Kukesi Fk - Wikipedia

1930-cu il martın 4-də yaradılmışdır^[1].

Klubun ilk adı "Şöqeriya" olub^[1]. İkinci Dünya müharibəsinin ardından ilk dəfə Albaniyanın III liqasında mübarizə aparan komanda 1958-ci ildən "Perperami" adını daşımağa başlayıb. 2010-cu ildə yenidən ad dəyişikliyinə gedən rəhbərlik bu dəfə kluba "Kukesi" adını verib^[1].

"Kukesi" II liqa çempionu kimi ilk dəfə 2012/2013 mövsümündə elitaya vəsiqə qazanmışdır. Klub yüksək liqadakı ilk mövsümündəcə gümüş medala yiyələnərək, UEFA Avropa Liqasında iştirak hüququ qazanmışdır. Bundan sonra da ardıcıl 2 dəfə – 2013/2014, 2014/2015 mövsümlərində çempionatı 2-ci yerdə tamamlayan, 2015/2016 mövsümündə isə üçüncülüklə kifayətlənən klub, nəhayət ki, 2016/2017 mövsümündə tarixinin ilk çempionluğunu qazanmışdır^[1].

"Kukesi" həmçinin 1 dəfə – 2015/2016 mövsümündə Albaniya kubokunu, 1 dəfə də – 2016-cı ildə Albaniya Superkubokunun sahibi olmuşdur^[1].

Klub 2013/2014 mövsümündə avrokuboklarda debüt etməsinə baxmayaraq, kifayət qədər təhlükəli rəqib olduğunu qısa müddətdə göstərməyi bacarmışdır^[1]. İlk mövsümündəcə UEFA Avropa Liqasında 3 mərhələ keçən albanlar yalnız pley-offda "Trabzonspor"a yenilmişlər^[1]. 2014/2015 mövsümündə Avropa Liqası ilə erkən vidalaşan klub, 2015/2016 mövsümündə 2, 2016/2017 mövsümündə isə 1 mərhələ adlaya bilmişdir^[1]. 2017/2018 mövsümündə isə tarixində ilk dəfə UEFA Çempionlar Liqasında mübarizə aparmışdır^[1].

Komanda ev oyunlarını Kukes şəhərində yerləşən "Zekir Emeri" stadionunda keçirir^[1]. Lakin 5000 tamaşaçı tutumuna malik stadion beynəlxalq standartlara cavab vermədiyindən, "Kukesi" avrokubokda rəqiblərini Albaniya yığmasının stadionu olan Elbasan şəhərinin 12800 tamaşaçı tutumuna malik eyniadlı arenasında qəbul edir^[1].