Fles Ii Movsum - Wikipedia

Birinci mövsümün sonunda Fleş və Alov qasırğası birlikdə Sentral-sitini xilas edə bilsələr də, nəticədə Ronni həlak olur. Həmin hadisədən yarım il keçir və Fleşi hamı qəhrəman kimi qəbul edir. Şəhər rəhbərliyi minnətdarlığını bildirmək üçün Fleşi mükafatlandırmağı qərara lır. Mükafatlandırma mərasimi zamanı Atom dağıdıcısı Fleşə hücum edir. Keytlinin tapdığı video yazısında Həkim Uells Nora Allenin qətlində günahkar olduğunu etiraf edir və Barrinin atasını həbsdən azad edirlər. Fleşin komandası Atom dağıdıcısını həbs etməyə kömək edir və o, Zum tərəfindən göndərildiyini boynuna alır. Gözlənilmədən S.T.A.R Labsa gələn Cey Qarrik, Fleşin dünyasının təhlükə altında olduğunu bildirir.

Cey Qarrik bildirir ki, başqa dünyadan gəlib və gəldiyi dünyada o Fleşdir. Barrinin dünyasına gəlməmişdən əvvəl o, Zum adlı qəddar spidsterlə döyüşüb və məğlub olub. Bundan sonra göydə portal açılıb və qəfildən Ceyi sorub, bu zaman o, öz sürətindən də məhrum olub. Bu arada Zum öz dünyasından Barrinin dünyasına bir-bir canilər göndərir və Barrinin öldürüləcəyi halda onları geri qaytarmağa söz verir. Keytlin Ceyi tibbi baxışdan keçirdiyi müddətdə, Həkim Şteyn və Sisko başqa dünyalar haqqında nəzəriyyə hazırlayırlar (bu zaman onlar, Barrinin dünyasını Dünya-1, Ceyin dünyasını isə Dünya-2 adlandırırlar).

Fleş komandası S.T.A.R Labsın zirzəmisində Dünya-2-yə açılan portal olmasını aşkarlayırlar. Barri portala qaçmağa çalışsa da, portal onu buraxmır. Professor Şteyn və Cey Qarrik portaı stabilləşdirməyə çalışırlar. Cey və Şteyn portalı stabilləşdirməyə nail olur. Cey evə qayıtmaq istəsə də, Barri Zumun məğlub edilməsinə kimi onun Dünya-1-də qalmasının düzgün olacağını bildirir. Bir neçə saat sonra portal vasitəsiylə Dünya-2-dən Dünya-1-ə Harrison Uells keçir. Sisko Uellsin qızının Zumun əsiri olmasını öyrənir. Bir qədər sonra peyda olan Zum Lindanı qaçırır. Fleş Lindanı xilas etsə də, nə o, nə də Harrison Zuma qalib gələ bilmir. O, Barrini möhkəm döyərək, onun zəifliyini bütün şəhərə göstərir. Zum S.T.A.R. Labsa gəldikdə Sisko ona yavaşlatma iynəsi vura bilir, lakin Zum qaçıb gedir. Özünə gələn Barri, ayaqlarını hiss etmədiyini deyir. Aldığı zədələrdən sonra Barri tərpənməyə başlasa da, hələ ki, əlil arabası vasitəsiylə yeriyir. Harrison Uells öz dünyasına qayıtmağa qərar verir.

Keytlin və Uells S.T.A.R. Labsdakı portal xaric şəhərdəki bütün portalları bağlamağı qərarlaşdırırlar. S.T.A.R. Labsa gələn Zum Uellsə hücum etsə də, onu öldürmür. Harrison bu hücum haqqında heç kimə danışmır. Sisko komandaya bildirir ki, Zumu yavaşlandırmaq üçün yol tapıb və bu məqsədlə o, Tısbağa ləqəbli metainsanı istifadə etmək istəyir. Tısbağa ətrafındakı hər kəsi yavaşladaraq onların kinetik enerjisini mənimsəyir. Tısbağanın gücünü tədqiq etmək üçün Harrison onu öldürür. Uells Fleşin gücünü əmən qurğu yaradır və onu kostyuma yerləşdirir. O, Fleşin gücünün bir hissəsini çəkərək ampulaya yığmağa müvəffəq olur və ampulanı Zuma verir. Lakin Zum daha çox güc tələb edir. Qarşılaşma zamanı Fleş kifayət qədər sürəti olmadığını hiss edir . Başqalarına ziyan vurmaq istəməyən Uells əməllərinin hamısını etiraf etməli olur. Co, onu həbs edərək sürətləndiricidəki kameralardan birinə atır. Lakin Barri Uellsi bağışlayaraq qızını xilas etməkdə ona kömək etməyə söz verir.

Barri şəhərdə olan bütün portalları bağlamağa müvəffəq olur və yalnız S.T.A.R. Labsdakı portal açıq saxlanır. Daha sonra Barri, Uells və Sisko açıq portaldan keçərək Dünya-2-yə düşürlər. Dünya-2 başqa tezlikdə titrədiyinə görə Siskonun bacarığı özünü göstərmir və onlar Zumu görə bilmirlər. Zum Fleşi qaçırır və Uellsin qızını saxladığı kamera ilə üzbəüz başqa bir kamerada həbs edir. Zum, Harrison Uellsin Dünya-2-yə qayıtdığını öyrənir və Sentral-siti sakinlərindən onu təhvil vermələrini tələb edir. Zum S.T.A.R. Labsa basqın etsə də, Sisko, Uells və Barrinin oxşarı Uellsin saxlancında gizlənirlər. Bundan sonra komanda Qatil Şaxtanın axtarışına çıxır ki, o, Zumun qərargahını göstərsin. Bu arada Zumun qərargahında Barri və Cessi üçüncü dustağın onlara nə demək istədiyini anlamağa çalışır. Komanda və Qatil Şaxta arasında danışıqlar baş tutmur və döyüş başlayır. Döyüşdən sonra Sisko Şaxtanı kömək etməsi üçün dilə tutur və o, razılaşır. Komanda Zumun qərargahına girərək Cessi və Barrini azad etsə də, bu zaman Qatil Şaxta tərəfindən xəbərdar edilmiş Zum peyda olur. Ronninin öldürülməsinin əvəzini çıxmaq üçün Şaxta, Zumun qarşısını alır və komandanın qaçmasına şərait yaradır. Üçüncü dustağı isə xilas etmək mümkün olmur.

Cey, Keytlin və Co portalı stabilləşdirirlər və Barri, Sisko, Uells və Cessi evə qayıdırlar. Lakin son anda Ceyi tutan Zum, özü ilə Dünya-2-yə aparır. Dünya-2-də Ceyin bədənini öz qərargahına gətirən Zum maskasını çıxarır və onun Cey kimi göründüyü məlum olur. Barrinin Zumu dayandıra biləcək qədər sürətli olması üçün Fleş komandası onunla məşqlərə başlayır. Barri Zumun Cey olması nəzəriyyəsini irəli sürür. Ceyin dəbilqəsinə toxunan Sisko onun Zum olması haqqında görgü alır. Hamı aldadıldığını başa düşür. Sisko portal açır və Zum həmin portaldan keçir. Zumu S.T.A.R. Labsa qovan Barri, onun diqqətini yayındırmaq üçün valideynlərinin fotolarını istifadə edir. O, müvəqqəti olaraq canini zərərsizləşdirir, maskasını çıxarır və danışıqlara başlayır. Zum qaçır və Uollini əsir götürərək, qaytarmaq üçün əvəzində Barrinin sürətini tələb edir. Barri razılaşır. Zum Uollini qaytarır və öldürdüyü Ceyin, onun özü tərəfindən yaradılmış müvəqqəti əkiz olduğunu danışır. Uells tərəfindən sürəti çəkilən Barri, adi insana çevrilir. Daha da sürətli olan Zum az qala Barrini öldürür. Keytlin ona yalvararaq dayanmasını xahiş edir. Bu zaman Zum qaçaraq onu da özü ilə aparır. Dünya-2-də Hanter Keytlini əsir saxlayır. Zumun yoxluğundan istifadə edən Keytlin, Qatil Şaxta ilə tanış olur. Cani Keytlini onu azad etməyə razı salır və azadlığa çıxan kimi Keytlini öldürməyə çalışır. Hadisə yerinə gələn Zum Qatil Şaxtanı öldürür və Keytlinə xəbərdarlıq edərək bildirir ki, bir də səhvini təkrarlasa, onu da bu cür tale gözləyir. Bundan sonra Zum, Dünya-1-dən başlamaqla, bütün dünyaları işğal etmək qərarına gəlir.

Sentral-sitini tutmaq məqsədi ilə Zum, Dünya-1-ə qayıdır. Barri, yenidən Fleşə çevrilməli olduğunu başa düşür, Harri isə Barriyə təsir etmiş ilk hadisənin effektini yaratmaq üçün onu xüsusi kameraya yerləşdirir. Lakin təcrübə uğursuz alınır və Barri dezinteqrasiyaya məruz qalır. Bu təcrübədən xəbərsiz olan Uolli və Cessi qara materiyanın təsir dairəsinə düşürlər. Peyda olan Zum uğursuz təcrübəni ələ salır. Cessi və Uollini huşsuz halda tapırlar; Uolli tezliklə özünə gəlsə də, Cessi komaya düşür. Bu arada Sisko, özünə gələn görmə ilə Barrinin sağ olduğunu anlayır. Barri öz otağında oyanaraq qonaq otağına düşür və orda onu, Co qarşılayır. Co, ona, sürət gücünün fiziki təzahürü olduğunu və şəhərdə qaçan sirrli kölgəni tutmasa öz dünyasına qayıda bilməyəcəyini deyir. Sisko və Uells Barrinin qayıtması üçün dəhliz yaratsalar da, o, sürətini qaytarmaq üçün qalmağa üstünlük verir. Kölgəni izləyən Barri sürət gücünün digər simaları ilə də qarşılaşır və onlar hamısı Barrinin yaxın adamlarının cildində görünürlər. Sürət gücü Barriyə “qəhrəman” anlayışının özündə nəyi ehtiva etdiyini və anasının ölümü ilə razılaşmayacağı halda yenidən Fleş ola bilməyəcəyini izah etməyə çalışır. Daha sonra anası ilə danışan Barri, nəhayət ki, kölgəni tutur və onun özünə aid olduğunu görür. Gücünü özünə qaytaran Barri, Ayris və Siskonun köməyi ilə yenidən S.T.A.R. Labsa qayıdır. Bundan sonra, o, sürət gücünü istifadə edərək Cessini komadan ayıldır.

Zumun Dünya-2-dən gətirdiyi cani metainsanların Dünya-1-də Sentral-sitiyə hücuma başlamasından sonra Barri öyrənir ki, onların rəhbəri həlak olmuş Lorel Lensin (Qara bülbül) Dünya-2-dən olan oxşarı Qara sirena adlı canidir. Fleş və komandası Zumun hələ də polis idarəsində olmasını müəyyənləşdirir, Fleş oraya üz tutur. Orda Fleşi qarşılayan Hanter deyir ki, Fleş özünü qəhrəman kimi təqdim etdiyi müddətdə Zum onu məğlub edərək qarşısını alacaq. Fleş komandası yalnız Dünya-2-dən gəlmiş şəxslərə təsir edən səs gücləndiricisi yaradaraq, meta-insanların bir çoxunu sıradan çıxara bilir. Lakin Zum qaçaraq xilas olur. Siskoya Dünya-2-nin dağılmasını göstərən görgü gəlməsindən sonra Zum qayıdaraq, Henrini qaçırmağa çalışır. Fleş Zumun arxasınca qaçmağa başlayır, onlar bir zaman Eobard Toun tərəfindən Barrinin anasının öldürüldüyü köhnə ev gəlirlər. Zum, Barrinin gözü qarşısında Henrini öldürür. Bu arada, Uolli Fleş maskasının altında kimin gizləndiyini başa düşür. Henrinin dəfnindən sonra qayıdan Zum, Barriyə yarış təşkil edərək kimin daha sürətli olmasını birdəfəlik müəyyənləşdirməyi təklif edir, imtina alacağı halda isə onun başqa yaxınlarının da öldürülməsi ilə hədələyir. Uells öyrənir ki, Zumun Merkuri laboratoriyasından oğurladığı maqnetar adlı qurğu, Barri və Zumun yarış zamanı kifayət qədər enerji yaradacağı halda bütün kainatı məhv edə bilər. Yarış zamanı maqnetar enerji qəbul edərək Dünya-1-dən başqa digər dünyaları məhv etməyə hazırlaşır. Barri Zumun hiyləsini istifadə edərək müvəqqəti əkizini yaradır. Barri Zumla döyüşdüyü müddətdə, onun əkizi maqnetarı dayandırmaq üçün özünü qurban verir. Barri qalib gəlsə də, canini öldürməkdən imtina edir. Bu zaman peyda olan Zaman kabusları Zumu özləri ilə aparırlar. Əsl Cey Qarrikin Henrinin oxşarı olması meydana çıxır. Uells və Cessi, Ceyə Dünya-3-ə qayıtmaqda kömək etmək məqsədi ilə Dünya-2-yə qayıdırlar. Atasının ölümü ilə barışa bilməyən Barri, keçmişə qayıdaraq anasını Əksinə-Fleşin əlindən xilas edir.

11 yanvar 2015-ci ildə “Fleş” teleserialının ikinci mövsümünün istehsal ediləcəyi bildirilmişdir.^[67] Mövsümün istehsalına başlanan kimi, “Ox” və “Çirkin Betti” sezonunun yazarlarından olmuş Qabriella Stenton şouranner və prodüser elan edilmişdir; daha əvvəl Stenton, birinci mövsümün final seriyası üzərində prodüser və məsləhətçi-yazar kimi çalışmışdı.^[68] Lakin sonradan serialın yaradıcılarından biri olan Endryu Kraysberqin solo şouranner kimi öz vəzifəsinə qayıdacağı bildirilmişdir.^[69][70] Sonradan təsdiq edilmişdir ki, bu qərar 2016-cı ilin əvvəlində “Potensial enerji” seriyası üzərində iş gedərkən verilmişdir.^[71][72] Aaron və Todd Helbinqlər də ikinci mövsümdə şourannerlər kimi çalışmışlar.^[73][74]

Birinci mövsümdə əsas aktyor heyətini təşkil etmiş Qrant Qastin, Kendis Petton, Daniella Panabeker, Karlos Valdes və Cessi L. Martin ikinci mövsümdə də Barri Allen, Ayris Vest, Keytlin Snou, Sisko Ramon/Vayb və Co Vest rollarını canlandırmışlar.^[2] Birinci mövsümdə özünü Harrison Uells kimi təqdim edən Eobard Tounun canlandırmış Tom Kavanaq da mövsümün əsas aktyor heyətinə qayıdaraq Uellsin Dünya-2-dən olan oxşarını canlandırır.^[75] Birinci mövsümün finalında Rik Kosnettin canlandırdığı Eddi Toun öldüyünə görə, aktyor Rik Kosnett ikinci mövsümdə qayıtmamışdır.^[76] Kosnett qonaq ulduz olaraq ikinci mövsümün “Sentral-sitini xailas etmiş şəxs” adlı ilk seriyasının yuxu səhnəsində^[4], sonradan isə “Fleş qayıdır” seriyasında Fleş keçmişə qayıtdıqda Tounla qarşılaşma səhnəsində rolunu təkrarlamışdır.^[16] 2015-ci ilin avqustunda, Conun naməlum oğlu və Ayrisin qardaşı Uollu Vestin Keynan Lonsdeyl tərəfindən canlandırılacağı elan edilmişdir.^[77] Qastin, Petton, Panabeker, Valdes və Martin həm də canlandırdıqları personajların Dünya-2-dənref name="Earth-2 doppelgangers" /> olan oxşarlarını canlandırmışlar, Kavanaq isə “Sentral-sitini xailas etmiş şəxs” və “Fleş qayıdır” adlı seriyalardakı fleşbeklərdə Eobard Toun roluna qayıtmışdır.^[4][78]

Lonsdeylin seçilməsini müzakirə edərkən Kreyberq deyir ki, “Qrantla [Qastin] birinci dəfə görüşəndə olduğu kimi, biz dərhal başa düşdük ki, o, özündə personajın ürəyi və cəsarətini ehtiva edir. Biz bu sevimli personajı şouya gətirdiyimizə görə çox şadıq.”^[79] Uolli həmişə Conun oğlu və Ayrisin qardaşı olmaq istəmişdir ki, bu da personajın komikslərdəki tarixçəsindən fərqlənir. Prodüserlər daha əvvəl heç vaxt xatırlanmamış ikinci dərəcəli qohumların seriala əlavə edilməsi ideyasına yaxşı baxmadıqlarına görə, Uollinin oğul və qardaş kimi təqdim edilməsi qərarlaşdırılmışdır.^[77] Lonsdeyl isə əslində “Sabahın əfsanələri” serialında Cefferson “Ceks” Ceksonu canlandırmaq üçün dinləmədən keçirilmişdir.^[80]

2015-ci ilin iyulunda Teddi Sirsin Dünya-2-nin Fleşi olan Cey Qarriki canlandıracağı elan edilir.^[81] Lakin mövsümün ortasında bəlli olur ki, o, əslində özünü Cey kimi təqdim edən Hanter Zolomon/Zumdur.^[82] Bu açıqlamadan əvvəl kostyumlu Zum Rayan Hendli tərəfindən canlandırılmışv ə Toni Todd tərəfindən səsləndirilmişdir.^[83][84]

İkinci mövsümdə kostyum dizayneri vəzifəsində Kollin Etvudu Maya Mani əvəz etmiş və Fleş kostyumunda bəzi dəyişikliklər edərək (məsələn personajın simvolunu qırmızıdan sarıya dəyişməklə) onu komiksdəki obrazına daha da yaxınlaşdırmışdır.^[85][86] Qastin qeyd edir ki, doqquzuncu seriyanın çəkilişi zamanı onun üzünə maska yapışdırmaq ideyasından imtina edərək zipperlə açılıb-bağlanan maskaya keçilmişdir.^[87] Komikslərdə Zumun kostyumu Fleşin kostyumunu təkrarlayaraq yalnız sarı rəngli olması ilə seçilsə də, serialda Zumun kostyumu tamamilə qara rənglidir.^[88] Zumun xarici görünüşünü Marvel Comics personajı olan Venomun görünüşü ilə müqayisə edən Kreysberq deyir ki, “Zumun kostyumu Əksinə-Fleş kostyumu ilə müqayisədə daha orqanikdir. Bir növ bu kostyumun canlı varlıq və ya sadəcə kostyum olmasını demək çətindir...Heç bir dəri hissəsi görünmədiyindən kostyum altındakı şəxsin robot və ya qara enerji olduğunu müəyyən etmək çətindir.”^[89]

İkinci mövsümün çəkilişlərinə 7 iyul 2015-ci ildə Vankuverdə^[90] start verilmiş və 18 aprel 2016-cı ildə çəkilişlər tamamlanmışdır.^[91]

İkinci mövsümdə də bəstəkar Bleyk Nili əsas bəstəkar kimi vəzifəsinə qayıtmışdır. 22 iyul 2016-cı ildə ikinci mövsümün musiqi albomu rəqəmsal, 26 iyul 2016-cı ildə isə CD formatda satışa çıxarılmışdır. Nili həm də Qastinin Fleş obrazında “Supergörl”ün “Dünyanın ən yaxşıları” seriyasında görünməsi üçün musiqi mövzusu bəstələmişdir. “Dünyanın ən yaxşıları” adlandırılan musiqi mövzudu “Supegörl”ün birinci mövsümünün musiqi albomuna daxil edilmişdir. “Fleş”in ikinci mövsümünün bütün musiqiləri Bleyk Nili tərəfindən yazılmışdır.

2015-ci ilin oktyabrında “Ox” serialının şouranneri Vendi Merikl, Ox Kainatının prodüserləri personajlar və süjet xəttlərini izləyərək, hadisələrin bir-birinin xronologiyasını tamamlamasına nəzarət etdiklərini bildirir^[92] , lakin 2016-cı ilin aprelində Aaron Helbinq deyir ki, “bəzən qrafiklər üst-üstə düşmür...və bu işlər bizim nəzarətimizdən kənardadır.” Helbinq, davam edərək bildirir ki, məsələn “bu həftə “Ox”da Barrinin öz bacarığını istifadə etməsi göstərilsə də, oxşar məlumat “Fleş”də yoxdur.”^[93]

“Fleş”in ikinci mövsümü multikainat nəzəriyyəsini öyrənməyə başlayaraq Dünya-2-ni təqdim edir. Burada “Fleş”, o cümlədən “Ox” serialındakı personajların oxşarları yaşayır.^[94] “Dünya-2-yə xoş gəlmisiz” serialında “Supergörl” serialının ulduzu Melissa Benua Supergörl, 1990-cı illərin “Fleş” serialının ulduzu Con Uizli Şipp isə Fleş rolunda görünür və həmin serialların hadisələrinin “Fleş” dünyasının alternativ dünyalarında baş verdiyi qeyd edilir.^[95][96]

  Əsas məqalə: Qəhrəmanlar güclərini birləşdirir

“Ox” serialı ilə ənənəvi krossover 1 və 2 dekabr 2015-ci ildə yayımlanmış, krossoverdə Fleş və Yaşıl Ox birləşərək, Qırğı-qız və Qırğı-adamın reinkarnasiyası olan Kendra Sanders və Karter Hollu öldürməyə çalışan Vandal Sevecə qarşı mübarizə aparmışlar.^[97][98] “Sabahın əfsanələri” serialında 2015-2016 krossoveri çərçivəsində seriya nəzərdə tutulmasa da, krossoverdə sonradan həmin serialın ulduzları olacaq bir neçə personaj və aktyor təqdim edilmişdir.^{[98][99][100]} Kasper Kramp, Folk Hentşel və Piter Frensis Ceyms krossoverdə Vandal Sevec, Kartel Holl/Qırğı-adam və Həkim Aldus Bordmen rollarında debüt etmişlər.^{[25][27][101]} “ScreenRant”dan Elis Uolker qeyd edir ki, “...onsuzda yüklənmiş olan krossover ssenarisi, “Əfsanələr”in əsasının yaradılması üçün əlvə süjetlərin də əlavə edilməsindən xeyli zərər çəkmişdir. Sanki, müəlliflər becərə biləcəklərindən daha çox toxum əkmişlər. Krossover hadisəsi iki şounun qarşılaşdığı şən hadisə deyil; indi onun qarşısında yeni bir məqsəd vardır – tamamilə yeni bir dünyanın yaradılması.”^[102]

  Əsas məqalə: Dünyanın ən yaxşıları

2016-cı ilin fevralında Qastinin, “Supergörl” serialının on səkkizinci seriyasında rol alacağı elan edilir, serialın prodüserləri isə fanatlar və jurnalistlərə təşəkkür edərək bu krossoverin reallaşmasında göstərdikləri dəstəyə görə təşəkkür bildirirlər.^[103] O zaman seriyanın ssenarisi ilə bağlı heç bir məlumat verilməsə də, “Deadline Hollywood”dan Ross A. Linkoln hadisələrin Barrinin dünyalar arasında səyahət etmə bacarığı ilə əlaqəli ola biləcəyini qeyd edərək, Supergörlün Ox və Fleşlə eyni dünyada deyil, multikainata aid dünyalardan birincə yaşamış ola biləcəyini deyir.^[104] “Dünya-2-yə xoş gəlmisiniz” seriyasında Benuanın Supergörl obrazında təqdim edilməsi ilə bu ehtimal təsdiqlənir.^[95] “Ox”un yaradıcılarından biri olan Mark Quqqenheym Supergörlün yaşadığı dünyanı qeyri-rəsmi şəkildə Dünya-CBS adlandırır.^[105]

28 mart 2016-cı ildə CBS telekanalında yayımlanmış “Dünyanın ən yaxşıları” adlı krossover seriyasında Supergörlün alternatic dünyada yaşadığı göstərilir, buraya gələn Fleş, Gümüş Banşi və Layvayrla mübarizədə Karaya kömək edir, Kara isə öz növbəsində Fleşin geri qayıtmasına dəstək olur.^[106] Seriyanın adı Fleş də daxil olmaqla bir çox DC Comics personajlarını Supermen ətrafında birləşdirən “World's Finest Comics” seriyasının adından götürülmüşdür. Krossover seriyasının hadisələri “Fleş”in ikinci mövsümünün “Zuma qarşı” seriyasındakı iki hadisə arasında baş verir.^{[107][108][109]} Çəkilişləri Vankuverdə baş tutuan “Ox”, “Fleş” və “Sabahın əfsanələri” seriallarından fərqli olaraq “Supergörl” serialının çəkilişi Los-Ancelesdə keçirildiyinə görə, bu krossoverin hazırlanmasına Ox Kainatı krossoverlərinin hazırlanmasına sərf edildiyindən daha çox vaxt və vasitə tələb edilmişdir.^[110] Prodüsselər krossoverdə istifadə ediləcək yeganə personajın Fleş olmasına qərar verərək, onun müxtəlif zaman və dünyalara səyahət etmək bacarığının “yeni seriala bir qədər yumor gətirməklə personajlar arasında qığılcım yaradacağına” ümid edirdilər. Berlanti qeyd edir ki, idealda krossoverdə Amellin Yaşıl Oxu və Qastinin Fleşi iştirak etməli olsa da, “məntiq baxımından bu cür krossoverin reallaşdırılması dəhşətli olardı. Biz qarşıya qoyduğumuz hədəfi yüngülləşdirməli idik.”^[111] Məsələyə optimist yanaşan Qastin, 2016-cı il krossoverinin növbəti ildə digər Ox Kainatı personajları ilə birlikdə daha bir krossover hadisəsi reallaşdırmağa imkan verəcəyini düşünürdü.^[112]

Krossover seriyası tənqidçilərdən əla şərhlər almışdır. Seriyanı 8.6/10 balla qiymətləndirən IGN-dən Kliff Uitli qeyd edir ki, “Qaranlıq və ovxalanan “Betmen Supermenə qarşı” filmindən sonra “Supergörl”ün “Dünyanın ən yaxşıları” seriyası palitranı təmizəmək üçün ən yaxşı vasitəni təklif etməklə, həm də bu günə kimi çıxarılmış ən yaxşı seriyalardan biri kimi görünür. Adətən gördüyümüz giriş “döyüşü” yerinə Supergörl və Fleş dərhal super-dostlara çevrilirlər ki, bu da çox təravətli təsir bağışlayır. Barrinin Karanın dünyasına ideal uyğunlaşması ilə yanaşı, həm də aktyorlar Qrant Qastin və Melissa Benua arasında ideal qığılcım hiss edilir. Şəhərdə Qırmızı K qəzası gözlənilməz hadisə olsa da, ümumilikdə “Dünyanın ən yaxşıları” çox ləzzətlidir.”^[113] “TV Fanatic”dən Steysi Qlenzmen isə seriyanı 5.0/5 balla qiymətləndirir.^[114]

İkinci mövsümün premyerası 6 oktyabr 2015-ci ildə The CW telekanalında baş tutmuş^[43], final seriyası 24 may 2016-cı ildə yayımlanmışdır.^[66] Birinci mövsümlə müqayisədə ikinci mövsümdə "Fleş"in aktuallığı 1,378% artmışdır.^[115]

4 oktyabr 2016-cı ildən ikinci mövsüm Netflixdə yayımlanmağa başlamış^[116], 6 sentyabr 2016-cı ildə isə Blu-ray və DVD formatlarında satışa çıxarılmışdır.^[117]

"Fleş"in ikinci mövsümü 2016-cı ilin dördüncü ən çox torrentlə endirilmiş serialı olmuşdur.^[118]

Hər seriya üzrə ortalama 4.25 milyon izləyici sayı ilə "Fleş"in ikinci mövsümü ümumi serialların 2016-cı il reytinq sıralamasında 112-ci yerdə qərarlaşmışdır.^[119]

Təy aqqreqatoru “Rotten Tomatoes” 23 tənqidçinin rəyi əsasında ikinci mövsümü 94% təravətli 7.98/10 balla qiymətləndirir. Sayt tənqidçilərinin konsesusunda deyilir ki, “Yaxşı dizaynı və həyəcanlandırıcı aktyor heyəti ilə Fleş televiziyadakı ən güclü komiks şoularından biri olaraq qalır.”^[143] “Metacritic” dörd tənqidçinin rəyi əsasında ikinci mövsümü 81/100 balla qiymətləndirərək “ümumi alqış”a layiq görüldüyünü qeyd edir.^[144]

“Collider”dən Deyv Trambor mövsüm premyerasını 4/5 ulduzla qiymətləndirərək deyir ki, “Birinci mövsümün güclü sıralanmasından sonra yaxşı olan hər şeyi özündə ehtiva edən seriya ikinci mövsüm üçün əla başlanğıcıdır.”^[4] “Den of Geek!”dən Meyk Çeççini premyera seriyasını 3.5/5 balla qiymətləndirərək seriyanın “dayazlıq” və “tələskənlik” təbiətini tənqid edir. O hiss edir ki, “seiya yeni mövsümü sıfırdan başlamağa o qədər ciddi köklənib ki, [...] hadisələrə nəfəs almağa vaxt vermir.”^[145] “Forbes”dan Erik Kain qeyd edir ki, “Harrison Uellsin olmaması ümumi atmosferin böyük bir hissəsinin itirilməsinə səbəb olsa da, ümumilikdə seriya The CW telekanalında superqəhrəman şouları üçün əla başlanğıc olmuşdur.”^[146] Henri Allenin azad edilməsi bütün tənqidçilərin narazı qaldığı məqam olsa da, Trambor onu “tam, maraqlı və emosional seriya üçün ödənilməli olan kiçik xərc” hesab edir.^{[4][145][146]}

“Dünya-2-yə xoş gəlmisiniz” seriyası bir çox tənqidçilər tərəfindən müsbət qarşılanmışdır. Erik Keyn qeyd edir ki, “Bu Fleşin ən yaxşı forması idi. Həyəcanlandırıcı, şən, qorxulu olan bu seriya əvvəldən axıra kimi tamamilə düzgün notlar üzərində ifa edilir.”^[147] “IGN”-dən Cessi Şedin həmin seriyanı 9.7/10 balla qiymətləndirərək, Dünya-2 nəzəriyyəsini, Barrinin dramatik anlarını, Ölüm qasırğası, Qatiş Şaxta və Revyerbin təsvir edilməsini tərifləyir, lakin sonuncunun tezliklə öldürülməsi qərarını tənqid edir. O, qeyd edir ki, “Barrinin dostları ilə, Dünya-2-yə, şən, lakin emosional səfərə çıxması “Fleş”in ən yaxşı seriyalarından biridir.”^[148] “Vulture”dən Ancelika Ceyd Bastien qeyd edir ki, “seriya özündə əla döyüş səhnələri, Millisent Şeltonun inanılmaz rejissor işi, ən yaxşı aktyor performansları (xüsusilə Kendis Petton və Qrant Qastinin ifasında), çoxlu sayda emosional anlar və komikslərə kifayət qədər hörməti özündə ehtiva edir. Şübhəsiz ki, bu, ikinci mövsümün ən yaxşı seriyasıdır və ola bilsin “Fleş”in bu günə kimi təqdim edilmiş seriyaları arasında bundan daha yaxşısı yoxdur.”^[149] Seriyanı 4/5 balla qiymətləndirən Deyv Trambor qeyd edir ki, ““Fleşin” bu seriyası tamamilə inanılmazdır və tez inkişaf edən bu şou pasxa yumurtaları ilə doludur.”^[150] “Entertainment Weekly”dən Conatan Dornbuş Barrinin Dünya-2-dən olan oxşarının anası ilə telefonla danışdığı seriyanı tərifləyərək deyir ki, Qastin “Barrinin kədərlə mübarizəsi, ümid və digər hisslərini olduqca peşəkar əks etdirir.”^[151] “The A.V. Club”dan Skott fon Doviak yazır: “Tətildən qayıtdıqdan sonra “Fleş”in bütün seriyaları sanki yorğun və tənbəl idilər, Zumun ssenari xətti isə uğursuz qəbul edilmişdi. “Dünya-2-yə xoş gəlmisiniz” seriyası isə həm həm süjet xəttlərinə, həm də mövsümə yeni nəfəs verməklə ən azı Fleşin özü qədər yaxşıdır.” ^[152]

Mövsümün final seriyasını izlədikdən sonra, “Collider”dən Ellison Kin daha çox Qastinin ifasını tərifləyərək yazır: “Bəzən böyük televiziya aktyorları artıq fantastik olan seriyadan çıxa bilirlər, lakin bəzən aktyor materialın üzərinə də qalxaraq, sübut edir ki, müəlliflərin icazə verdikləri materialı maksimum istifadə edərək mükəmməl nəticə almaq mümkündür. “Fleş”in ikinci mövsümünün başgicəlləndirici final seriyasında da biz bunun şahidi oluruq. Şübhəsiz ki, serialın əsas ulduzu olan Qrant Qastin, izləyicilərinə gördükləri hər şeyin emosional, ciddi və təsiredici olduğunu təlqin etmək bacarığına malikdir.”^[153] “Nerdist” üçün yazdığı rəydə Cozef MakKeyb deyir ki, “Bir çoxu birinci mövsümdəki antoqonistin təkrarlanmısan qaynaqlanan ikinci mövsümün əsas çatışmazlıqlarına baxmayaraq, [...] finalda, Barri sanki, ona icazə verildiyindən daha çox müstəqil fikir nümayiş etdirməyə çalışır. O, S.T.A.R. Labsdakı dostlarının köməyinə ümid etmədən müstəqil şəkildə canini zərərsizləşdirmək planı hazırlayır. Məhz bu Barrini mən üçüncü mövsümdə də görmək istəyirəm.”^[154]

Bir çox tənqidçilər birinci mövsümün yaratdığı standrtların, ikinci mövsümə ziyan vurduğunu qeyd edərək, mövsümün əsas antoqonistinin davranışını tənqid edirlər. “Collider”dan Keyt Bert mövsümü 3/5 balla qiymətləndirərək deyir ki, ““Fleş”in bir enişli-qalxışlı mövsümü, elə enişli-qalxışlı finalla da tamamlandı. Tam inkişaf etdirilməmiş və məntiqsiz Zumla, “Fleş” müasir televiziya dövrünün ən dramatik səhvlərindən birinin qurbanına çevrildi: burada da yaxşı oyun üzərində qurulmuş ssenari yerinə çoxlu sayda ssenari dönüşlərinə üstünlük verildi.”^[155] “Entertainment Weekly”dən Ceff Censen mövsümü “B-" dərəcəsi ilə qiymətləndirərək “açıq-aşkar yavaşladıcı” adlandırır və multikainatın “cəsarətli” təqdim edilməsi onun gözləntilərini doğrultmadı. Censen, Barri və Co arasındakı əlaqəni tərifləsə də, Conun bioloji oğlunun təqdim edilməsi səbəbilə bu əlaqənin kifayət qədər geniş açılmasının mümkün olmadığını deyir. Həmçinin o, Barrinin Ayrisdən romantik asılılığını da tənqid edir. Zum obrazını da tənqid edən Censen yazır ki, “o, maraqlı sirr kimi başlasa da, zamanla özünə olan marağı tamamilə itirdi. Şəxsiyyəti müəyyənləşdikdən sonra isə şərin tamamilə adi bir simasına çevrildi"^[156]. İkinci mövsümü 8.6/10 balla qiymətləndirən Cessi Şedin yazır ki, “İkinci mövsümdə müəlliflər birinci mövsümün uğurunu təkrarlayaraq, hətta bəzi məqamlarda onu geri qoyurlar. Lakin yekun nəticədə ikinci mövsüm daha qeyri-stabil alındığına görə, həm də daha ziyanlı təcrübə idi.” ^[157]

"Fleş" serialının ikinci mövsümü 20 nominasiyada müxtəlif mükafatlara namizəd göstərilmiş və 5 nominasiyada qalib gəlmişdir.^[158] Serial ikinci il ard-arda üç Saturn mükafatına namizəd göstərilmiş və "Ən yaxşı superqəhrəman serialı" nominasiyasında qalib gəlmişdir. Üç Leo mükafatına namizəd göstərilən şou, "Ən yaxşı xüsusi effektlər" nominasiyasında və "Qorilla müharibəsi" seriyasına görə "Ən yaxşı dram serialı" nominasiyasında qalib gəlmişdir.^[159] 2016-cı ildə şou altı nominasiyada Yeniyetmə Seçimi Mükafatına namizəd göstərilmiş və Qastin "Seçim TV aktyoru: Elmi-fantastika" nominasiyasında qalib gəlmişdir.^[160]

• cwtv.com/shows/the-flash — Rəsmi saytı
• The Flash — IMDb səhifəsi