Rovsen Huseynov Bokscu - Wikipedia

Rövşən Hüseynov 1993-cü ilin sentyabrında Bursa şəhərində baş tutan Avropa Çempionatında mübarizə apardı.^[2] 1/8 final mərhələsində Ukrayna nümayəndəsi İqor Matveyçuhu, 1/4 final mərhələsində isə Bolqarıstan təmsilçisi Yulian Stroqovu məğlub edən Rövşən Hüseynov turnirin yarım-final mərhələsinə adladı.^[2] Finala gedən yolda onun rəqibi Türkiyə nümayəndəsi Kadir Yıldırım oldu.^[2] Bu görüşdə də Rövşən Hüseynov rəqibi üzərində qələbə qazandı və turnirin final görüşünə vəsiqə qazandı.^[2] Həlledici görüşdə isə onun rəqibi Almaniya təmsilçisi Rico Kubat oldu.^[2] Sentyabrın 12-də baş tutan final görüşündə Rövşən Hüseynov rəqibi üzərində 8:4 hesabı ilə qələbə qazandı və Avropa Çempionatının qalibi oldu.^[2] Bununla da Rövşən Hüseynov bu idman növü üzrə Avropa Çempionatının qalibi olan birinci Azərbaycan idmançısı olaraq tarixə düşdü.

Azərbaycan Prezidenti Heydər Əliyevin 5 mart 1995-ci il tarixli 292 nömrəli Sərəncamına əsasən Azərbaycan idmanında xidmətlərinə görə Rövşən Məmməd oğlu Hüseynov "Tərəqqi" medalı ilə təltif edildi.^[3]

Üç ildən sonra Rövşən Hüseynov 1996-cı ilin aprelində Vayle şəhərində (Danimarka) baş tutan Avropa Çempionatında mübarizə apardı.^[4] 1/8 final mərhələsində o, Ukrayna nümayəndəsi Sergey Kovqanhoya məğlub oldu və turnirdə mübarizəsini dayandırdı.^[4]

Rövşən Hüseynovun Dünya Çempionatlarında debütü 2001-ci ilin iyununda oldu.^[5] Şimali İrlandiyanın Belfast şəhərində baş tutan turnirin təsnifat mərhələsində Rövşən Hüseynov Yunanıstan nümayəndəsi Boris Georgiadisa 10:12 hesabı ilə məğlub oldu və Dünya Çempionatında mübarizəsini uğursuz başa vurdu.^[5] 2003-cü ilin iyulunda Tailandda da baş tutan Dünya Çempionatında Rövşən Hüseynov uğursuz çıxış elədi.^[6] Turnirin 1/16 final mərhələsində Macarıstan nümayəndəsi Henri Kertesza gərgin idman mübarizəsi şəraitində baş tutan görüşdə 11:11+ hesabı ilə məğlub olan Rövşən Hüseynov növbəti dəfə Dünya Çempionatında mübarizəsini uğursuz başa vurdu.^[6]

2004-cü ilin fevralında Rövşən Hüseynov 8 ildən sonra Avropa Çempionatında mübarizə apardı.^[7] Rövşən Hüseynov turnirin təsnifat mərhələsində Niderland nümayəndəsi Husnu Koçabasa (34:22), 1/8 final mərhələsində isə Xorvatiya nümayəndəsi Filip Paliça (RSCO) qalib gəldi və turnirin 1/4 final mərhələsinə adladı.^[7] Bu mərhələdə Rövşən Hüseynov Türkiyə nümayəndəsi Səlcuq Aydına məğlub oldu və medalın bir addımlığında mübarizəsini dayandıraraq Avropa Çempionatını beşinci pillədə başa vurdu.^[7]

Rövşən Hüseynov Azərbaycanı 2004-cü ilin avqustunda Yunanıstanın Afina şəhərində baş tutan XXVIII Yay Olimpiya Oyunlarında təmsil elədi.^[8] 60 Kq. turnirində çıxış edən Rövşən Hüseynovun olimpiadanın 1/16 final mərhələsində rəqibi CAR nümayəndəsi Bonqani Mahlanqu oldu.^[8] Avqustun 16-da baş tutan görüşdə Rövşən Hüseynov rəqibinə 22:14 hesabı ilə qalib gəldi və turnirin 1/8 final mərhələsinə adladı.^[8] Bu mərhələdə onun rəqibi ABŞ nümayəndəsi Visente Esobedo oldu.^[8] Avqustun 20-də baş tutan görüşdə rəqibindən tam üstün olan Rövşən Hüseynov rəqibi üzərində 36:18 hesabı ilə qələbə qazandı və turnirin 1/4 final mərhələsinə adladı.^[8] Bu mərhələdə isə onun rəqibi üç dəfə Dünya Çempionatının qalibi, 2000-ci il Sidney Olimpiadasının çempionu Kuba nümayəndəsi Mario Kindelan oldu.^[8] Avqustun 24 baş tutan görüşdə Rövşən Hüseynov təcrübəli və titullu rəqibinə 11:24 hesabı ilə məğlub oldu.^[8] Bununla da 28 yaşlı Rövşən Hüseynov olimpiadanı beşinci pillədə başa vurdu.^[8]