout 4"-dən 185 il əvvəl, "Böyük müharibə"dən (ing. The Great War) isə 25 il sonra, yəni 2102-ci ildə cərəyan edir. Oyun ABŞ-nin Qərbi Virciniya ştatında, postapoliktik və retro-futuristik bir regionda keçir. "Fallout 76"-nın süjet xəttinin cərayan etdiyi tarix "Fallout" seriyasındakı ən erkən tarixdir.^[52]

Oyun 1940-cı və 1950-ci illərin estetikasını və dizaynını ilə birlikdə böyük səviyyədə inkişaf etmiş bir texnologiyası olan bir alternativ dünyada keçir. Yaranan retro-futuristik dünyada insan texlonogiyası lazer silahlar istehsal edəcək, genləri dəyişdirəcək və az qala tam muxtariyyətə sahib olan süni intellektlər yaradacaq səviyyədə inkişaf etmişdir. Texlonogiyanın əhəmiyyətli şəkildə inkişaf etməsinə baxmayaraq, insan mədəniyyəti o qədər də inkişaf etməmişdir. Binaların arxitekturası, reklam afişaları və insanların ümumi yaşayış tərzi 1950-ci illərdən bəri çox da dəyişməmişdir. Oyun 2097-ci ildə açılan və 17 nəzarət sığınacağından biri olan "Sığınacaq 76" (ing. Vault 76) ilə bağlıdır.^[53]

"Böyük müharibə"dən sonra sağ qalanlar arasında müxtəlif fraksiyalar yaranmağa başlamışdır. Onlara müharibədən əvvəl təsis edilmiş "Anklav" (ing. Enclave) və "Azad Ştatlar" (ing. Free States), eləcə də müharibədən sonra təsis edilmiş "Polad Qardaşlığı" (ing. Brotherhood of Steel), "Xilasedicilər" (ing. Responders) və reyderlər daxildir, lakin onların hamısı "Yanmışlar" tərəfindən məhv edilmişdir.^[24]

Appalaç Azad Ştatları (ing. Appalachian Free States) – 2102-ci ildən əvvəlki dövrdə Appalaçda fəaliyyət göstərmiş fraksiya. Böyük müharibədən əvvəl təsis edilmiş bu fraksiya seperatçı bir hərəkat idi. Bəzən yerli hakimiyyətlə qanlı münaqişələrə girmələrinə baxmayaraq, ABŞ senatoru Sem Blekuell həmişə onları tərifləyər və dəstəkləyərdi.^[54] Azad ştatlılar hökumətlə bağlı sui-qəsd nəzəriyyələrinə inanırdılar.^[55] Azad Ştatlar öz müstəqilliklərini Böyük müharibə başlamazdan bir qədər əvvəl elan etdilər.^[56] Azad ştatlılar hazırladıqları beton bunkerlər sayəsində radioaktiv-yağıntıdan sağ çıxdılar.^[57] 2079-cu ildə onlar bunkerlərindən çıxmış Harpers Ferri (ing. Harpers Ferry) qəsəbəsini geri almışdılar, ancaq daha sonra "Bataqlıq" adlanan regiondakı kəskin şəkildə mutasiyaya uğramış təbiəti görüb təəccüblənmişdilər. Onlar "Polad Qardaşlığı" və "Xilasedicilər" kimi yeni qurulan fraksiyalarla ilkin əlaqəni yaratsalar da əcnəbilər barədə pisfikirli idilər. Azad ştatlılar naməlum bir tarixdə yanmışların hücumuna məruz qaldılar və qəsəbələrini tərk etməli oldular. Onlara qarşı tədbir görmək üçün hazırlaşsalar da azad ştatlılar qısa bir müddət sonra tamamilə məhv edildilər.^[58]

Appalaç Polad Qardaşlığı (ing. Appalachian Brotherhood of Steel) – 2102-ci ildən əvvəlki dövrdə fəaliyyət göstərmiş "Polad Qardaşlığı"nın (ing. Brotherhood of Steel) Appalaç filialı. Fraksiya Paladin Elizabet Taqqerdi tərəfindən təsis edilmişdir. Böyük müharibədən əvvəl Leytenant Elizabet Taqqerdi xüsusi təyinatlı bir ABŞ Silahlı Qüvvələri Gözətçi vahidinə rəhəbrlik edirdi. Appalaçda fəaliyyət göstərən bu vahid daha sonra "Taqqerdinin şimşəyi" (ing. Taggerdy's Thunder) ləqəbini qazanmışdır. Müharibədə canını qurtaran vahid sonralar Kapitan Rocer Meksonla əlaqə qurur. Mekson Lost Hills bunkerindəki bütün süni peyk rabitə sistemlərinin idarəsini almışdı və yenicə qurduğu "Polad Qardaşlığı" qoşulmağı üçün hərbçi axtarırdı.^[59] Taqqerdi ilkin danışıqlar zamanı təşkilat barədə şübhəli olsa da, axırda Meksonun dəvətini qəbul edir. Taqqerdi və qoşunları Defians qəsri (ing. Fort Defiance) olaraq tanınan Alleqeni dəlixanasında post qurur.^[60] Yanmışlar adlı mutantların əmələ gəlməsindən sonra Appalaç Polad Qardaşlığının əsas hədəfi patogenin qarşısını almaq və məhv etmək olmuşdur. Hərbi təcrübə və güclü silahlara malik olmaqlarına baxmayaraq, Appalaç Polad Qardaşlığı uğursuz olmuşdur. Defians qalasının son hərbçiləri ölümlərindən əvvəl yerlilərə radio ilə xəbərdarlıq vermişdir.^[61]

Xilasedicilər (ing. Responders) – 2102-ci ildən əvvəlki dövrdə Appalaçda fəaliyyət göstərmiş fraksiya. Xilasedicilər təşkilatı təxminən 2077-ci ildə təsis edilib. Onlar könüllü yanğınsöndürənlər, polislər və tibbi heyətdən ibarət idilər. Onlar sağ qalanlara kömək etmək müxtəlif qəsəbələrdə stansiya qurmuşdular. Buna əlavə olaraq, onlar insanlara sağ qalmağın təməllərini öyrətmək üçün proqram təminatları da hazırlamışdılar.^[62] Yanmışların əmələ gəlməsindən sonra xilasedicilər çətin vəziyyətə düşmüş, qısa bir müddət ərzində məhv olmuşdular.^[63]

Reyderlər (ing. Raiders) – 2102-ci ildən əvvəlki dövrdə Appalaçda fəaliyyət göstərmiş qəddar, zorakı quldurlardan ibarət fraksiya. Fraksiya 5 bandadan ibarət idi. Onlar – Boğazkəsənlər (ing. Cutthroats), Əyilməzlər (ing. Diehards), Blekuater quldurları (ing. Blackwater Bandits), Qurmanlar (ing. Gourmands) və Tələçilər (ing. Trappers). Reyderlər Çöllükdəki quldurluq fəaliyyətlərinə Böyük müharibə bitdikdən sonra başlayıblar. Appalaçdakı reyder bandaları "Vəhşi sərhəd"dəki dağlara qaçanlar tərəfindən qurulmuşdur. Onlar illər boyu bir-birləriylə ittifaq qurmuş və ya vuruşmuşdur. Yanmışların əmələ gəlməsindən sonra reyderlər çətin vəziyyətə düşmüş, qısa bir müddət ərzində məhv olmuşdular. 2102-ci ildə reyderlərin sadəcə robotları fəaliyyət göstərir.^[64]

Yanmışlar (ing. Schorched) – Appalaçda yaşayan yarı-ağıllı xortdanlar. Onların hər birinin fərdi şüuru silinib və yeganə primitiv mənbədən idarə olunurlar.^[62] Onlar həm vəhşi xortdanlardan, həm də ağıllı xortdanlardan fərqlidirlər. Yanmışlar odlu silahlardan istifadə edə bilirlər, ancaq sosial struktura malik deyillər və əcnəbi olaraq gördükləri hər bir canlıya hücum edirlər.^[65]

"Fallout 76"-nı hazırlamaq fikri əhəmiyyətli bir sayda oyunçunun "Fallout 4"-də çoxnəfərli bir rejimin yaradılmasını istəməsindən sonra peyda olmuşdur. Nəticədə, bu konsepsiya üzrə müstəqil bir oyunun yaradılmasına qərar verilmişdir. "Fallout 76" çoxnəfərli geympleyə uyğunlaşmaq üçün "Bethesda Game Studios" studiyasının Creation Engine mühərrikinin modifikasiya olunmuş versiyasından istifadə edir. Mühərriki modifikasiya etmək işini "Bethesda Game Studios Austin" öz öhdəsinə götürmüşdür.^[66] Oyunun istehsalında "ZeniMax Online", "id Software" və "Arkane" studiyalarının da köməyi olmuşdur.^[67]

Mühərrikin yeni versiyası istehsal komandasına oyuna yeni işıqlandırma modelləri, emal prossesləri və daha dəqiq landşaft xəritələməsini daxil etməsinə imkan yaratmışdır. Bu, istehsal komandasına Creation Engine mühərrikinin keçmiş iterasiyalarında yarada bilinəcək dünyalardan 16 dəfə çox təfsilatlı bir dünya yaratmağa icazə vermişdi. Oyunda hər bir regiona məxsus iqlim vəziyyətləri yarada bilmə xüsusiyyətinə və daha böyük bir emaletmə məsafəsinə malik olan bir dinamik hava sistemi də var.^[68]

"Fallout 76" ilk dəfə 30 may 2018-ci ildə elan edilmişdir. Elan treylerindən əvvəl "Bethesda"nın "Twitch" hesabından birbaşa efir verilmişdir. Bu birbaşa efirdə üzərində seriyanın rəmzlərindən biri olan "Xahiş edirik, gözləyin" (ing. Please Stand By) sözləri yazılan bir monitor, həmin monitorun qarşısında isə Valt-Boy babl-hedi göstərilib. Strim ümumi olaraq, iki milyondan çox istifadəçi tərəfindən izlənilmişdir.^[69] Birbaşa efir "Bethesda" studiyasının baş rejissoru Todd Hovardın qısa bir mesajı ilə sona çatmış, ardından isə tizer treyleri verilmişdir. Treylerdə "Sığınacaq 76"-dan (ing. Vault 76) səhnələr göstərilmişdi. Sığınacaq 76 "Fallout 3"-də Vaşinqton şəhərində yerləşən bir "nəzarət" sığınacağı olaraq təsvir edilmişdir,^[70] yəni bu sığınacaqda insanlar üzərində təcrübələr aparılmayıb.^[71] Treylerdə göstərilən səhnələrə "Reklamasiya günü" (ing. Reclamation Day) adlı bir tədbir üçün dekorasiyalar, 27 oktyabr 2102-ci il tarixini (Böyük müharibədən 25 il əvvəl) göstərən bir Pip Boy, naməlum bir Sığınacaq 76 sakini, Con Denverin "Take Me Home, Country Roads" mahnısının ifa olunduğu bir radio və son olaraq, "döyüş bitəndə və radioaktiv yağıntı məskən salanda, siz yenidən qurmalısınız" sitatının olduğu bir yayım daxildir.^[72][73]

Oyun haqda olan təfsilatlar "Bethesda Game Studios"un videooyun rejissoru olan Todd Hovard tərəfindən studiyanın 10 iyun 2018-ci il tarixində E3 2018-də keçirdiyi press konfransında açıqlanmışdır. Hovard oyunun 14 noyabr 2018-ci il tarixində satışa çıxarılacağını və buraxılışdan əvvəl oyunçulara bir açıq betanın veriləcəyini açıqlamışdır.^[74] Daha sonra beta versiyanın sadəcə oyunu öncədən sifariş edənlərə veriləcəyi açıqlanmışdır.^[75] Oyunun beta versiyası Xbox One konsolu üçün 23 oktyabrda, PlayStation 4 konsolu və PC platforması üçün 30 oktyabrda başlamışdır.^[76] Oyunçuların beta zamanı əldə etdikləri hər şey tam oyuna transfer edilmişdir.^[77] Axırıncı beta sessiyası 8 noyabrda sona çatmışdır.^[78]

"Fallout 76"-nın elanından dərhal sonra oyunun ön sifarişi mövcud olmuşdur. Rəsmi treyler buraxıldıqdan sonra "Bethesda" sırası ilə oyunun irəliləyiş sistemi, çoxnəfərli rejimi, kraftinq sistemi barədə, daha sonra isə rəsmi bədii treylerini paylaşmışdır. Oyunun satışa çıxarılmasında iki həftə əvvəl "Bethesda" oyunun məxluqları barədə videoçarxlar paylaşmışdır. "Bethesda"-nın paylaşdığı bütün treylerlər satirik xarakterə malik idi.^[79]

Noyabr ayının başlarında "Bethesda" "Fallout 76"-nı reklam etmək üçün "Microsoft" və "Filadelfiya Seventi Siksers" basketbol klubu ilə əməkdaşlıq etmişdir. Basketbolçu Markell Fults bir neçə reklam-xarakterli satirik süjetlərə çəkilmişdir.^[80]

Avstraliya pərakəndə satış şirkəti olan JB Hi-Fi mağazalarında satılan STACK Magazine jurnalının dekabr 2018-ci il tarixli buraxılışının yanında Fallout 76-nın pulsuz vinili verilirdi.^[81]

Güc Zirehi buraxılışı

"Fallout 76"-nın "Güc Zirehi buraxılışı"na (ing. Power Armor Edition) oyunçuların geyinə biləcəyi bir T-51b Güc Zirehi Dəbilqəsi, bir Uest-Tek (ing. West Tek) çantası, ABŞ-nin müstəqilliyinin üçyüzilliyini qeyd edən bir kitabça, içərisində iyirmi dörd "Fallout" mövzulu heykəlcik olan bir kolleksiya, Qərbi Virciniyanın qaranlıqda parlayan bir xəritəsi, müxtəlif oyun içi əşya və "Fallout 76 B.E.T.A."-ya (ing. Break-It Early Test Application, azərb. Bunu Erkən-Qır Test Applikasiyası‎) erkəndən giriş xüsusiyyəti daxildir.^[75]

Oyunun çoxnəfərli rejimdə olacağının elan edilməsinə bir cavab olaraq, oyunun sadəcə birnəfərli rejimə malik olması ilə bağlı onlayn bir vəsatət hazırlanmışdır. Bu vəsatət ilk gündən minlərlə insan tərəfindən imzalanmışdır.^[82][83]

"Fallout 76"-nın elan olunmasından sonra Qərbi Virciniyada turizmə maraq kəskin şəkildə artmışdır. "West Virginia Explorer" (azərb. Qərbi Virciniya Tədqiqatçısı‎) saytına gələn ziyarətçi sayı oyunun açıqlanmasından sadəcə bir neçə gün sonra düz 15 dəfə artmışdır. Əlavə olaraq, Kamden Park idarə heyəti parkın merçendayzinqinə olan marağın artdığını açıqlamışdır.^[84]

2018 Electronic Entertainment Expo tədbirində göstərilən tizer treylerində Con Denverin "Take Me Home, Country Roads" mahnısının kaver-versiyası var idi.^[72] Seriyanın azarkeşləri mahnıya böyük maraq göstərdilər. Bu, "Bethesda Softworks" şirkətinin mahnını rəqəmlər musiqi servislərində buraxmağa məcbur etmişdir. Buna əlavə olaraq, "Bethesda" mahnıdan gələn bütün gəlirlərin "Habitat for Humanity International" ianə qurumuna veriləcəyini açıqlamışdır.^[85]

Rəy toplayıcısı "Metacritic"ə əsasən "Fallout 76" PC və Xbox One platformalarında "qarışıq və ya orta", Playstation 4 üçünsə "ümumiyyətlə pis" rəylər almışdır.^[86][87][88]

"The Guardian" qəzetinin redaksiya heyətinin üzvü Holli Nyelsen oyunu "post-apokaliptik dünyada mənasız bir gəzinti" adlandıraraq oyunun qeyri-oyunçu personajlarının azlığını və davamsız təbiətini pisləyərək, eyni zamanda dizaynını tərifləyərək oyuna 5 xaldan 2 vermişdir.^[89]

"Forbes" işçisi Pol Tasinin fikrinə görə, "Fallout 76" "Bethesda şirkətinin böyük, nadir bir səhvidir".^[90] "Eurogamer" redaktoru Uizli Yin-Pol oyunu "əcaib, sıxıcı, sınıq bir çirkab" olaraq təsvir etmişdir. O daha sonra "çoxnəfərli bir Fallout arxasınca qaçmağa dəyər bir arzudur … Fallout 76-nın uğursuz bir təcrübə olaraq tarixə düşməsi sadəcə məyyusedicidir" demişdir.^[91]

"Business Insider" publikasiyasının işçisi Ben Gilbert oyunu "bir araya gəlməsi qeyri-mümkün olan və sadəcə mənasız götür-gətir tapşırıqları və təcrübə xalları ilə bir arada tutulan videooyun elementlərinin onlayn bir dünyadakı boş buraxılan yığını" olaraq təsvir etmiş, sonra isə "bu, pis bir oyundur — tamamilə dayandırın" demişdir.^[92]

"Newsweek" redaktoru Mo Mozuç oyunu gözdən keçirərkən "əyləncəli momentlər arasıkəsilməyən fəaliyyət xətaları və pis hazırlanmış oyun sistemləri tərəfindən pozulur" və "digər Fallout azarkeşləri kimi qeyri-obyektivəm və özümü Fallout 76-nı xoşlamağa məcbur edilmiş hiss edirəm, amm mən oyunu xoşlamıram. Fallout 76 buna imkan vermir" demişdir.^[93]

"PCWorld" mütəxəssisi Heyman Dinqman gözdən keçirməni vaxtından tez bitirdi. O, "30 saatdan çox bir müddət davam etmiş zəhlə tökən xəta axınından sonra oyunu oynamağa davam etməmək qərarını aldıq" və "Fallout 76 düzgün şəkildə işləsəydi, möhtəşəm bir oyun olardı. Satışa çıxarıldığı vəziyyəti? O daha bərbaddır" demişdir.^[94] "Metro" qəzetində Fallout 76-nın mühüm bir nəşrçidən gördükləri "ən pis hazırlanmış videooyun" ola biləcəyi deyilmişdir. Daha sonra onlar oyunu texniki qüsurları bir gün düzəldiləcək, ancaq "dizayn müvəffəqiyyətsizlikləri və öz potensialına olan unutqanlığı" tamamilə sınmış olduğunu sübut edən "fəlakətli bir uğursuzluq" olaraq təsvir etmişdilər.^[95] "GameSpot" tənqidçisi Edmond Tren oyun barədə "şöhbətbaz sələflərinə bənzəyə və onların verdiyi hissi verə bilər, ancaq oyun ruhsuz bir təcrübədir" demişdir.^[96] "IGN" redaktoru Brendin Tirellin fikrinə görə "Fallout 76-nın zəngin çöllük xəritəsi xətalar yığını, ziddiyətli ideyalar və monotonluğa görə boş yerə heç olub."^[97] "Giant Bomb" hələ də oyunun tam gözdən keçirməsini buraxmamışdır. Buna səbəb, heyətin oyunu oynamaq istəməməsidir. Redaktor və qurucu Ceff Gerstman təşkil etdikləri bir podkastda "heyətdəki heç kəs bu videooyunu oynamaq istəmir" demişdir.^[98]

Oyunun ən çox tənqid edilən amillərindən biri qeyri-oyunçu personaja sahib olmamasıdır. "GameSpot" tənqidçisi Edmond Tren "öz hekayələrini sizə təkbətək danışan insanlar olmadan Fallout 76-nın dünyası içərisində öldürəcək şeylər olan ətraf mühit sərgisi kimi bir şeydir" və "doğurudan da maraq doğurmağa kömək edəcək güclü emosional lövbərləri yoxdur" demişdir. O, həmçinin oyunun tapşırıqları barədə "qarşılıqlı əlaqə qura bilməyəcəyiniz insanlardan qalma uzun monoloqlardan və birtərəfli direktivlərdən ibarətdir … sizin etdikləriniz axırda heç kəsə və ya düzünü desək dünyanın qalanına təsir göstərməyəcək".^[96] "PC World" mütəxəssisi Heyman Dinqman bu mövzu barədə "robotlar həqiqətən də qeyri-oyunçu personaj deyillər … onlar sizinlə danışmırlar, sizə danışırlar" demişdir. O, xüsusən də oxuna vilən terminalları və holodiskləri bəyənməmişdir və onlar barədə "onların heç biri əhəmiyyətli və ya daha müfəssəl olsaq, maraqlı deyillər, çünki onlar faktiki söhbət üçün əvəzedici rol oynaya bilməzlər" demişdir.^[94]

"Fallout 76" ilə əlaqədar ilk qalmaqal oyunun Güc Zirehi adlı xüsusi buraxılışının satışa çıxarılması ilə gerçəkləşmişdir. "Bethesda" buraxılışın kətandan hazırlanmış bir əşya çantası ehtiva edəcəyini açıqlamışdı, ancaq istehlakçılara onun yerinə neylondan hazırlanmış bir əşya çantası verilmişdir. Müştərilərin şikayətlərinə cavab verərək "Bethesda" əşya çantalarının dəyişdirilməsinin səbəbinin lazımi materialların yoxluğu olduğunu iddia etmişdir. Nəşrçi dəyişikliyi əvvəlcədən açıqlamadığına görə sərt tənqidlərə məruz qalmışdır. "Eurogamer" mütəxəssisləri "Bethesda"nın rəsmi saytındakı izahında əşya çantasının neylondan hazırlandığı sadəcə müştərilərin şikayətlərdən sonra əlavə edildiyini göstərmişdir. "Bethesda" daha sonra zərər çəkmiş istehlakçılara 5 ABŞ dolları dəyərində pulsuz oyun-içi valyuta təklif etmişdir.^[99][100] Əlavə olaraq, çox keçməmiş "Bethesda"nın kətandan hazırlanış əşya çantalarını sadəcə onlayn təsir göstərənlərə (məsələn, "YouTube" və "Twitch" məzmun müəllifləri) verdiyi aşkar edilmişdir. Bu isə azarkeşlərin daha da çox qəzəblənməsinə səbəb olmuşdur.^[101] 3 dekabr 2018-ci ildə "Bethesda" Güc Zirehi buraxılışını satın alan bütün müştərilər üçün nəzərdə tutulmuş kətandan hazırlanmış əşya çantalarının istehsalına start verildiyini açıqlamışdır.^[102]

5 dekabr 2018-ci ildə "Bethesda"nın dəstək sistemində baş verən xətaya görə bir data çatı yaranmışdır və kətan əşya çantası almaq üçün dəstək bileti təqdim etmiş bütün "Fallout 76" oyunçularının şəxsi məlumatları təhlükəyə düşmüşdür. İstifadəçilər digər müştərilər tərəfindən təqdim edilmiş biletləri açıb-bağlaya və onların adları, ünvanları, elektron poçtları və kredit kartı məlumatlarının bir hissəsi kimi şəxsi məlumatlarını oxuya bilirdilər.^{[103][104][105]} "Bethesda" şirkəti "Ars Technica" saytına verdiyi açıqlamada data çatının "bizim müştəri dəstəyi saytında yaranan xəta" vasitəsilə yarandığını və "hadisəni araşdırırıq və daha çox məlumat əldə etdikdə sizi əlavə məlumatlarla təmin edəcəyik" demişdir. Nəşrçi müştərilərin kredit kartı nömrələrinin və şifrələrinin ifşa olunmadıqlarını açıqlamışdır.^[106]

2018-ci ildə "Bethesda" "Nuka Dark Rum" spirtli içkisinin istehsalı üçün "Silver Screen Bottling Company" şirkəti ilə əməkdaşlıq etmişdir. Bu, "Fallout 4" videooyununun "Nuka-World" EBM-də təqdim edilən "Nuka-Cola Dark" spirtli içkisinin əsasında yaradılırdı. 2018-ci ilin avqust ayında rom öncədən sifariş üçün hazır idi. Romun öncədən sifariş qiyməti 80 ABŞ dolları idi.^[107][108] Buna baxmayaraq, romun 2018-ci ilin dekabr ayında satışa çıxarılmasından sonra azarkeşlərin tənqidlərinə məruz qalıb. İlkin olaraq, spirtli içkinin qablaşdırılmasında şüşədən yox, plastikdən istifadə edilmişdi. Digər tənqidlər arasında azarkeşlərin romun dizaynının reklam edildiyi kimi nüvə bombası formasında olduğunu düşünmələri var.^[109][110]

Satışa çıxarılmasından sonra "Fallout 76" Böyük Britaniyanın satış cədvəlində "Spyro Reignited Trilogy" və "Red Dead Redemption 2" videooyunlarından arxada qalmış və üçüncü yerdə debüt etmişdir.^[111][112] Oyunun satışa çıxarılmasından bir həftə sonra onun Şimali Amerika bazarındakı satış qiyməti bir qədər azaldılmışdır.^[113]

"SuperData" saytının verdiyi statistik məlumata görə, 31 dekabr 2018-ci ilə qədər oyunun 1.400.000 rəqəmsal nüsxəsi satılıb.^[114]

Oyunun olduqca pis rəylər almasına baxmayaraq, Oyunçuların Seçimi mükafatlarında "Azarkeşlərin sevimli payız buraxılışı" kateqoriyasına^[115], Avstraliya Oyun mükafatlarında "İlin oyunu" kateqoriyasına^[116] və Nyu-York Oyun mükafatlarında "Oyunda ən yaxşı musiqi" kateqoriyasında Tin Pen Vadisi mükafatına nominasiya olmuşdur.^[117]

• fallout.bethesda.net — "Fallout 76"-nın rəsmi saytı
• Fallout 76 — Internet Movie Database saytında

• Fallout 76 — MobyGames saytında
• Fallout 76 "fallout.wikia.com"-da (ing.) (rus.)

• "Fallout 76 – Official Teaser Trailer" — YouTube platformasında
• "Fallout 76 – Official E3 Trailer" — YouTube platformasında